Евразийн эдийн засгийн холбоотой байгуулах Чөлөөт худалдааны түр хэлэлцээрт гарын үсэг зурсныг ЭЗХЯ мэдээллээ. Ингэснээр тус холбооны гишүүн орнуудтай гурван жилийн хугацаанд нийт 367 нэр төрлийн бараа бүтээгдэхүүнийг гаалийн татвараас харилцан хөнгөлж, чөлөөлөхөөр болж байна.
Хэлэлцээрийн хүрээнд өмнө нь 15-50 хувийн татвар төлдөг байсан 29 төрлийн мах махан бүтээгдэхүүн, арьс шир, ноос ноолуурын 200 гаруй бүтээгдэхүүн, хөдөө аж ахуйн гаралтай 65 төрлийн барааг Евразийн зах зээлд татваргүйгээр экспортлох боломж бүрдэхийг салбарын яам мэдээлсэн.
Монголын талаас улаанбуудайн импортод 50 мянган тонны квот тогтоож, 3.75 хувийн татвар ногдуулна. Өндөгний хувьд 90 сая ширхэг хүртэл 7.5 хувийн татвар, түүнээс дээш импортлох тохиолдолд 15 хувийн татвар төлөх юм. Түүнчлэн бяслаг, цөцгийн тосны тарифыг бууруулж, 7.5 хувиар тогтоосон бол хуурай сүүний тарифыг 1500 тонн хүртэл тэглэжээ. Үүнээс гадна дизель түлш, керосин, тослох материалын 5 хувийн тарифыг тэглэх юм байна.
Хэлэлцээрийн үр дүнд хөдөө аж ахуйн салбарын экспорт 4 орчим хувиар өсөх ч нөгөө талд импорт 5 орчим хувиар нэмэгдэх тооцоолол гарсныг МУИС-ийн судлаачид танилцуулсан. Тэр дундаа аж үйлдвэрийн салбарын импорт 118 хувиар огцом өсөх тул дотоодын аж үйлдвэрийн салбарын үйлдвэрлэл 17.9 хувиар буурах, ХАА-н салбарын үйлдвэрлэл 4.3 хувиар агших эрсдэлтэйг онцолж байсан юм.
Эх сурвалж: Bloomberg tv mongolia
