Иргэд өнөөдөр /2025.12.22/ Төрийн ордны зүүн хаалган дээр жагсаж, УИХ дахь Ардчилсан нам, УИХ дахь МАН-ын бүлгүүдэд шаардлага хүргүүллээ.
Уг шаардлагад “Засгийн газар дарга нарынхаа тоог нэмж, сайд нар нь шинэ жил хэсэж, хундага тулгаж байгаа энэ өдрүүдэд орон даяар бензин шатахуунгүй, олон иргэд хөдөө гадаа явах, эрүүл мэндийн тусламж үйлчилгээ авах боломжгүй болж, зарим тохиолдолд иргэд 24-72 цаг дугаарлаж байгаа ч шатахуун авч чадахгүй ШТС-ын гаднаас буцаж, стратегийн салбарынхан хэвийн үйл ажиллагаа явуулахад хүндрэлтэй нөхцөл байдал үүссэн. Иймд салбар хариуцсан сайдыг огцруулах.
Монголбанкнаас инфляци 8.2 хувь гэж байгаа ч бодит байдал дээр үүнээс ч өндөр байна. Иймд төгрөгийн ханшийг чангаруулах, инфляцийг бууруулах, үнэн бодитой тооцоо судалгааг олон нийтэд мэдээлэхийг шаардаж байна.
2025 оны төсвийн орлого 2 их наяд төгрөгөөр тасарч, төлөвлөсөн хөрөнгө оруулалт хугацаандаа хийгдэхгүйгээс аж ахуй нэгжүүд гүйцэтгэлийн төлбөр авч чадахгүй, дансаа хаалгаж байна. Он гарснаас хойш 200 гаруй том аж ахуй нэгжүүд хаалгаа барьжээ. Иймд татварын дарамтыг бууруулж, эдийн засгийн өсөлтийг тэтгэх, аж ахуй нэгжийг дэмжих бус хааж боож байгаа Г.Занданшатарын Засгийн газрын үйл ажиллагааны хэрэгжилтэд дүн тавьж, нэн даруй огцруулахыг шаардаж байна. Нийгэм эдийн засгийн нөхцөл байдал нэн хүнд байгаа цаг үед төрийн данхгар бүтцийг цомхотгож, дэд сайд нарыг буцаан татахыг шаардахын зэрэгцээ бодлого шийдэлгүй, чадамжгүй Засгийн газрыг нэн даруй огцруулахыг шаардаж байна.
Хэрвээ бидний шаардлагыг эс хүлээн авч, нийгэм эдийн засгийн нөхцөл байдлыг ойрын 14 хугацаанд бодитой сэргээхгүй бол тэмцлийн дараагийн хэлбэрт шилжинэ” гэлээ. Мөн УИХ дахь Ардчилсан намын бүлгийг сөрөг хүчний ажлаа сайн хийж Засгийн газарт шаардлага тавих ёстойг санууллаа.
