Ө.Энхболор: 5 сар фитнессээр, 1 сар повер йогоор хичээллэх хоёр тэнцдэг

Сүүлийн үед дан ганц охид бүсгүйчүүд гэлтгүй эрчүүд, хүүхдүүд, гэр бүлээрээ гэх мэтээр йогийг сонирхон хичээллэдэг болжээ. Йог ч их олон төрлөөр манай оронд эрчимтэй хөгжиж байна. Тэгвэл бид энэ удаад \”Асури Повер Йог\”-ийг Үүсгэн байгуулагч Ө.Энхболорыг ярилцлагынхаа буланд урилаа.

-Повер йогийн төрөл монголд ганц байдаг нь танайх гэдэг. Бусад нь ямар йог хичээллүүлдэг юм бол. Энэ йогийн бусдаас ялгарах онцлог, ер нь йогийнхоо талаар товч ойлголт өгөөч.

-Уншигчиддаа энэ өдрийн мэндийг хүргэе. Намайг Өнөрбаярын Энхболор гэдэг. Йогийн багш. Повер йог төрлийн хувьд гэвэл 1990-ээд оны үед АНУ-д үүссэн бөгөөд хамгийн сүүлд гарсан шинэ урсгал юм. Хүчний дасгал болон йогийг уялдуулан системчлэн заадгаараа гол онлог нь оршдог. Тодруулбал, фитнессийн дасгалуудыг йогтой хавсаргана гэсэн үг юм даа. Ингэснээр

-Танай хичээлийн хөтөлбөр хэрхэн явагддаг вэ?

-Манай дасгалууд хүний бүх эрхтэн, үе мөч, яс, булчинд үйлчилдэгээрээ давуу талтай. Дасгалуудыг би өөрөө хоёр сарын турш судалж, бэлтгэж гаргасан. Нэг үгээр цэвэр миний өөрийн хөтөлбөр гэсэн үг. Ингээд эцэст нь 1 курсийг 10 өдрөөр товолж, энэ хугацаанд боломжит үр дүнд хүрч болохыг тогтоосон юм. Онцлоход, энэ хугацаанд хичээлээ таслалгүй явахад үр дүнгүй нэг ч тохиолдол гарч байгаагүй. Үүнд хувь хүний өөрийн хичээл зүтгэл маш чухал үүрэгтэй. Мөн би БНХАУ-д албан ёсоор суралцаж багшлах эрхтэй болсон. 

-Уншигчдад сонин байж магадгүй. Йогоор хичээллэхэд ямар нэгэн хориглох заалт бий юу?

-Эмчийн хяналтанд байдаг, хагалгаанд ороод удаагүй хүмүүс хичээллэхийг хориглодог. Учир нь повер йог нь биед маш их ачаалал өгдөг болохоор дээрх хүмүүст эрсдэлтэй. Сонирхуулахад, манайд 8 настай хүүхэд ч, 70 гарсан эгч нар, эрэгтэйчүүд гээд нас, хүйс харгалзахгүй хичээллэдэг. Эрэгтэйчүүдийн хувьд йог гэдэг нь зөвхөн эмэгтэйчүүд турж, галбиржихын тулд хичээллэдэг гэсэн туйлширсан ойлголт байдаг. Энэ ойлголтыг халах цаг болсон. Үнэндээ йогийг анх эрэгтэй хүн үүсгэсэн байдаг. Ялангуяа повер йог нь эрчүүдэд маш тохиромжтой төрөл. Тиймээс ч манайд олон эрэгтэйчүүд хичээллэж, үр дүнгээ үзэж байгаа. Хамгийн гол нь хичээлийн гурав дахь өдрөөс хоолны дуршил эрчимтэй буурдаг. Тиймээс хоол хорьж, дэглэм бариулдаггүй. Ер нь хүн насан туршдаа ногоо, жимсээр хооллож амьдрах боломжгүй. Ялангуяа Монгол орны нөхцөлд мах эрүүл мэндэд маш өндөр ач холбогдолтой, уургийг нөхдөг гол хүнс.

-Йог нь фитнессээс ямар давуу болон дутагдалтай талтай вэ?

