Шар усны үер болон хөрсний бохирдолтой холбоотойгоор цусан суулга, сальмонеллёз, энтеровирусын халдвар зэрэг халдварт өвчнүүд нэмэгдэх хандлагатай байна гэж Эрүүл мэндийн яамнаас мэдээллээ.
Бохирлогдсон хөрс, усанд халдварт өвчний нян удаан хугацаагаар хадгалагддаг бөгөөд тухайлбал цусан суулга өвчний үүсгэгч хөрсөнд 2-4 сар хадгалагддаг байна.
Энэ онд цусан суулга өвчнөөр 521 хүн өвчилсөн нь өмнөх оны мөн үеэс 231 тохиолдлоор ихсэж, ихэвчлэн бага насны хүүхэд байна. Иймээс та бүхэн дараахь зөвлөмжийг хэвшүүлж, эрүүл, аюулгүй орчинд амьдрах таатай нөхцлөө бүрдүүлнэ үү. Үүнд:
• Ундны усыг баталгаатай эх үүсвэрээс авах
• Усыг буцалгаж хэрэглэх, түүхий ус уухгүй байх
• Угааж цэвэрлэсэн тагтай, зориулалтын саваар усыг зөөвөрлөн хадгалах
• Усны савыг 7 хоногт 1-2 удаа бүрэн суллаж цэвэрлэх (Хүнсний сод эсвэл зориулалтын шингэн бүхий халуун усаар угааж, цэвэр усаар зайлах)
• Булаг, шанд, гол, горхины усыг хүнсэнд хэрэглэхгүй байх
• Гараа сайтар савандаж угаах
• Ахуйн хог хаягдлыг ялган ангилж, өдөр бүр тогтсон цэгт хаях;
• Хог хаягдлыг ил задгай хаяхгүй, шатаахгүй байх;
• Гуу жалганд хурсан хог хаягдлыг цэвэрлэх, зайлуулах;
• Стандартын шаардлага хангасан нүхэн жорлон, угаадасны нүхтэй байх
• Жорлон, угаадасны нүхийг хлорлог бодис (жавелион, кальцийн гипохлорид, натри гипохлорид, клорсепт..,)-оор халдваргүйтгэх, авгалдай устгал хийх
• Бие засах газарт халдваргүйтгэл хийх, шимэгч хорхойн өндөг, ялааны авгалдай устгах арга хэмжээ авах
• Гудамж, талбайд нус, шүлс, цэр, тамхины иш хаяхгүй байх, угаадас асгахгүй байхыг ЭМЯ-наас зөвлөж байна
