ХЗДХ-ийн сайд Х.Нямбаатараар ахлуулсан нүүрсний хулгайг шалгах ажилд дэмжлэг үзүүлэх Засгийн газрын Ажлын хэсэг мэдээлэл хийлээ. Ажлын хэсэг мягмар гаригт эхний хуралдаанаа хийж, мөрдөн шалгах ажиллагааг эрчимжүүлсэн.
Тэгвэл мягмар гаригаас лхагва гаригт шилжих шөнө төрийн өмчит “Эрдэнэс Тавантолгой” ХК-ийн гүйцэтгэх захирал асан Б.Ганхуяг болон түүний хамаарал бүхий 4 иргэнийг, “Хишиг-Арвин Индустриал” ХХК-ийн ерөний захирал Б.Хишигдорж, хамаарал бүхий 2 иргэн, нийт найман иргэнийг хойшлуулшгүйгээр баривчилсан байна.
Хууль зүй, дотоод хэргийн сайд Х.Нямбаатарын мэдээлснээр мөрдөн шалгах ажиллагааны үеэр Б.Ганхуяг “Эрдэнэс Тавантолгой” ХК-ийн гүйцэтгэх захирлаар ажиллах үедээ өөрт давуу байдал үүсгэсэн байж болзошгүй. “Эрдэнэс Тавантолгой” ХК-ийг анх үүсгэн байгуулагдсан цагаас хойш хөрс хуулалт, олборлолт, операторын үйл ажиллагаа эрхэлж байгаа, үндэсний томоохон компани болох “Хишиг-Арвин Индустриал” ХХК-тай холбоотой албан тушаал, авлигын гэмт хэргийн тодорхой нотлох баримт илэрсэн.
Тухайлбал, Б.Ганхуягийн хамаарал бүхий этгээдүүд болон “Хишиг-Арвин Индустриал” ХХК-ийн хамаарал бүхий хүмүүс дундаа хамтран эзэмшдэг компани байгуулж, төсөл хөтөлбөр хэрэгжүүлж байсан нь мөрдөн шалгах ажиллагааны явцад тогтоогдсон. Улмаар мөрдөн шалгах ажиллагааг гүнзгийрүүлэх үүднэс хойшлуулашгүйгээр баривчилсан.
АТГ болон ЦЕГ-аас хэргийн үнэн зөвийг тогтооход саад учруулж болзошгүй гэх үүднээс мөрдөн шалгах ажиллагааг шуурхай явуулж байна гэх мэдээллийг өгсөн. Баривчилсан хүмүүсийн орон гэр болон “Хишиг-Арвин Индустриал” ХХК-ийн оффист үзлэг нэгжлэг хийх ажил үргэлжилж байна. Нүүрсний хулгайн хэрэг нь дан ганц “Эрдэнэс Тавантолгой” ХК төдийгүй орон нутгийн өмчит “Тавантолгой” ХХК-тай холбоотой бөгөөд мөрдөн шалгах ажиллагаа явагдаж байгаа. Мөрдөн шалгах ажиллагааг явуулахдаа нүүрсний экспортыг доголдуулах түвшинд нөлөөлөхгүй байх зарчим барьж баримталж байгааг онцолсон юм.
Мөн тэрээр Ажлын хэсгийн бүрэлдэхүүнийг өргөжүүлж, 21 аймгаас хоёроос доошгүй мөрдөгч, эрүүгийн хэргийн тус бүр нэг мөрдөгчийг Улаанбаатар хотод татаж ажиллахаар болсон талаар мэдээллээ.
Нүүрсний хэрэгт холбогдох мөрдөн шалгах ажиллагааны хүрээнд:
1. Тавантолгой орд ашиглалтад орсноос хойш олборлосон нийт уулын цулын хэмжээ. Үүнээс хөрс хуулалт хийж, экспортод гаргасан нүүрсний хэмжээ. Мөн нүүрсний чанар, экспортод гарсан нүүрсний гаалийн бүрдүүлэлтийг тулгах.
2. Өнгөрсөн хугацаанд БНХАУ-ын хэлээр гарсан нийт нүүрс тээврийн хэрэгсэл, тээвэрлэгч ААН-үүдийн төлсөн татвар. Тээвэрлэгч компаниудын улс төрд нөлөө бүхий хүмүүсийн холбоо хамаарал, эцсийн өмчлөгчийг 2022 онд багтаан ил болгож, улсын бүртэлд бүртгэх.
3. БНХАУ болон тус улсаар дамжин бусад орнуудад бүртгэлгүйгээр экспортод гарсан нүүрсний мэдээллийг авах.
4. Үе үеийн гаалийн байцаагч нарыг шалгаж, гаалийн бүрдүүлэлтийн архивлагдсан баримтуудыг тулгалт хийх. Гаалийн хилээр нэвтэрсэн бараа тээвэр, хүн тээврийн хэрэгслүүдийг нэгбүрчлэн тулгах шалгалтууд хийгдэж байгаа аж.
