Байгуулагдаад зургаан сар болж байгаа Г.Занданшатарын танхим огцорч болзошгүй нь. Тодруулбал, Засгийн газрын ээлжит хуралдаанаар өчигдөр дараах 16 дэд сайдыг томилсон юм.
Дээрх томилгоотой холбоотойгоор УИХ дахь Ардчилсан намын бүлэг өчигдөр ээлжит бусаар хуралдсан бөгөөд эрх баригчийг эл асуудлаа эргэн харж, төрийн бүтцээ цомхотгохгүй бол Засгийн газрыг огцруулах саналыг УИХ-д өргөн мэдүүлэхээ мэдэгдэв.
Энэ талаар УИХ дахь Ардчилсан намын бүлгийн дарга О.Цогтгэрэл “Татвар төлөгч аж ахуйн нэгжүүд хүнд байдалд орсон. Эхнээсээ дампуурлаа зарлаж байна. Хувийн хэвшлүүд хүнд нөхцөлд , Төрийн хэмнэлтийн тухай хууль хүчин төгөлдөр үйлчилж байхад Монгол Улсын Засгийн газраас дэд сайд нарыг томилж, нийт 40 сайдтай болж байна. Үүнийгээ тайлбарлахдаа бүтээмж болон хяналтын менежерийг цомхотгосон гэж худлаа ярьж байна. Тэднийг бүгдийг цомхотгох ёстой. Хуульд заасан 8-9 хувийн цомхотголоо ч хийх ёстой” гэж мэдэгдсэн юм.
Нүүрсний үнийн уналтаас болж, 2025 оны төсвийн орлого төлөвлөснөөс 2 их наяд төгрөгөөр тасраад байгаа бөгөөд төрийн албан хаагчдын цалинг чүү ай тавьж байгаа. Дээр нь татвараа төлж чадахгүй дансаа хаалгасан аж ахуй нэгжүүдийн тоо өдрөөс өдөрт өсөн нэмэгдсээр 20 мянга давсан.
Ийн эдийн засгийн нөхцөл байдал хүндэрч, бараа бүтээгдэхүүний үнэ ханш өсч, шатахуун тасарч хот хөдөөгүй явгарч мэдэх хүнд нөхцөлд ард иргэд нь амьдрах гэж ядаж явахад Засгийн газар дэд сайд нарыг томилсон нь цаг хугацааны хувьд хамгийн мэдрэмжгүй шийдвэр боллоо.
Хэдийгээр Засгийн газар энэхүү шийдвэрээ зөвтгөх арга саам хайж тайлбар хийж байгаа ч шатахуун олж авахаар шөнөжин дугаарлаж нойргүй хонож буй ард олны уур хилэнг зөөлрүүлж чадахгүй байна.
Ийм байхад сөрөг хүчин шаардлагаа тавих нь зүйн хэрэг биз.
УИХ дахь Ардчилсан намын бүлэг 42 гишүүнтэй. Тэгэхээр УИХ дахь Ардчилсан намын бүлэг огцруулах санал гаргаж, УИХ дахь МАН-ын бүлгийн 30 гишүүн дэмжвэл Г.Занданшатарын танхим тэсэж үлдэх аргагүй болно.
