УИХ-ын гишүүн, БОУАӨ-ийн сайд, ИЗНН-ын дарга Батын Батбаатарыг тус намын Тэргүүн дэд дарга С.Батбаатар АТГ-д хандан шалгуулахаар гомдол гаргаж байгаа ажээ.
Тэрбээр гомдолдоо БОУАӨ-ийн сайд Б.Батбаатар нь эрх мэдэл, албан тушаалаа урвуулан ашигласан, төсвийн мөнгийг хуульд заасан зориулалтын дагуу захиран зарцуулаагүй, өөртөө болон бусдад давуу байдал үүсгэсэн, Төрийн хэмнэлтийн хууль, Авлигын эсрэг хуулийг ноцтой зөрчсөн тухай үндэслэл бүхий холбогдох баримтуудыг хамтад нь хүргүүлэхээр болжээ.
Түүнчлэн Монгол улсад 2026 оны 8 сард зохион байгуулагдах Цөлжилттэй тэмцэх тухай НҮБ-ийн конвенцийн 17-р бага хурал буюу СОР17 хурлын бэлтгэл ажлыг хангах хүрээнд БОУАӨ-ийн сайд Б.Батбаатар нь гадаад улс орнуудад зорчихдоо Төрийн хэмнэлтийн хуулийг ноцтой зөрчиж, төрийн албан хаагч бус хамааралгүй хүмүүсийг дагуулж явдаг, үргэлж бизнес ангилалын суудлаар зорчдог, зохион байгуулагч буюу уригч улс орнууд замын зардлыг нь төлсөн атал нэмж төсвөөс зардал гаргуулдаг, тухайн улсын арга хэмжээнд очихдоо хэвлэн тараах материал, үзүүлэн таниулах бичлэг, уулзалт зохион байгуулах зардал, унаа машины түрээс нэрээр их хэмжээний зардал төлөвлөж тодорхойгүй байдлаар зарцуулж ирсэн зэргийг шалгуулахаар ханджээ.
