Монголын эрүүл мэндийн ажилтны Үйлдвэрчний эвлэлийн холбооноос эрүүл мэндийн салбарын эмч, ажилтнуудын цалин хөлс нэмэгдүүлэх асуудалд төр, засгийн зүгээс үл тоомсорлосон хандлага гаргаж буйтай холбоотойгоор мэдээлж байна.
Тэд хэлэхдээ, “Эрүүл мэндийн салбарынхан ажил хаяж чадахгүй гэж бодвол эндүүрэл шүү. Цалинг ₮3.5 сая болго.
Төр төмөр нүүрээ эрүүл мэндийн салбартаа харуулж байна” гэв.
Өнгөрсөн тав дахь өдөр Чинбүрэн сайд уулзаж, тодорхой шийдвэр гаргах болов уу гэсэн боловч таван цаг хүлээлгээд ирээгүй.
Гэвч УИХ-ын гишүүд эрүүл мэндийн салбарын ажилтнуудын цалинг нэмүүлэх зарчмын зөрүүтэй санал гаргасан. Гэвч олны өмнө цалин нэмэх ёстой гэж ярьж байсан УИХ-ын гишүүд зарчмын зөрүүтэй санал гаргахад эл асуудлыг унагаах санал гаргалаа.
Нүүрэн дээрээ хамт байгаа шүү гэж хэлсэн УИХ-ын гишүүд санал хураахад эсрэг кноп дарж байгааг нэг биш удаа харлаа. УИХ-ын гишүүдэд найдалтгүй юм байна.
Монгол Улсын Ерөнхийлөгч та эрүүл мэндийн энхийн манаад зогсож буй ажилтнуудаа ажил хаяхаас нь өмнө энэ асуудлыг шийдэж өгөөч.
Өнөөдөр бид МУ-ын Ерөнхийлөгчид өргөх бичиг барина.
Ажил хаялтаас гарах үр дагавар хэмжээлшгүй. Хэрэв ажил хаявал, үүнээс гарах үр дагаврыг ажил олгогч та хариуцна шүү гэдгийг сануулъя.
Бид хүссэн үр дүндээ хүрэхээс нааш энэ үйл ажиллагаагаа зогсоохгүй гэдгийг мэдэгдье.
УИХ-ын гишүүд ямар ажил хийх ёстойгоо мэддэггүй юм байна. Та бүхэн барилга, зам, сургууль барих гэж ажиллаагүй шүү. Та бүхэн бүгдэд ээлтэй хууль тогтоомж гаргах ёстой.
Тэр бариад буй барилга байшинд чинь ажиллах хүн алга байна. Эрүүл мэндийн салбарынхан тэр чигээрээ бүгд өргөдлөө өгөхөд бэлэн байгааг ойлгооч.
Эрүүл мэндийн ажилтны цалин хөлсийг нэмэгдүүлэх тэмцлийг улс төржүүлэхийг тэвчихгүй. Ажилтнуудыг боймлохыг тэвчихгүй шүү. Жишээ нь, ажил хаялт хийсэн эмнэлгийг хамгийн түрүүнд хяналт шалгалт хийнэ гэж сүрдүүлж байна.
Бидэнд гуравхан хоногийн хугацаа байна. Бидний тэмцэлд ЗГ анхаарлаа хандуулж төсөв батлаач гэж хүсэж байна.
Бидний хамгийн сүүлийн итгэл найдвар бол Ерөнхийлөгч. Тиймээс бид өргөх бичиг барих гэж байгаа юм” гэв.
