2025 оны “Toyota 4Runner” загвар хосолмол хөдөлгүүрийн сонголттой гарна
“Toyota Motor” компани “4Runner” автомашиныхаа 2025 оны шинэ загварыг танилцууллаа. “4Runner” нь тус компанийн дунд оврын SUV загваруудаас борлуулалтаараа тэргүүлдэг ч бүрэн шинэчлэгдээгүй 15 жил болоод байсан юм.
2025 оны “Toyota 4Runner”-ийн хамгийн сүүлийн үеийн хүчирхэг хөдөлгүүрийн технологи, их биеийн дизайн, өмнөхөөсөө эрс сайжирсан хянах самбарын интерфейс нь хэрэглэгчид болон салбарын экспертүүдийн анхаарлыг татаж байна.
Хөдөлгүүрийн хувьд “4Runner” анх удаа хосолмол хөдөлгүүрийн сонголттой гарч байгаа аж. Тодруулбал: хосолмол хувилбар нь 2.4 литрийн багтаамжтай, 326 морины хүчтэй турбо хөдөлгүүр болон 48 морины хүчтэй цахилгаан хөдөлгүүрээр тоноглогджээ.
Үүнээс гадна хуучин таван шатлалт хурдны хайрцаг нь найман шатлалт болж сайжирсан, хянах самбарын мэдрэгчтэй дэлгэц нь томорсон зэрэг өөрчлөлтүүдийг дурдаж болохоор байна.
“Toyota Motor” компани шинэ “4Runner”-ийг 2024 оны эцсээс нийт есөн хувилбартайгаар худалдаанд гаргахаар төлөвлөсөн аж. Илүү тав тухтай, хурд хүч илүү сайтай, бартаат замын нэмэлт тоноглолтой зэргээр хувилбарууд нь ялгагдах юм байна.
Үнийн хувьд 2024 оны хувилбартайгаа ойролцоо байхыг мэдээллээ. Одоогоор худалдаалагдаж буй 2024 оны загварын эхлэх үнэ 44 мянган ам.доллароос 55 мянган ам.долларын хооронд байгаа юм.
АНУ-ын зах зээлд бага оврын SUV загварын эрэлт эрчимтэй нэмэгдэж буй ч дунд оврын SUV зай томтой, ачаа тээшний багтаамж сайтай, илүү хүчтэй гэдэг утгаараа гол хэрэглээ хэвээр байсаар байна.
Энэ ангилалд “Toyota Motor”-ийн гол загвар гэж болох “4Runner” болон “Highlander” нь сүүлийн жилүүдэд “Hyundai”, “Jeep” зэрэг компанийн хүчтэй өрсөлдөөнтэй тулгарах болсон юм. Улмаар 2022 онд “Toyota Motor” АНУ дахь дунд оврын SUV-ийн борлуулалтаараа хоёрдугаар байр руу ухарсан бол өдгөө “Stellantis”, “Hyundai Motor”, “Ford Motor”-ийн араас дөрөвдүгээрт бичигдэж байна.
Загваруудын шинэчлэл харьцангуй удаан байж, технологиуд хуучирсан нь борлуулалт буурахад тодорхой хэмжээнд нөлөөлсөн гэж болохоор байгаа юм. Энэ асуудлыг арилгахын тулд “Toyota Motor” шинэ “4Runner”-аас гадна “Land Cruiser”, “Grand Highlander” загваруудаа мөн шинэчлэхээр төлөвлөжээ. Тухайлбал: 2021 АНУ-д борлуулахаа зогсоогоод байсан “Land Cruiser” автомашинаа шинэчилж, зөвхөн хосолмол хөдөлгүүртэй хувилбараар энэ хавраас дахин худалдаанд гаргахаар байгаа аж.
Түүнчлэн 2023 онд худалдаанд гаргасан шинэ “Grand Highlander” загварынхаа үйлдвэрлэлийг нэмэгдүүлэх зэрэг арга хэмжээ авч байна.
