Засгийн газрын хуралдаанаас гарсан шийдвэрийг танилцуулж байна.
Засгийн газрын Хэрэг эрхлэх газрын дарга С.Бямбацогт, “Өнөөдрийн Засгийн газрын хуралдаанаар нэг чухал шийдвэр гаргалаа. Энэ нь Төрийн болон албаны нууцын тухай хуульд нэмэлт, өөрчлөлт оруулах, мөн Төрийн нууцын жагсаалтыг батлах тухай хуулийн үзэл баримтлалыг хэлэлцэн шийдвэрлэсэн тухай юм.
Монгол Улсын Ерөнхий сайд Г.Занданшатарын Засгийн газрын баримталж буй гол зарчмын нэг бол иргэдэд ил тод, нээлттэй байх. Энэ бодлогын хүрээнд “Нээлттэй төр, нээлттэй засаг” хөтөлбөрийг хэрэгжүүлж байна. Сүүлийн жилүүдэд төрийн болон албаны нууцад хамаарч байсан гэрээ, тогтоолуудыг нээлттэй болгож байгаа. Тухайлбал,
-
2010-2025 оны хооронд буюу 16 жилийн хугацаанд ЭТТ компанийн байгуулсан 581 нүүрсний гэрээг ил болгосон,
-
Оюу толгойн холбогдох гэрээ, тогтоолуудыг үе шаттайгаар нээлттэй болгож байна,
-
Олон улсын төмөр зам, хил холболтын гэрээ хэлэлцээрүүдийг мөн ил тод болгох ажлыг зохион байгуулж байна.
-
Бидний зорилго бол аль болох иргэдэд нээлттэй, ил тод байх. Ил тод байвал хулгай нүүрлэхгүй, хулгай үүрлэхгүй.
Энэ хүрээнд Төрийн болон албаны нууцын тухай хуулийг шинэчилж, төрийн нууцын жагсаалтыг УИХ-аар батлуулах хуулийн төслийг өргөн барихаар боллоо.
-
Монгол Улсын үндэсний аюулгүй байдал, үндэсний эрх ашигт хамаарах асуудал л төрийн нууц байх ёстой.
-
Харин иргэн бүрийн хувийн мэдээлэл мөн хуулиар хамгаалагдана.
-
Үүнээс бусад бүх нууцлал ил тод байх ёстой.
Өмнө нь төрийн албаны нууцаар халхавчлан хууль бус үйлдлээ нуун дарагдуулж, томоохон гэрээ хэлцлийг далд хийдэг явдал газар авсан. Жишээ нь,
-
Нүүрс, эрдэс баялагтай холбоотой гэрээнүүд,
-
Томоохон хөрөнгө оруулалтын гэрээнүүд,
-
Барилга, тоног төхөөрөмж худалдан авах өндөр дүнтэй гэрээнүүд,
-
Тендер, төсөл хөтөлбөрүүдийг Тагнуулын байгууллагад бүртгүүлж нууцалдаг жишиг тогтсон байв.
-
Энэ бүхнийг өмнөх адил нууцлах боломжгүй болгоно.
Өнөөдрийн байдлаар Засгийн газрын 574 тогтоолоор тодорхой асуудлуудыг нууцалсан байгаа. Үүнийг бид нээлттэй болгоно.
Мөн төрийн байгууллагууд өөрсдөө “албаны нууцын жагсаалт” гаргаж баталдаг, түүнийхээ ард нуугдаж иргэд, сэтгүүлч, УИХ-ын гишүүдийн мэдээлэл авах эрхийг хязгаарладаг явдлыг зогсооно.
-
Албаны нууц гэсэн ойлголтыг хална.
-
Нууц байх цорын ганц үндэслэл бол үндэсний аюулгүй байдал.
Одоогоор төрийн 59 байгууллагад 882 мэдээлэл албаны нууц нэрээр бүртгэгдсэн байна. Энэ хууль батлагдсанаар эдгээр мэдээлэл ил болно. Цаашид,
-
Төрийн нууцын жагсаалтыг зөвхөн УИХ батална
-
Яам, Засаг дарга, агентлаг, албан тушаалтнууд дур мэдэн нууц тогтоох эрхгүй болно
-
Хууль зөрчсөн, ашиг сонирхол шингэсэн, авлигын шинжтэй мэдээллийг нууцын нэрээр халхавчлах боломжгүй болно
Иргэдийн мэдэх эрх хангагдахгүй бол авлигатай тэмцэнэ гэж байхгүй. Ил тод, шилэн байх нь авлигын эсрэг хамгийн том дархлаа юм.
Тиймээс төр засаг ард түмнээсээ нуух зүйлгүй байх ёстой гэсэн зарчмыг баримталж, энэхүү хуулийн нэмэлт өөрчлөлтийг Засгийн газар батлан, УИХ-д өргөн мэдүүлэхээр болсныг мэдэгдэж байна” гэв.
