Өмнөд Солонгосын тусгай прокурорын баг ерөнхийлөгч асан Юн Сок Ёлийг өнгөрсөн жил цэргийн дэглэм тогтоох оролдлоготой холбоотой эрх мэдлээ урвуулан ашигласан болон дайсанд тусалсан гэх шинэ хэрэгт яллагдагчаар татжээ.
Тодруулбал Юн Өмнөд болон Умард Солонгосын хооронд мөргөлдөөн өдөөж, цэргийн дэглэм тогтоохыг оролдсон бөгөөд үүнийг нэгэн цэргийн албан хаагчийн гар утсанд үлдсэн зурвасаас тодорхой болгосон гэв.
Прокурорын мэдэгдэлд дурдсанаар ерөнхийлөгч асан Юн тухайн үеийн Батлан хамгаалахын сайд болон Цэргийн тагнуулын газрын дарга асан нарын хамт Умардаас Өмнөд рүү халдлага хийлгэх өдөөн хатгалгын төлөвлөгөөг боловсруулсан.
Улсын хэмжээнд үймээн самуун, хурцадмал байдал үүсгэж Юн цэргийн дэглэм зарлах нөхцөлийг бүрдүүлэхийг зорьсон гэж тайлбарлажээ.
Тусгай прокурорын баг Юн болон түүний командлагч нарыг Умард Солонгос руу нууцаар дрон илгээж, хоёр улсын харилцаанд хурцадмал байдал үүсгэх улмаар цэргийн дэглэмийн шийдвэрээ зөвтгөх зорилготой байсан гэж үзэж байна.
Өнгөрсөн оны аравдугаар сард Умард Солонгос Өмнөдийг ухуулгын хуудас цацсан дрон илгээсэн гэж буруутгаж, унасан дроны үлдэгдлийн зургуудыг нийтэлсэн. Харин Сөүл тухайн үед дроны ажиллагаа явуулсан эсэхээ нууцалсан юм.
Юн болон Ким нар цэргийн дэглэмийг улсын ашиг сонирхолд харшлах зорилгоор тогтоогоогүй гэж мэдэгдсэн бол Ё “Юний тушаалыг эсэргүүцэж чадаагүйдээ харамсаж байна” хэмээн хэвлэлд ярьжээ.
Эх сурвалж: Reuters
