Монголын анхны кино театр болох “Ард”-ын барилгыг баяр наадмын өдрүүдэд буулгаж эхэлсэн нь олон нийтийн сүлжээнд иргэдийн анхаарлыг татсан юм.
Харин долоодугаар сарын 15-ны өдөр мэргэжлийн хяналтын байгууллагаас тус барилгыг зөвшөөрөлгүйгээр нурааж буй нь хууль зөрчиж байна хэмээн барилгыг нураах ажлыг зогсоосон юм.
Бид энэ талаар Нийслэлийн мэргэжлийн хяналтын газрын дэд дарга С.Даваасүрэнгээс тодрууллаа.
-“Ард” кино театрын барилгыг нураах ажлыг зогсоосон. Барилгыг нураахаас өмнө Хот байгуулалт, хөгжлийн газраас зөвшөөрөл авах шаардлагатай. Ямар нэгэн зөвшөөрөлгүйгээр барилга нураах үйл ажиллагааг үргэлжлүүлэх боломжгүй гэх шаардлагыг тавьсан.
Бид тус барилгад хийсэн хяналт, шалгалтын тэмдэглэлд үндэслэж дээрх шаардлагыг өгсөн.
Өмнө нь НМХГ-т хүсэлт өгөөд барилга мөөгөнцөртсөн тухай эрүүл ахуйн болон газар хөдлөлтөд тэсвэртэй байдлын талаар дүгнэлт гаргуулсан байдаг. Гэхдээ энэ нь тус барилгыг ашиглаж болохгүй гэх дүгнэлт биш.
Улсын байцаагч газар хөдлөлтөд тэсвэртэй байдлыг хангуулахын тулд нэмж бэхэлгээ хийх шаардлагатай дүгнэлт үйлдсэн. Хэрвээ эрх бүхий барилгаас зөвшөөрөл аваад бэхэлгээ хийхэд зардал өндөртэй зэргээ нотолж, өөр байдлаар ашиглахаар барилгыг буулгуулах боломжтой.
-Зөвшөөрөлгүйгээр барилга буулгах нь Барилгын тухай хуулийг зөрчиж буй үйлдэл мөн үү?
-Барилга, байгууламжийг буулгахаас өмнө Хот байгуулалт, хөгжлийн газраас зөвшөөрөл авах ёстой. Ингээд барилга нураах зохих стандартын дагуу буулгах юм. Гэтэл уг барилгыг зөвшөөрөлгүйгээр дураараа шууд буулгасан нь Барилгын тухай хуулийг зөрчиж буй үйлдэл хэмээн үзэж байгаа юм.
-Барилга буулгах тухай зөвшөөрлөө авахаар хүсэлт гаргасан байх.
-Тус барилгыг эзэмшигчдийн зүгээс барилга буулгах хүсэлтээ Хот байгуулалт, хөгжлийн газарт өгсөн хэмээсэн. Архитектур төлөвлөлтийн А даалгавар Хот байгуулалт, хөгжлийн газраас гарсан. Цаашид уг газарт 25 хүртэлх давхар барилга барих тухайгаа бидэнд аман тайлбар өгсөн.
НМХГ-ын зүгээс холбогдох зөвшөөрлийн бичгээ авсныхаа дараа буулгах ажлаа хий гэх шаардлага тавьж, сануулсан.
-Хэрвээ уг барилгыг буулгах ажлыг үргэлжлүүлбэл ямар хариуцлагын ямар асуудал үүсэх вэ?
-Зөвшөөрөлгүйгээр барилгыг буулгах ажлаа үргэлжлүүлбэл Зөрчлийн хэрэг үүсгэх тухай мэдэгдсэн байгаа. Хот байгуулалт, хөгжлийн газраас уг барилгыг буулгуулахгүй гэх шийдвэр гарвал барилгыг хэвийн байдалд нь оруулах шаардлага тавина. Тавьсан шаардлагыг биелүүлээгүй тохиолдолд бид шүүхэд хандаж, албадан хийлгүүлэх хүртэл арга хэмжээг авах эрхтэй.
Гэхдээ Хот байгуулалт, хөгжлийн газраас шийдвэр нь гараагүй байгаа тул ийм арга хэмжээг авах тухай ярих эрт байх. Мэргэжлийн хяналтын байгууллага бол зөвхөн хяналт тавих үүрэгтэй.
