Монгол банхарууд дөрөвдүгээр сарын 28-ны Ням гарагт 08 цагаас “World Dog Show 2024” болон “Croatia Winner” үзэсгэлэн тэмцээнд оролцоно.
Дэлхийн аварга шалгаруулах үзэсгэлэн тэмцээн энэ сарын 25-28-ны өдрүүдэд Хорват улсын нийслэл Загреб хотноо зохион байгуулагдах гэж байна. Тус тэмцээнд дэлхийн улс орнуудаас нийт 18,355 нохой шилдгийн төлөө өрсөлдөх аж.
Манай улсаас найман хүнтэй баг бүрэлдэхүүн гурван монгол банхар болох Хангарьд, Гүен, Толигор нарын хамтаар Загреб хотод очсон бөгөөд түүхэнд анх удаа монгол банхар үүлдэр олон улсын рингэнд дэлхийн нохой сонирхогч, үржүүлэгч, шүүгч нарын өмнө гарах юм. Түүнчлэн үзэсгэлэнгийн талбайд монгол гэр барьж, үндэснийхээ өв соёлыг сурталчлах ажлуудыг хийхээр бэлджээ.
