О.Долгормаа: Гадаадын ковер хийдэг залуусын сонирхлоос хуваалцахыг хүсдэг

\”Монголын
ковер одод” шоуны шилдгийн шилдэг оролцогч О.Долгормааг \”Шинэ танил” буландаа
урилаа. Түүний дуулсан дуунуудыг олон нийтийн цахим сүлжээгээр дунджаар 14
мянга гаруй хүн сонссон байна.

 

-Таны
дуунууд олон нийтийн цахим сүлжээгээр чамлахааргүй хандалттай юм. Ингэхэд өөрөө
хэзээнээс дуулж эхэлсэн бэ?

 

-Би
их хожуу дуулж эхэлсэн. Хамгийн анх Мэрилин Монрогийн дууг дуулж, олон нийтийн
сүлжээнд байршуулсан. Удаагүй байтал найзууд миний дуу олон хүнд хүрч байгаа
тухай хэлсэн. Энэ үеэс л миний дуулах бусдад таалагдаж байгаа юм байна гэж
бодоод өөртөө бага зэрэг итгэл төрсөн. Тэгээд \”Mongolian cover”-аас зохион
байгуулсан тэмцээнд оролцож, анх тайзан дээр гарсан юм. Үүний дараа \”Монголын
ковер одод” тэмцээнд түрүүлээд өмнөхөөсөө ч илүү дуунд дурласан. Би орос дунд
сургууль төгссөн. Харамсалтай нь манай сургуульд урлагийн үзлэг гэж болдоггүй
байсан. Тийм учраас оюутан болох хүртэл тайзан дээр гарч, олны өмнө дуулах
боломж олдоогүй. Тэгээд ч аав, ээж хоёр минь урлагийн хүн болох шийдвэрийг минь
таатай хүлээж аваагүй. Харин хоёр тэмцээнд оролцоод хоёуланд нь шилдэг оролцогч
болсны дараа тэд бодлоо өөрчилсөн. Эхэндээ юу ч хэлээгүй. Харин сүүлдээ дэмжиж
эхэлсэнд баярладаг.

 

-Хүмүүсийн
сайн мэдэх дууг дахин дуулж олны хүртээл болгоно гэдэг хэцүү биш үү?

 

-Тийм
ээ, амаргүй. Гол нь миний сэтгэл, сэдрэмжээс гарсан хөг аялгуу хүмүүст
таалагдаж байгааг харах сайхан байдаг. Тийм л учраас би ковер хийх дуртай.
Үүнийг яг яаж илэрхийлэхээ мэдэхгүй байна. Үнэндээ хүмүүс ковор хийдэг залуусыг
боловсон хулгайч гэж ярьдаг. Үүнтэй би санал нийлдэггүй. Учир нь урлагийн энэ
төрөл дан ганц манай улсад байгаа юм биш. Тэгээд ч ардчилсан нийгэмд өөрийн
чадаж байгаа зүйлээ ямар ч хэлбэрээр харуулж болно гэж боддог. Мэдээж бид ковор
хийхдээ хамтлаг, дуучдаас нь зөвшөөрөл авдаг.

 

-Одоогийн
байдлаар хэдэн дуу дуулаад байна вэ?

 

-Олон
нийтэд цацаж, магтаал шүүмжлэл хүртсэн 5-6 дуу байгаа. Мөн цацаж эхлээгүй
байгаа хэд хэдэн дуу бий.

 

-Өөрийн
гэсэн уран бүтээлтэй болж байна уу?

 

-Яг
одоогоор үгүй. Мэдээж энэ тал дээр бодсон зүйл байгаа. Гэвч нэн түрүүнд
өөрийгөө хөгжүүлж, сурч боловсрох шаардлагатай байна. Би Хүмүүнлэгийн их
сургуулийг өнгөрсөн хавар Олон улсын худалдаа ба орчуулагч гэсэн мэргэжлээр
төгссөн. Хоёр эрэгтэй дүүтэй айлын том охин болохоор аав ээжийнхээ ажилд туслах
ёстой гэдэг утгаар энэ мэргэжлийг сонгон суралцсан. Тиймээс гадаадад суралцахыг
хичээж байгаа. Ингэхдээ гадаадын ковор хийдэг залуустай танилцаж, тэдний
сонирхолыг хуваалцахыг хүсдэг.

 

-Ингэхэд
та бүхнийг хүмүүнлэгийн үйлсэд идэвхтэй оролцдог гэж сонссон юм байна?

 

-Жилийн
өмнө \”We can all” гэж бүлэгт элссэн цагаас эхлээд найзуудтайгаа нийлж,
гудамжинд гуйлга гуйдаг иргэдийн хажууд дуулж, олсон мөнгөө тэдэнд өгч эхэлсэн.
Тэд бүтэн өдөржин суугаад ойролцоогоор 2000 төгрөг олдог юм билээ. Иймээс бид
чадах зүйлээрээ тус дэм больё гэж шийдсэн. Тэгээд л Их дэлгүүр, Төв шуудан,
Тэнгис орчмоор явж ийм хүмүүст туслахыг хичээсэн. Одоо ч гэсэн аль болохоор
туслахыг хичээдэг. Саяхан манай найзууд Үндэсний цэцэрлэгт хүрээлэнд хандивийн
тоглолтууд зохион байгуулж, н.Цэрэнтогтох хүүгийн эмчилгээний зардалд бага ч
гэсэн хувь нэмрээ оруулсан. Манайхан ер нь сэтгэл сайтай ард түмэн юм билээ.
Биднийг маш их дэмжсэн.

 

-Дуугаа
хэрхэн сонгодог вэ. Мэргэжлийн багш, зөвлөгөө авдаг хүн байдаг уу?

 

-Зөвлөгөө
авъя гэж зорьж очиж байсан хүн байхгүй. Мөн одоогоор зөвлөгөө өгч байгаа
мэргэжлийн хүн ч алга. Тиймээс өөрөө л дуугаа сонгож, коверлодог. Тэгээд ч олон
нийтийн цахим сүлжээгээр дүүрэн зөвлөгөө өгдөг хүн байгаа шүү дээ.

 

Эх сурвалж: unen.mn