Төв болон зүүн Европын зарим орнууд ОХУ-ын иргэдэд аялал жуулчлалын виз олгохыг бүрмөсөн зогсоохыг шаардсан. Улмаар Прага хотноо Европын холбооны 27 орны Гадаад хэргийн сайд нарын хурал боллоо.
Тэд Украины иргэд дайны хөлд зовж шаналж байхад Оросын иргэд амралт, дэлгүүр хэсэх зорилгоор Европын Холбоонд нэвтрэх нь шударга бус гэж үзжээ. Улмаар ОХУ-тай 2007 онд байгуулсан виз хөнгөвчлөх гэрээг цуцлахаар тохиролцлоо. Цаашид Оросын иргэдэд ердийн аялал, жуулчлалын визийг олгохгүй зөвхөн албан ажил, бизнес, эмчилгээ, сургалтын гэх мэт тусгайлсан виз олгоно. Энэхүү зөвшилцлийн хүрээнд Европын Холбооны зүгээс ОХУ-ын иргэдэд аялал жуулчлалын виз олгохгүй байх асуудлыг зохицуулсан хуулийг Евро Парламент батлан гаргах юм. Одоогийн байдлаар Польш, Латви, Литва, Эстони улс дангаараа ОХУ-ын иргэдэд виз олголтыг цуцлаад байна.
Оросууд хоёрдугаар сард Украин руу дайрсаны дараа Европын Холбоо тус улсын зарим албан тушаалтан болон бизнес эрхлэгчдийн виз хөнгөвчлөх гэрээг аль хэдийн зогсоосон. Харин энэ удаагийн шийдвэр энгийн Орос иргэдэд үйлчилнэ.
Европын холбооны гадаад бодлогын дээд төлөөлөгч Жозеп Боррел “Оросууд Украинд дайн болоогүй юм шиг амарч зугаалж, дэлгүүр хэсч байхыг олон харсан. Бид үүнийг ердийн бизнес гэж үзэхгүй, болохгүй. Оросууд Европын холбооны гишүүн орноос виз авахад илүү хэцүү болж, удаан хугацаа шаардагдана” гэж хэлэв.
Одоогоор ОХУ-ын иргэдэд 12 сая хүчин төгөлдөр Европын холбооны виз байгаа гэнэ. Оросын бүх иргэдэд шууд виз хориглох саналыг Франц, Герман улсууд эсэргүүцсэн. Тэд Европын холбооны гишүүн орнууд Оросуудад виз олгох боломжтой, гэхдээ хөнгөрүүлсэн нөхцөл эдлүүлэхгүй гэж үзээд байгаа юм.
ОХУ-ын арми Украин руу цөмрөн орсноос хойш бараг 1 сая Оросууд хуурай замын хилийн боомтоор Европын холбоонд нэвтэрсэн. Гэвч үл хөдлөх хөрөнгө, банкны хоригтой нүүр тулж олонхи нь буцахаас өөр аргагүй болжээ. Тэдний ихэнх нь Финлянд, Эстони улсаар дамжин ирсэн бөгөөд визтэй, оршин суух зөвшөөрөлтэй эсвэл давхар иргэншилтэй байжээ. Европын холбооны 27 улсын Гадаад хэргийн сайд нар Украины Орост эзлэгдсэн газар нутгаас олгосон паспортыг хүлээн зөвшөөрөхгүй байхаар тохиролцсон. Зарим орон Европын холбоо нэгдсэн тохиролцоонд хүрээгүй тохиолдолд бүс нутгийн визний хориг тавихаар эрэлхийлнэ гэдгээ мэдэгдээд байна.