-Олон давуу талууд бий. Тухайлбал, олон цагаар гүйж харайж, хүнд юм өргөх шаардлагагүй. Фитнесс нь зарим нурууны суулттай, бөөрний өвчтэй хүнд тохиромжгүй. Тэгвэл йог энэ бүх асуудлыг шийдэж чаддаг. Түүнчлэн нийгмийн хэмжээнд элбэг тохиолддог суугаа ажилтай хүмүүст өндөр үр дүнтэй. Тодруулбал, хуян хөөрөх, толгой өвдөх, нурууны элдэв зовиур зэргийг бүрэн анагаах увидастай. Эхний 10 өдөрт л эдгээр зовиурууд арилдаг гээд бодохоор ямар давуу чанартайг нь харж болно. Ер нь дутагдалын талаар надад хэлэх зүйл алга. Учир нь тийм зүйл байхгүй. Таван сар фитнессээр хичээллэх, нэг сар буюу гурван курс манай йогоор хичээллэхийн үр дүн тэнцдэг гэдгийг ам бардам хэлж чадна. Энэ нь цаг хугацааг ч хэмнэх давуу тал юм шүү дээ. Мөн эргээд жин нэмэх тохиолдол байдаггүй.

-Манайд йог хэр зөв голдиролоор хөгжиж байгаа гэж та үзэж байна. Йог хөгжихөд ямар нэгэн саад бэрхшээл байна уу?

-Харьцангуй чөлөөт зах зээлийн жамаар яваа болохоор хүндрэл багатай. Ер нь манайд олон йогийн салбарууд үүдээ нээж байгаад их баяртай байдаг. Тэд, бид, бүгд л хүний эрүүл мэндийн төлөө явж байгаа гэж ойлгодог. Тэгэхээр сайн үйл хэрэг учраас саад бага байдаг юм болов уу даа. 

-Танайх хэдэн салбартай вэ? Йогийн багш бэлтгэх сургалт байдаг уу?

-Манайх Улаанбаатарт үндсэн 4 салбартай. Салбарууд маань 1-р хороололд, Нарны хороололд, 13-р хороололд, мөн Модны-2-т байрлаж үйл ажиллагаагаа явуулж байна. Мөн зарим тохиолдолд орон нутгийн иргэдийн хүсэлт, захиалгаар очиж ажилладаг. Өнгөрсөн хугацаанд Эрдэнэт, Дарханд ажиллаад ирсэн байгаа. Йогийн багш бэлтгэх албан ёсны сургалт байхгүй. Гэхдээ манай салбарын багш нар бүгд миний шавь нар. Өөрөөр хэлбэл, би багш нараа өөр дээрээ үнэ төлбөргүй бэлтгэн сургаж, ажиллуулдаг юм. Цөөн тоогоор ч гэсэн ажлын орон тоо бий болгож байгаа гэж боддог шүү /сурв: инээв/. 

-Олон салбартай байх нь хүмүүст гэрийнхээ ойролцоо хичээллэх боломжийг олгодог байх. Сонирхож байгаа хүмүүс илүү дэлгэрэнгүй мэдээллийг яаж авч болох уу? 

-Манай Asuri power yoga гэсэн пэйж хуудсанд хандаж мэдээлэл авах боломжтой. Мөн 91055567 дугаарт холбогдож болно. Пэйж хуудсанд салбар бүрийн хаяг, баяршил, хичээлийн хуваарь, үр дүнд хүрсэн хүмүүсийн мэдээлэл зэрэг бүхий л мэдээллүүд байгаа.

-Дашрамд нэг зүйлийг тодруулъя. Сэтгүүлч Х.Уламбаяр та хоёрыг холбосон жиг жуг яриа үе үе гарах юм. Ер нь та хоёр ямар холбоотой хүмүүс юм бэ гэдгийг уншигчдад тодорхой хэлэх үү?

-Харин тийм мэдээлэл гарсан. Үнэндээ бид бие биедээ тусладаг, дотны сайн найзууд юм шүү дээ. Олон удаа хамт явж харагдахаар зарим хүмүүс буруу ойлгодог юм шиг байна лээ. 

-Сонирхолтой мэдээлэл өгч ярилцсанд баярлалаа. Цаашдын ажил, амьдралд тань амжилт хүсье. Та бүхний бусдыг гэсэн гэгээн үйлс тань үргэлж дардан байх болтугай.

-Баярлалаа. \”Эрүүл биед саруул ухаан оршино\” гэдэг сайхан үг бий. Тиймээс хүн бүхэн эрүүл байж, итгэл дүүрэн, сэтгэл хангалуун, сайн сайхан амьдрахыг хүсэн ерөөе.