![\"\"](http://undesten.mn/uploads/posts/2017-04/1491203457_aspac.png "\\"\\"")
Ази -Европын уулзалт –АСЕМ-ын дээд түвшний 11 дүгээр уулзалтыг өнгөрсөн онд манай улс эх орондоо амжилттай зохион байгуулж, дэлхийн нийтийн анхаарлын төвд хэдийнээ орсон билээ. Тэгвэл энэ онд мөн л олон улсын томоохон чуулга уулзалтыг Улаанбаатар хотноо зохион байгуулах гэж байна. Тодруулбал, ирэх зургадугаар сард манай улсад JCI ASPAC / Жэй Си Ай, Ази-номхон далайн бүсийн чуулган/ зохион байгуулах болсон талаар JCI Монгол байгууллагаас өнөөдөр мэдээлэл хийлээ.
АСПАК чуулган нь JCI байгууллагын томоохон арга хэмжээний нэг бөгөөд Ази Номхон далайн бүсийн чуулган юм. Тус чуулганд дэлхийн өнцөг булан бүрээс 40 гаруй улсын 3 мянга гаруй манлайлагч, бизнес эрхлэгчид хуран чуулах аж. АСПАК -ийн эрхийг жил бүр аль нэгэн улсад олгодог бөгөөд ингэхдээ олон шалгуур үзүүлэлтийг хангасан тухайн улсад олгодог байна. Энэ удаад Улаанбаатар хотыг дараах гурван шалтгаанаар сонгожээ.
- Шинэ хөгжлийн зам дээр гарсан Монгол орны хөгжилд хувь нэмэр болохуйц санал санаачлагад дуу хоолойгоо хүргэх
- Залуусын хот гэж нэрлэгддэг Улаанбаатартай танилцах, түүхэн улсын, түүхэн хотод, түүхэн арга хэмжээнд оролцох
- Нээлттэй, зочломтгой монголчуудын зан заншил, соёлыг мэдэрч, мэдлэг боловсролтой амжилттай яваа залуустай бизнесийн хамтын ажиллагаагаа эхлэх, хөгжүүлэхэд оршино.
Манай улс АСПАК чуулганыг зохион байгуулснаар эдийн засагт олон эерэг өөрчлөлтийг дагуулах төдийгүй оролцогч улс бүрийн төлөөллүүд монголын талаар үнэгүй сурталчилгаа, мэдээ мэдээллийг өөрийн орондоо зарлан тунхаглах зэрэг улмаар үүнийг дагаад манай улсыг зорих жуулчдын тоо нэмэгдэх, гадаад харилцааг өргөжүүлэн тэлнэ\” хэмээн JCI Монгол байгууллагын 2017 оны үндэсний Ерөнхийлөгч П.Батхишиг хэлэв.
Мөн тэрээр цааш хэлэхдээ \”Жэй Си Ай, Ази-номхон далайн бүсийн чуулганыг зохион байгуулахад улсын төсвөөс ямарваа нэгэн зардал гарахгүй, гишүүдийн хураамж, болон ивээн тэтгэгч байгууллагуудын туслажтайгаар зохион байгууллагдана. Олон улсын томоохон арга хэмжээ хэдий ч иргэдийн өдөр тутмын амьдралын хэв маягт тухайлбал, зам хаах, тусгай хамгаалалт гарах зэрэг нөлөөлөл үүсэхгүй\” гэв.
Энэ талаар тус чуулга уулзалтыг зохион байгуулах хорооны дарга Г.Баярмагнай хэлэхдээ \”Нийт 10 гаруй Ази Номхон далайн бүсийн орнууд манай улсыг судалж үүний үр дүнд манай улс Ази-номхон далайн бүсийн чуулганыг зохион байгуулах эрхийг авсан. Нийтдээ 700 гаруй орчим шалгуур үзүүлэлтүүдийг ханган энэхүү чуулганыг зохион байгуулах эрхийг аваад байна. Дэлхийн 40 гаруй улсын ажил хэрэгч, манлайлагч залуус манай улсад хүрэлцэн ирснээр Монгол улсын эдийн засагт 7-10 сая ам.долларын худалдан авалт үүснэ гэж бид тооцоолж байгаа. Энэхүү арга хэмжээний үеэр аялал жуучлал, эдийн засагт олон эерэг өөрчлөлтүүдийг дагуулах бөгөөд олон орны залуус өөр хоорондоо чухал сэдвээр уулзалт, сургалт, мэдээлэл солилцох улмаар цаашид хамтран ажиллах эхлэл тавигдана\” гэлээ.
JCI байгууллага нь дэлхийн хэмжээнд залуу удирдагчид, ажил хэрэгч хүмүүс сайн дурын үндсэн дээр нэгдэн идэвхтэй үйл ажиллагаа явуулдаг байгууллага бөгөөд өнөөдрийн байдлаар 120 гаруй орны 5 мянга орчим байгууллагын 18-40 насны 200 мянган идэвхтэн гишүүдтэй олон улсын томоохон байгууллагуудтай хамтарсан үйл ажиллагаа явуулдаг ашгийн бус байгууллага юм. JCI монгол байгууллагын тухайд 700 гаруй идэвхтэн гишүүдтэй бөгөөд эдгээр гишүүд дээрх чуулганыг зохион байгуулахад гар бие оролцох аж.JCI AСПАК-ийн үеэр нэгдсэн хуралдаан, сургалт хөгжил, нээлттэй форум, international nights болон монгол наадам арга хэмжээнүүд зохион байгуулагдана.
Б.Алтжин
