ЗГХЭГ-ын дарга С.Бямбацогт Төрийн ордонд сэтгүүлчдийн асуултад хариулав.
-П.Наранбаяр, Б.Чойжилсүрэн сайд нар ажлаа өгөхөөр өргөдлөө өгсөн гэсэн мэдээллийг би хэвлэлээс харлаа. Нэгэнт өргөдлөө өгсөн бол Ерөнхий сайд цаг алдалгүйгээр дараагийн асуудлыг оруулж ирэх байх.
Энэ бол өөрт нь олгогдсон бүрэн эрх.
Засгийн газрын тухай хуульд зааснаар сайдад нэр дэвшигчийг Ерөнхийлөгч, УИХ-д танилцуулна. Дараагийн сайд нарын асуудал яригдаагүй байна. Үүний тулд Засгийн газартай хамтарч буй ХҮН-тай зөвшилцөнө. МАН-ын Удирдах зөвлөл, намын бүлэгт мөн танилцуулна.
УИХ-ын дарга намын даргыг хавсарсан тохиолдлууд олон. Үүнээс болж асуудал үүсээд ажил гацан, ард түмний эрх ашиг хохироогүй. Тийм зүйл байхгүй гэж бодож байна. УИХ дахь АН-ын бүлэг Н.Учрал намын даргаа өг гэсэн нь ажлаа хийхгүй байх шалтгаан биш шалтаг юм. АН дотроо асуудал ихтэй байна. Үүнийгээ шийдэхэд цаг хугацаа хэрэгтэй юм болов уу. УИХ-ын үйл ажиллагааг саатуулах нь АН-д ашигтай юм болов уу?
УИХ-ын дарга намын даргаар ажилласан жишиг өмнө нь байсан. Энэ нь УИХ-ын үйл ажиллагаанд сөргөөр нөлөөлөхгүй. Намын дарга УИХ-ыг даргалж болно. Болохгүй гэсэн хууль байхгүй.
Өнөөдрийн бүлгийн хуралдаанаар УИХ-ын тухай, УИХ-ын чуулганы хуралдааны тухай дэгийн тухай хууль, УИХ-ын хяналт шалгалтын тухай хуулийн төслийг хэлэлцэв.
УИХ-ын үйл ажиллагааг зохицуулсан хуулиудад тодорхой цоорхой, сул тал, хийдэл, зөрчил, давхардал байсныг бид харсан. Энэ бүгдийг яаралтай засаж сайжруулъя. Ингэснээр УИХ улам чамбайрна. Гишүүд ажилдаа хариуцлагатай ханддаг болно. Тухайлбал гишүүд ирцээ бүртгүүлчхээд гараад явдаг, хурал тасалдаг. Ирцэд орсон тул эсрэг санал өгсөнд тооцогддог. Эс үйлдлээрээ хурал тасалдаг. Парламентын үйл ажиллагааг саатуулдаг.
Ажлын хэсэгт орсон ч хуралдаа суудаггүй. Тайлан тавих болохоор маш олон ажлын хэсэгт орж ажилласан гээд, ажил хэрэгч мэт харагддаг. Иймэрхүү асуудлууд бий. Ажлын хэсгийн хуралдаа суугаагүй бол гаргадаг байя. Төрийн байгуулалтын, Төсвийн байнгын хороонд орно гэж бөөн юм болдог. Тэгсэн атлаа хуралдаа суудаггүй.
Хууль санаачлах болохоор баахан хүн нэрээ бичүүлдэг. Бодит байдал дээр өөрийнхөө санаачилсан хуулийн эсрэг асуулт асууж “попордог”. Энэ алдаануудыг засна. Өнөөдрийн бүлгийн хурлаар Ерөнхийлөгчийн санаачилсан хуулийг яриагүй. Энэ хуулийн төслийг хэлэлцэх, эсэхийг хэлэлцэх цагт бүлэг нэгдсэн байр суурьтай байна.
Барилга, хот байгуулалтын сайд Э.Бат-Амгалан хууль зөрчсөн, эсэхийг хуулийн байгууллага тогтооно. Хэвлэлд гарсан мэдээ бүрийн араас явж, юм ярих нь зохимжгүй. Мөнгө тараасан нь хууль зөрчсөн үү гэдгийг Үндэсний аудитын газар шалгана.Санхүүгийн хариуцлага алдсан уу гэдгийг эхлээд тогтооно.
Дэд сайдуудын тухайд хуульд Засгийн газар дэд сайдтай байна гэж заасан. Засгийн газар хууль биелүүлэх үүрэгтэй. УИХ эхлээд энэ хуулийн зохицуулалтыг шийдэх хэрэгтэй. 16 дэд сайд гэхээс илүүтэй Засгийн газрын бүтэц, бүрэлдэхүүн илүү бүтээмжтэй, гүйцэтгэл өндөр болгоход чиглэсэн.
Бид ажлын хэсэг байгуулан, би ахалж үүнийг судалж байна. АН-д энэ талаар мэдээлнэ.
