“Magnificent 7” гэгддэг хамгийн том технологийн долоон компаниас “Microsoft”, “Meta platforms”, “Alphabet”, болон “Tesla” компани энэ долоо хоногт I улирлын тайлангаа танилцуулна. “Tesla” компанийн I улирлын борлуулалт таамагт хүрэхгүй байх төлөвтэй байгаа. Тэгвэл тус компани “Model Y”, “Model S” болон “Model X” загварын автомашиныхаа үнийг 2,000 ам.доллароор бууруулах шийдвэр гаргасан байна.
“Model Y” загварын үнэ АНУ-д 42.990 ам.доллар болсон нь спорт загварын автомашины хувьд хамгийн доод үнэ болов. Мөн “Model Y”-ийн өөр хоёр үнэтэй загварын үнийг ч 2000 ам.доллароор хямдруулж, “Model X”-ийн үнийг өмнө нь байгаагүй хамгийн хямд түвшинд хүргэсэн байна.
“Tesla” компани БНХАУ-ын зах зээлд ч үнээ бууруулсан бөгөөд шинэчлэгдсэн “Model 3”-ыг 245.900 юаниас 231.900 юань болгожээ. Өмнө нь тус компани дэлхийн хэмжээнд нийт ажилтныхаа 10 гаруй хувийг буюу 140 мянга гаруй ажилтнаа цомхотгож буйгаа мэдэгдсэн билээ.
Үүнтэй зэрэгцээд компанийн гүйцэтгэх захирал Илон Маск БНЭУ-д айлчилж, тус улсад “Starlink”, “Tesla”-ийн үйл ажиллагааг өргөжүүлэх, хөрөнгө оруулалтаа нэмэгдүүлэх талаар хэлэлцэх товтой байна. БНХАУ “Starlink”-ийн үйл ажиллагаанд хязгаарлалт тавиад байгаа энэ үед БНЭУ нь “Starlink”-ийн хамгийн том зах зээл болохоор байгаа юм. Харин БНЭУ-ын Ерөнхий сайд Нарендра Модигийн хувьд “Starlink”, “Tesla” компани улсад нь үйл ажиллагаагаа явуулбал автомашин үйлдвэрлэлийнх нь салбарт хөрөнгө оруулж, гадаадын хөрөнгө оруулалт татах, мөн хотуудыг нь дэлхийн томоохон хотын жишигт нийцүүлэн хөгжүүлэх боломж бүрдэнэ гэсэн хүлээлттэй байгаа аж.
Bloomberg tv Mongolia
