Барилгын тухай болон холбогдох бусад хуулийн төслүүдийг хэлэлцэхийг дэмжлээ

 Монгол Улсын Их Хурлын чуулган нэгдсэн хуралдаанаар \”Газрыг улсын тусгай хэрэгцээнд авах, тогтоолын хавсралтад өөрчлөлт оруулах тухай” Улсын Их Хурлын тогтоолын төслийг хэлэлцэх эсэх тухай байлаа. Хууль санаачлагчийн илтгэлийг Барилга, хот байгуулалтын сайд З.Баянсэлэнгэ танилцуулсан. Манай улсад суугаа гадаадын зарим орны Дипломат төлөөлөгчийн болон Консулын газар, олон улсын зарим байгууллагын ашиглаж байгаа газрыг улсын тусгай хэрэгцээнд авахтай холбогдуулж Засгийн газраас уг тогтоолын төслийг санаачлан боловсруулсан байна.

Уг асуудлыг Аюулгүй байдал, гадаад бодлогын байнгын хорооны хуралдаанаар хэлэлцэх үед Улсын Их Хурлын гишүүн Ж.Энхбаяр, тогтоолын төсөлд тусгагдсан гадаад улсын элчин сайдын яамдад газар олгохдоо тухайн улстай харилцан эрх тэгш байх зарчмыг баримталж байгаа эсэх талаар холбогдох судалгаа, мэдээллийг Улсын Их Хурлын гишүүдэд танилцуулах нь зүйтэй гэсэн саналыг гаргасан бөгөөд Байнгын хорооны хуралдаанд оролцсон гишүүдийн олонх тогтоолын төслийг хэлэлцэх нь зүйтэй гэж үзсэн хэмээн Улсын Их Хурлын гишүүн Ц.Цолмон танилцуулсан юм. Хууль санаачлагчийн илтгэл болон Байнгын хорооны санал, дүгнэлттэй холбогдуулан асуулт асуух гишүүн байсангүй. Ингээд тогтоолын төслийг хэлэлцэх эсэх асуудлаар санал хураалт явуулахад хуралдаанд оролцсон гишүүдийн 75.4 хувь нь хэлэлцэхийг дэмжлээ.

Энэ асуудлын дараа Барилгын тухай /шинэчилсэн найруулга/ болон холбогдох бусад хуулийн төслүүдийн хэлэлцэх эсэх асуудлыг хэлэлцлээ. Хуулийн төслийн талаар Барилга, хот байгуулалтын сайд З.Баянсэлэнгэ гишүүдэд танилцуулсан юм.

Хуулийн төсөлд барилгын үйл ажиллагаа эрхлэх иргэн хуулийн этгээд төрийн захиргааны байгууллагад бүртгүүлсэн байх бөгөөд бүртгэлийг цахим хэлбэрээр гүйцэтгэж нийтэд нээлттэй байлгахаар зохицуулсан байна. Тухайн байгууллага, ажилтны үзэмжээс шалтгаалан хүнд суртал гаргадаг явдлыг зогсоох зорилгоор барилгын ажлын зөвшөөрөл олгох процессыг хуульд нарийвчлан зохицуул, тодорхой хугацаа тогтоож өгчээ. Түүнчлэн барилгын ажил эхлүүлэх, үргэлжлүүлэх зөвшөөрөл олгох, хяналт тавих, барилга байгууламжийг ашиглалтад хүлээн авах үйл ажиллагааг аймаг, нийслэлийн Засаг даргын бүрэн эрхэд тусган гүйцэтгэхээр төсөл тусган, барилгын үйл ажиллагааны мэргэжлийн оролцогчдын эрх үүргийг тогтоох, даатгалд хамруулах, барилгын салбарын мэргэжилтнийг бүртгэж гэрчилгээ олгох, барилгын компанийг бүртгэх харилцааг зохицуулах зорилт тавьсан байна.

Эдийн засгийн байнгын хороо хуулийн төслийг хэлэлцэх нь зүйтэй гэж үзсэн хэмээн Улсын Их Хурлын гишүүн Ж.Батсуурь танилцуулсан. Хуулийн төсөлтэй холбогдуулан гишүүд асуулт асууж, байр сууриа илэрхийлсэн бөгөөд хуралдаанд оролцсон гишүүдийн 81.5 хувь нь хуулийн төслийг хэлэлцэхийг дэмжсэн юм.

Мал, амьтны эрүүл мэндийн тухай болон холбогдох бусад хуулийн төслүүдийн хэлэлцэх эсэх асуудлыг мөн хэлэлцсэн бөгөөд хуралдаанд оролцсон гишүүдийн 87.7 хувь нь хэлэлцэхийг дэмжлээ.