Индонез, Тайландын зах зээлд амжилттай нэвтэрсэн туршлага дээрээ үндэслэн Монгол улсад үйл ажиллагаагаа нээхээр төлөвлөж буйг Өмнөд Солонгосын хамгийн том интернэт банк KakaoBank-ийн гүйцэтгэх захирал Юн Хо Ён өчигдөр мэдэгджээ.
Лхагва гарагт Сөүл хотод болсон хэвлэлийн хурлын үеэр тэр “Монгол улс нь Солонгост туршигдаж, батлагдсан КакаоБанкны хүртээмжтэй санхүүгийн загварыг дэлхий даяар нэвтрүүлэхэд чухал алхам болох юм. Бид Индонез, Тайландад олсон амжилтаа дэлхийн дахинд үйл ажиллагаагаа өргөжүүлэхдээ тулгуур болгон ашиглах болно” гэж хэлсэн байна.
Тус банк өөрийн хөгжүүлсэн “KakaoBank Score” зээлийн онооны системээ Монголын санхүүгийн байгууллагад шилжүүлэхээр төлөвлөжээ.
KakaoBank анхны гадаад хөрөнгө оруулалтаа Индонез улсад хэрэгжүүлсэн нь Superbank юм. Тус банк 2025 оны арванхоёрдугаар сард Индонезын Хөрөнгийн Биржээр хувьцаагаа гаргаснаас хойш хурдтай өсөж, зах зээлийнхээ тэргүүлэгч болжээ.
Тайландад ирэх оны эхний хагаст интернэт банкны үйлчилгээг тус улсын SCB X Public Company Limited компанитай хамтран байгуулсан Bank X компаниар дамжуулан нээхээр ажиллаж байгаа юм байна.
Юн Хо Ён хэлсэн үгэндээ KakaoBank бас Өмнөд Солонгос дахь гадаадын иргэдийн банк, санхүүгийн хэрэгцээг хангахаар ажиллаж байгаа талаар дурджээ.
“Дэлхий дахины тэлэлт алс холоос эхэлдэггүй. Гадаадын хэрэглэгчид бидний эргэн тойронд байна. Удаан хугацаагаар оршин суугчид, гадаадын иргэд болон гадаадад байгаа солонгосчууд гээд нийт 20 сая гаруй хүн манай боломжит үйлчлүүлэгчид юм” гэж тэр хэлсэн байна.
KakaoBank энэ онд гадаадын иргэдэд зориулсан хугацаатай хадгаламж, дэбит карт зэрэг үйлчилгээнүүд нэвтрүүлэх бөгөөд хэлний саад бэрхшээлийг арилгахын тулд аппликэйшндээ хиймэл оюунд суурилсан бодит цагийн горимд ажилладаг орчуулгын системүүдийг нэвтрүүлэхээр төлөвлөжээ.
Тус банк хиймэл оюуны технологийг стратегийнхаа цөм болгож, 27 сая орчим хэрэглэгчийнхээ ашигладаг гар утасны аппликэйшнийг санхүүгээр мэргэшсэн хэлний загвартай холбохоор ажиллаж байгаа гэнэ.
“Хэрэглэгчид нарийн төвөгтэй цэсээр үйлчилгээ хайхын оронд чатбот системээр дамжуулан хүсэлтээ хялбархан ойлгуулж, үйлчилгээгээ хурдан авдаг болно” гэж Юн Ё Хон энэ талаар тайлбарлажээ.
Эх сурвалж: Korea Times
