Төв банк ирэх оны эдийн засгийг ингэж төсөөлжээ.
Төлбөрийн тэнцлийн цаашдын төлөв нь эрдэс бүтээгдэхүүний үнэ, улс орнуудын тарифын бодлого, худалдааны түнш орнуудын эдийн засгийн нөхцөл байдлаас ихээхэн хамаарна гэдгийг Төв банкны тэргүүн Б.Лхагвасүрэн хэлэв.
“Манай улсын худалдааны гол түнш БНХАУ-ын эдийн засгийн өсөлт цаашид саарах хүлээлттэй байна. Иймээс нүүрс, төмрийн хүдэр зэрэг эрдэс бүтээгдэхүүний үнийн төлөв өөдрөг биш байна. Экспортын орлого буурч буй энэ үед макро бодлогын оновчтой хослол хэрэгжүүлж, урсгал тэнцлийн алдагдлыг бууруулах нь нэн чухал. Түүнчлэн аливаа томоохон бүтээн байгуулалтын төслүүдийг гадаад валютын нөөцөд нэмэлт ачаалал үүсгэхгүйгээр хэрэгжүүлэх нь чухал байна” гэсэн.
Сүүлийн жилүүдэд нэмэгдээд буй геополитикийн хүндрэлүүдээс үүдэн гадаад эрэлт саарах, экспортын гол түүхий эдийн үнэ хүлээлтээс хурдтай буурах зэрэг нь манай улсын экспортын орлого, валютын дотогшлох урсгалд сөргөөр нөлөөлж болзошгүй гэдгийг Б.Лхагвасүрэн ерөнхийлөгч танилцуулгадаа тэмдэглэлээ.
Түүнчлэн, нефтийн нийлүүлэлт саатах, цаг агаарын нөхцөл муудан өвөлжилт хүндрэх, өвлийн улиралд эрчим хүч тасалдах зэрэг нь инфляцыг нэмэгдүүлж, эдийн засгийн идэвхжилийг сааруулах эрсдэлтэй байгаа аж.
Ийнхүү гадаад, дотоод эрсдэл, тодорхой бус байдал өндөр байгаа ч Монголбанк ирэх жил инфляцыг 6 +/-2 нэгж хувийн интервалд тогтворжуулж, 2027 оноос зорилтын голчийг таван хувь болгож бууруулахаар төсөөлжээ.
Үүнийг амжилттай хэрэгжүүлэхэд Засгийн газрын дэмжлэг, төсвийн мөчлөг сөрсөн бодлого голлох үүрэгтэй гэв.
