14 давхар орон сууцны гадна хананд ажиллаж байхдаа хамгаалалтын бүс нь тасарч, агаарт дүүжлэгдэн амь нас нь дээсэн дөрөөн дээр байсан ажилтныг ямар ч эргэлзээгүйгээр гүйж очин, нүцгэн гараараа аварсан Монгол ажилтны бахархам түүх бүтэн жилийн дараа олны хүртээл болжээ.
Yonhap News агентлагийн мэдээлснээр уг хэрэг өнгөрсөн оны арваннэгдүгээр сарын 14-нд БНСУ-ын Чүннам мужийн Дангжин хотын нэгэн орон сууцны хороололд болжээ.
Тухайн үед барилгын гадна хананд ажиллаж байсан А гэх эрэгтэйн хамгаалалтын бүс тасарч, 14 давхрын өндөрт унах аюултайгЯг тэр мөчид эсрэг талын орон сууцанд нүүлгэлтийн ажил хийж байсан Монгол Улсын иргэн Батбаяр Занданбаатар (БНСУ-д 7 дахь жилдээ ажиллаж байгаа) тусламж эрсэн хүний орилох дууг сонсжээ.
Гадна хананд дүүжлэгдсэн эрэгтэй “Намайг авраач” хэмээн хашхирч байхыг харсан Занданбаатар ажлаа тэр даруй зогсоож, ямар ч эргэлзээгүйгээр ослын газар руу гүйсэн байна.
Тэрээр зөвхөн 119 буюу түргэн тусламж, аврах албанд дуудлага өгөхөөр хязгаарлагдсангүй. Харин өөрөө хэрхэн аврах боломжтойг хайж эхэлжээ.
Занданбаатар 14 давхрын тухайн айл руу гүйн очиж, хаалгыг нь удаа дараа тогшин тусламж хүссэн байна. Гэрийн эзэн хаалгаа нээмэгц тэр даруй тагтны хашлага даван биеэ сунгаж, дүүжлэгдсэн ажилтныг барьж авчээ.
Аврах ажиллагаа маш аюултай байв. А гэх ажилтан нэг гараараа агааржуулагчийн гадна төхөөрөмжөөс зуурсан байсан тул хангалттай хүч гаргаж чадахгүй, айсандаа биеэ тогтоон барих чадвараа ч алдсан байжээ.
Насанд хүрсэн хүний бүх жинг өндөрт тогтоон барих шаардлагатай байсан тул гар нь хальтрах төдийд л тэр хүн шууд унах аюултай байв.
Занданбаатар айж сандарсан ажилтныг тайвшруулахын тулд солонгос хэлээр чадлынхаа хэрээр ярьж байжээ.
Тэрээр “Надад итгээрэй. Би таныг заавал барьж аваад дээш нь татаж гаргана” хэмээн дахин дахин хэлж, бүх хүчээ дайчлан түүнийг тагтны дотор талд татаж гаргаж чадсан байна.
Ослоос долоо хоногийн дараа хоёр эрэгтэй дахин уулзаж, нулимс дуслуулан талархлаа илэрхийлжээ. Амь насаа эрсдэлд оруулан өөрийг нь аварсан Занданбаатарт А ажилтан дахин дахин баярласнаа илэрхийлсэн байна.
Түүний ажилладаг нүүлгэлтийн компанийн захирал “Энгийн хүн байсан бол 119 рүү залгаад л харж зогсох байсан байх. Харин тэр хүн дүүжлэгдэж байгааг харангуутаа ажлаа орхиод шууд гүйж очсон. Манай залуу угаасаа хамт олонтойгоо эвтэй, үргэлж санаачилгатай ажилладаг хүн” хэмээн ярьжээ.
Занданбаатар тухайн үеийг дурсахдаа “Би хурдан туслахгүй бол тэр хүн үнэхээр уначих юм шиг санагдаад гүйсэн. Солонгос хүн байна уу, Монгол хүн байна уу гэдэг огт хамаагүй. Хүний амь нас аюулд орсон байвал тэр мөчид дахин очсон ч яг адилхан үйлдэл хийх байсан” хэмээн даруухан ярьсан байна.
Монгол хүний зориг, хүн чанар, нинжин сэтгэлийн бахархам жишээ!
Хүний амь нас, үндэс угсаа, хил хязгаараас илүү үнэ цэнтэй гэдгийг үйлдлээрээ харуулсан Занданбаатартаа Монгол түмний нэрийн өмнөөс баярлалаа гэж хэлмээр байна.
📸 Эх сурвалж: Yonhap News агентлаг / 연합뉴스
