УИХ Ерөнхийлөгчийн тухай хуулийн шинэчлсэн найруулагын төслийг энэ хаврын чуулганаар баталж, ирэх сарын 1-ээс хэрэгжүүлж эхлэх чигтэй байгаа.
Тус хуулийн төсөлд Ерөнхийлөгчийн эрхийг маш их хязгаарласан өөрчлөлтүүдийг тусгасан бөгөөд хуулийг дагалдуулж 25 хуульд нэмэлт, өөрчлөлт оруулна. Тухайлбал, Монгол Улсын үндэсний аюулгүй байдлын тухай хуульд нэмэлт, өөрчлөлт оруулж, Үндэсний аюулгүй байдлын зөвлөлийн Нарийн бичгийн даргыг Ерөнхийлөгч томилдог байсныг өөрчилж Зөвлөлийн нарийн бичгийн даргыг Ерөнхийлөгчид танилцуулснаар Ерөнхий сайд томилж, чөлөөлнө гэсэн өөрчлөлт оруулахаар тусгажээ. Ингээд Ерөнхийлөгчийн тухай хуулийн шинэчилсэн найруулгад оруулсан онцлох заалтуудыг хүргэж байна.
-Үндэсний аюулгүй байдлын зөвлөлийн нарийн бичгийн даргыг Монгол Улсын үндэсний аюулгүй байдлын зөвлөлийн тухай хуулийн 6 дугаар зүйлийн 2- т заасны дагуу Ерөнхийлөгчид танилцуулснаар Ерөнхий сайд томилж, чөлөөлнө.
-Үндэсний аюулгүй байдлын зөвлөлийн хуралдааныг зарлах, асуудал хэлэлцүүлэхдээ Монгол Улсын Үндэсний аюулгүй байдлын тухай хуулийн 5 дугаар зүйлийн 3-т заасныг баримтална.
-Монгол Улсын зэвсэгт хүчний ерөнхий командлагчийн хувьд Зэвсэгт хүчний Жанжин штабын даргыг Улсын Их Хуралтай зөвшилцөж томилно.
-Зэвсэгт хүчний нийтлэг дүрмүүдийг Засгийн газрын санал болгосноор батална.
-Ерөнхийлөгч гадаад бодлогын байр суурийг Засгийн газартай зөвшилцөн илэрхийлж болно.
-Ерөнхийлөгч төрийн дээд түвшний гадаад арга хэмжээнд оролцох, зохион байгуулах төлөвлөгөөг Ерөнхийлөгчийн Тамгын газар жил бүрийн 12 дугаар сарын 15-ны дотор Засгийн газарт уламжилж батлуулна.
-Ерөнхийлөгч Улсын ерөнхий прокурор, түүний орлогчийг томилох тухай зөвшилцөхөөр саналаа Улсын Их Хуралд оруулах бөгөөд Улсын Их Хурал уг саналыг татгалзсан бол өөр хүнийг санал болгоно.
-Монгол Улсын Үндсэн хууль, түүнд нэмэлт, өөрчлөлт оруулах тухай хуульд хориг тавихгүй
-Үндсэн хуулийн цэцийн дүгнэлтийг хэлэлцэж гаргасан шийдвэрт хориг тавихгүй
-Хуульд заасны дагуу улс төрийн албан тушаалтныг томилох тухай Улсын Их Хурлын шийдвэрт хориг тавихгүй.
-Нийслэл хотод ордон, өвөл, зуны өргөөтэй байх бөгөөд тэдгээрийн зардал, үйлчилгээг төр хариуцах
-Ерөнхийлөгч бүрэн эрхийнхээ хугацаанд албан татвараас бусад татвар, хураамжаас чөлөөлөгдөнө.
-Ерөнхийлөгчийн цалин хөлс, жилийн зардлын хэмжээг Улсын Их Хурал тогтооно.
-Ерөнхийлөгч бүрэн эрхийнхээ хугацааг дууссан өдрөөс эхлэн таван жилийн хугацаанд улс төрийн намын гишүүнчлэлээ сэргээх, эсхүл улс төрийн нам байгуулах, эсхүл улс төрийн намын гишүүнээр элсэхийг хориглоно.
-Ерөнхийлөгч бүрэн эрхийнхээ хугацааг дууссанаас эхлэн Засгийн газрын гишүүний тухайн үеийн цалинтай тэнцэх цалин насан турш авна.
-Ерөнхийлөгчийн бүрэн эрхийн хугацаа дууссан нь Тамгын газрын дарга, зөвлөхөөс бусад ажилтныг ажлаас нь өөрчлөх үндэслэл болохгүй.
-Монгол Улсын зэвсэгт хүчний ерөнхий командлагчийн хувьд Зэвсэгт хүчний Жанжин штабын даргыг Улсын Их Хуралтай зөвшилцөж томилно.
-Ерөнхийлөгч гадаад бодлогын асуудлаар санал, санаачилга гаргах бол гадаад харилцааны асуудал эрхэлсэн төрийн захиргааны төв байгууллагад хүргүүлж, Засгийн газраар шийдвэрлүүлнэ.
-Олон нийтийн радио, телевизийн тухай хуулийн 21 дүгээр зүйлийн 21.5, 21.6, 21.7, 21.8 дахь хэсгийг доор дурдсанаар өөрчлөн найруулсугай: Үндэсний зөвлөлийн гишүүнд нэр дэвшүүлж, санал болгохгүй.
-Монгол Улсын Үндсэн хуульд зааснаар Зөвлөлийг Монгол Улсын Ерөнхийлөгч тэргүүлж, хуралдааныг даргална. Зөвлөлийн хуралдааныг Ерөнхий сайдын санал болгосноор Монгол Улсын Ерөнхийлөгч зарлан хуралдуулах бөгөөд хэлэлцэх асуудлыг Ерөнхий сайд танилцуулна.
