Fitch: 2024-2027 онд Монгол Улс гадаад өрийн үйлчилгээнд жилд 975 сая ам.доллар зарцуулна
Монгол Улсын гадаад өр 2023 оны эцэст 34.6 тэрбум ам.доллар болж, өмнөх оноос 3.7 хувиар, өмнөх улирлаас 1.7 хувиар өссөн байна. Ийнхүү өсөхөд шууд хөрөнгө оруулалт, компани хоорондын зээллэг 1.6 тэрбум ам.доллароор, Төв банкнаас бусад хадгаламжийн байгууллагынх 203.4 тэрбум ам.доллароор өссөн нь гол нөлөө үзүүлжээ.
Харин Төв банкны гадаад өр 18 хувиар, бусад салбарынх 1.6 хувиар, Засгийн газрын өр нэг хувиар буурсныг Үндэсний статистикийн хороо тайлагналаа. Өнгөрсөн онд Монгол Улсын нийт гадаад өрийн 43 орчим хувийг шууд хөрөнгө оруулалт, компани хоорондын зээллэг, 23 хувийг Засгийн газрын өр, 5.2 хувийг Төв банкны өр бүрдүүлж байсан аж.
2023 оны эцсээр “Самурай” бондын 200 сая ам.долларын өрийг төлж барагдуулсан юм. 2012 оноос хойш Монгол Улсын Засгийн газар 12 бонд гаргасан бөгөөд 2021-2023 оны 12 дугаар сар хүртэлх хугацаанд 13.3 их наяд төгрөгийг гадаад өрийн үндсэн төлбөр болон хүүгийн төлбөрт төлжээ.
Ирэх онуудад “Nomad”, “Century 1, 2” зэрэг бондуудын төлөлтүүдийг хийхээр байна. 2024-2027 онд Монгол Улс гадаад өрийн үйлчилгээнд жилд дунджаар 975 сая ам.доллар төлөхөөр байна гэж “Fitch Ratings” тооцоолоод байгаа юм.
Хамгийн идэвхтэй арилжигдаж буй “Nomad” болон “Century 3” бондын өгөөж тогтвортой хэвээр байна.
Монгол Улсын гол макро үзүүлэлтүүдийг харвал гадаад худалдаа төлбөрийн тэнцэл ашигтай, гадаад валютын нөөц өссөн хэвээр байна.
