БНСУ-ын хууль тогтоох дээд байгууллага болох Үндэсний Ассамблей улс орныхоо нэр хүндийг дэлхийд сурталчлан, таниулж буй уран бүтээлчдэд хугацаа олгох зорилгоор Цэргийн албан үүргийн тухай хуульдаа өөрчлөлт оруулжээ.
Тодруулбал, БНСУ-д бүх эрэгтэйчүүд 30 нас хүрэхээсээ өмнө хоёр жилийн цэргийн алба хаасан байх ёстой хэмээн тус хуульд заасан байдаг. Өөрөөр хэлбэл, 28 нас хүрэхээсээ өмнө цэргийн албад элсэх ёстой аж. Тэгвэл арванхоёрдугаар сарын 1-нд гарсан хуулийн нэмэлт, өөрчлөлтөд шаардлага хангасан уран бүтээлчид цэргийн алба хаах хугацаагаа хоёр жилээр хойшлуулах боломжийг тусгаж өгчээ.
Өмнөд Солонгосын алдарт BTS хамтлаг Биллбоардын чартад түүхэн амжилт үзүүлсний маргааш нь ийнхүү хуульд өөрчлөлт оржээ. Түүнчлэн хамтлагийн хамгийн ахмад гишүүн болох Ким Сокчин (Жин) арванхоёрдугаар сарын 4-нд 28 нас хүрэх гэж байгаа юм. Эдгээр давхцлаас үүдэн БНСУ-ын хууль тогтоогчид BTS хамтлагаас болж хуульдаа өөрчлөлт орууллаа хэмээн хэвлэлүүд мэдээлж байна.
BTS хамтлагийн тухайд энэ жил Америкийн хөгжмийн салбарт хэд хэдэн шинэ дээд амжилт тогтоогоод байгаа билээ. Хамгийн сүүлд л гэхэд цар тахлын сэдэвтэй Be хэмээх шинэ цомогт нь багтсан Life Goes On дуу нь Billboard Hot 100 чартыг тэргүүлжээ. Мөн 24 цагийн дотор YouTube-ээс хамгийн их үзэлт цуглуулсан уран бүтээлч, 2020 онд Spotify платформд хамгийн олон удаа тоглуулагдсан хамтлаг гэх мэт олон дээд амжилтыг тогтоогоод байна.
BTS хамтлаг 2019 онд улсынхаа эдийн засагт 4.7 тэрбум долларын хөрөнгө оруулалт хийсэн бол 2020 онд Dynamite хэмээх дуу нь л гэхэд дангаараа 1.4 тэрбум долларыг Өмнөд Солонгосын эдийн засагт оруулж, 8000 ажлын байр шинээр бий болгожээ.
БНСУ-ын Ерөнхийлөгч Мүн Жэ Ин BTS хамтлагийн Биллбоардад үзүүлсэн амжилтыг магтан твиттерт жиргэжээ.
— 문재인 (@moonriver365) September 1, 2020
