\”Оюунлаг” продакшны дэлгэцийн тав дахь уран бүтээл болох \”Царайлаг өдрүүд” инээдмийн уран сайхны кино Хүннү кино театрт өчигдөр нээлтээ хийлээ.
Тус киноны зохиолчоор Хайрын рекорд, Намрын синдром, Омарын эрэлд зэрэг кино бүтээлээрээ олонд танигдсан \”ТВ Коктейл” хамтлагийн жүжигчин Д.Энхбаяр ажилласан бол киноны ерөнхий найруулагч, продюсераар Д.Отгонбаяр, Г.Сэр-од нар ажилласан байна.
Гол дүрүүдэд \”A-Cappella” хамтлагийн дуучин, жүжигчин Э.Мөнхтөр, АЖ Г.Мягмарнаран, МУГЖ Г.Золбоот, МУГЖ Л.Дэмидбаатар, Н.Мөнхсоёл, Б.Баатархүү, С.Батзориг , Ө.Мөнх-Эрдэнэ, Д.Дэлгэрсайхан, П.Намуун нар тогложээ.
\”Царайлаг өдрүүд” инээдмийн уран сайхны нээлтийн арга хэмжээнд киноны ерөнхий найруулагч, продюсераар ажилласан Д.Отгонбаяр, Г.Сэр-од, гол дүрийн жүжигчин \”A-Cappella” хамтлагийн дуучин, жүжигчин Э.Мөнхтөр, МУГЖ Г.Золбоот, СГЗ, зохиолч, судлаач Н.Ганхуяг нар хүрэлцэн ирлээ.
Нээлтийн үйл ажиллагаанд Мотив хамтлаг, Дуучин С.Заяа нар ая дуугаа өргөн барьсан юм.
Энэ үеэр СГЗ, зохиолч, судлаач Н.Ганхуяг \”Царайлаг өдрүүд киноны уран бүтээлчид болон киноны гол дүрд тоглосон Э.Мөнхтөрд баяр хүргэе. Сүүлийн үед Э.Мөнхтөргүй кино ер нь байна уу? Мөн саяхан Монгол Улсын Гавьяат жүжигчин цолоор энгэрээ мялаалгасан Г.Золбоот бол СУИС-ийн ууган төгсөгчдийн нэг. Г.Золбоотод халуун баяр хүргэе ” гэлээ.
\”Царайлаг өдрүүд”Монголын уран сайхны киноны үйл явдлын тухай өгүүлэхэд гол дүр болох 35 настай эхнэр хүүхдийн хамт амьдардаг Төгөлдөр нэртэй, геологич мэргэжилтэй залуу шинэ ажил, шинэ албан тушаалд томилогдож байгаагаар киноны үйл явдал эхэлнэ. Төгөлдөр гадаадад сургууль төгссөн, мэдлэг боловсролтой, чадварлаг нэгэн юм. Гэвч тэрээр ганцхан асуудалтай. Тэрээр удамшлын өвчины улмаас огт хөмсөггүй мулзан царайтай болсон билээ. Тэр мөчөөс хойш байнга каск өмсөж явдаг болсон ба шинэ ажлынх нь хамт олон түүнийг шоолж, Төгөлдөрт хүндрэл учруулна. Ингээд сэтгэлээр унасан Төгөлдөр өөртэй нь хамт нэг багт ажилладаг, Хүдэрболдод учир байдлаа хэлж зөвлөлдсөнөөр гоо сайхны мэс засалд орохоор болно. Ингээд эхнэр хүүхдээ гадаад руу аялалд явсан хойгуур гоо сайхны хагалгаанд орсон Төгөлдөр танигдахын аргагүй өөр болсноор түүний \”Царайлаг өдрүүд” эхлэх болно. Царайлаг болсон Төгөлдөрийг гэр бүл, ажлын хамт олон, гээд бүгд танихгүй байх ба, зөвлөлдөж хагалгаанд оруулсан Хүдэрболд найз нь хүртэл танихгүй гэж гүтгэн, галзуу солиотой хүн болгон хувиргаж ажил амьдрал гээд хамаг юмаа алдахад хүрнэ. Өөрийгөө Төгөлдөр гэдгийг батлахын тулд олон саад бэрхшээлийг хэрхэн даван туулахыг \”Царайлаг өдрүүд” инээдмийн уран сайхны киноноос хүлээн авч үзээрэй. Төгөлдөр өөрийгөө баталж чадах болов уу
Энэ намрыг \”Царайлаг өдрүүд \”-тэй эхлүүлж, Царайлагуудын эгнээнд тавтай морилоорой.
