Гадаад харилцааны сайд Б.Батцэцэг өнөөдөр, маргааш хоёр өдөр БНХАУ-д албан ёсны айлчлал хийж буй.
Түүний айлчлалын ач холбогдол, үр дүнгийн талаар олон улс судлаач, эдийн засагч Ч.Сумъяагаас тодрууллаа.
-Гадаад харилцааны сайдын урд хөршид хийж буй айлчлалын зорилго болон гол үр дүнгийн талаар та судлаач хүний хувьд хэрхэн дүгнэж байна вэ?
-Монгол Хятад хоёр орны хооронд өндөр дээд түвшний харилцан айлчлалыг идэвхжүүлэх, харилцан итгэлцлийг нэмэгдүүлэхэд айлчлалын зорилго чиглэж байна гэж харж байна.
Б.Батцэцэг сайдын хувьд Гадаад харилцааны сайдаар томилогдсоноос хойших гурван жилийн хугацаанд БНХАУ-ын Гадаад хэргийн сайдтай цаг үеийн асуудлаар дөрвөн удаа утсаар ярьсан байдаг. Мөн энэ удаагийн Гадаад хэргийн сайд нарын уулзалтыг оруулбал зургаа дахь удаа хоёр талын уулзалт яриа хэлэлцээ хийх гэж байна.
Энэ нь хоёр улс нягт хамтын ажиллагаа өрнүүлж, иж бүрэн стратегийн түншлэлийн харилцаа идэвхтэй хөгжүүлж байгааг харуулж байгаагийн нэг илрэл юм.
-Таныхаар хоёр орны эдийн засгийн хамтын ажиллагаа болон харилцааны одоогийн нөхцөл байдал ямар түвшинд байна вэ?
-Хэдийгээр өнгөрсөн жилүүдэд цар тахлын ээдрээтэй нөхцөл байдалд байсан ч хоёр талын “Төвбанк хоорондын Үндэсний мөнгөн тэмдэгт солилцох своп хэлцлийн гэрээ”, гадаад худалдаа болон бусад эдийн засгийн хамтын ажиллагаа эрчимтэй хөгжсөн.
Хятадын статистик мэдээллээс харахад, өнгөрсөн онд хоёр талын худалдааны нийт эрэлт 12 тэрбум ам.долларыг давсан байна. Энэ тоог 2020 оны дүнтэй харьцуулахад бараг хоёр дахин өссөн гэсэн үг. Монгол Улсын экспортын гол бүтээгдэхүүн нүүрс, зэсийн баяжмалын хэмжээ, дүн цар тахлын өмнөх үеийн нөхцөл байдлын үетэй ижил түвшинд очсон нь хоёр талын худалдаа эдийн засгийн харилцаа тогтвортой хөгжиж байгааг харуулж байна.
-Ер нь цаашдаа хамтын ажиллагааны ямар боломж, орон зай байна гэж та үзэж байна. Тухайлбал, байгаль орчны чиглэлд хамтын ажиллагаа ямар түвшинд байна вэ?
-Монгол, Хятад хоёр улс уур амьсгалын өөрчлөлт, байгаль орчны чиглэлээр хамтарч ажиллах бүрэн бололцоотой. Тухайлбал хоёр тал ойжуулалт, шар шуурга цөлжилтийн эсрэг хамтын ажиллагааг өргөжүүлэн хөгжүүлэх бүрэн бололцоо байна.
Монгол Улсын Ерөнхийлөгчийн санаачилсан “Тэрбум мод” хөтөлбөр хэрэгжиж байна. Монгол Улс НҮБ-ын Цөлжилттэй тэмцэх суурь конвенцод нэгдэн орсон талуудын 17 дахь удаагийн бага хурлыг 2026 онд зохион байгуулахаар болсон.
Хятадын тал Өвөрмонгол, Шиньжян, Ганьсү, Нинься зэрэг газруудад шар шуурга, ойжуулалт, цөлжилттэй тэмцсэн арвин туршлагатай. Уур амьсгалын өөрчлөлтөд манай хоёр улс аль аль нь өртөж буй тул цаашид хамтын ажиллагааг идэвхтэй өрнүүлэх нь чухал юм.
