Өчигдөр буюу Баасан гарагт Европын Холбооны гишүүн орнууд Хятадын цахилгаан хөдөлгүүрт автомашинд импортын өндөр татвар оноох асуудлаар санал хураажээ.
Тус холбооны 27 гишүүн орны олонх хаалттай санал хураалтаар аравдугаар сарын 31-ний өдрөөс эхлэн таван жилийн хугацаанд хэрэгжих татварын хэмжээг дэмжсэн байна.
Европын Комисс “Импортын тариф тогтоох асуудлаар гишүүн орнуудаас шаардлагатай дэмжлэгийг авлаа” гэж санал хураалтын дараа мэдээлжээ.
Хятад улс ийм шийдвэр гарвал Европын Холбооны гишүүн улсуудын тус улсад нийлүүлдэг бараа бүтээгдэхүүний татварыг өсгөх зорилгоор хариу арга хэмжээ авч эхэлсэн юм.
“Хятад улс өөрийн компаниудын эрх ашгийг тууштай хамгаалахын тулд бүх арга хэмжээг авах болно. Европын Холбооны эцсийн шийдвэрийг БНХАУ хатуу эсэргүүцэх болно. Гэхдээ асуудлыг яриа хэлэлцээний замаар шийдвэрлэх Европын талын улс төрийн хүсэл сонирхлыг хүндэтгэж байна. БНХАУ болон Европын Холбооны төлөөлөгчид яриа хэлэлцээгээ аравдугаар сарын 7-ны өдөр үргэлжлүүлэх болно” гэж Хятадын худалдааны яам өчигдөр мэдэгджээ.
Өчигдрийн санал хураалтын дүнд Теслагийн автомашинд хамгийн бага буюу 7.8 хувийн импортын татвар оноохоор төлөвлөсөн байна.
Харин Европын Холбооны шударга өрсөлдөөний шалгалтад хамрагдахаас татгалзсан Хятадын төрийн өмчит SAIC Motor компанийн автомашинд хамгийн өндөр буюу 35.3 хувийн татвар оноохоор болжээ.
BYD компанийн бүтээгдэхүүнд 17 хувь, Geely компанийнхад 18.8 хувийн татвар оноохоор төлөвлөсөн байна.
Эдгээр нь Хятадаас Европын Холбооны зах зээлд нийлүүлэгддэг бүх цахилгаан хөдөлгүүрт автомашины 10 хувийн суурь татвар дээр нэмэгдэх юм.
Хятадын засгийн газрын татаас дэмжлэгийн үр дүнд маш хямд үнэтэй цахилгаан автомашинууд зах зээлд нь нийлүүлэгдэж, дотоодын үйлдвэрлэгчдийг хүнд байдалд оруулахаас Европын Холбооны эрх баригчид болгоомжилж байгаа.
Дээрх татвар нь дотоодын автомашин үйлдвэрлэгчдэд Хятадын компаниудтай тэнцүү өрсөлдөх боломж олгох зорилготой юм.
Уг асуудал Европын Холбооны гишүүн орнуудын дунд бас хагарал үүсгээд байгаа.
Тухайлбал Хятадын зах зээлд нийлүүлэгддэг өөрсдийн нь бараа бүтээгдэхүүний татвар өсөхөөс болгоомжилсон гишүүн орнууд үүнийг эсэргүүцэж байв.
Өчигдрийн санал хураалтад Европын Холбооны 27 гишүүний таван гишүүн эсэргүүцсэн нь Герман, Унгар, Мальт, Словени, Словак байсныг дипломат эх сурвалж мэдээлжээ.
Бусад гишүүн орнуудын 10 нь дэмжиж, 12 нь түдгэлзсэн байна. Гэхдээ дүрмийн дагуу түдгэлзсэн байр суурийг дэмжсэнд тооцох ажээ.
Европын Холбооны томоохон гишүүдээс Франц, Итали, Нидерланд, Польш улсууд Хятадын цахилгаан автомашинд өндөр татвар оноохыг дэмжсэн байна.
Харин Испани улс түдгэлзсэн байр суурь илэрхийлжээ.
Сүүн бүтээгдэхүүний салбар нь Хятадын хариу арга хэмжээнд хэлмэгдэж болзошгүй болсон Ирланд улс долдугаар сарын урьдчилсан санал хураалтад түдгэлзсэн байр суурь илэрхийлж байсан бол энэ удаа дэмжсэн байна.
Дээрх санал хураалтын үр дүнд Европын Комисс аравдугаар сарын 30-наас өмнө импортын татварыг хуульчлах эрхтэй болж байгаа юм.
Эх сурвалж: AFP
