Юун нэгж, юун битон, цаана чинь газар тарааж байна гэнэ

Сонгууль дөхөхөөр тойрогтоо ажиллах гишүүд, нэр дэвшихээр
санаархагчдын тоо огцом өсдөг нь уламжлал. Харин энэ жил чинь 20 мянгатын дэвсгэрт, хуанли энэ тэрээс гишүүд маань
татгалзаж, овоо дорвиун юм өгч байгаа харагдах юм.

 

Баянхонгорын Д.Ганбат тойргынхоо иргэдийн эрүүл мэндийг
бодож, хуванцар савыг халах зорилгоор битон тараав. Харин Моносын Л.Эрдэнэчимэг
Сонгинохайрханчуудтай уулзалтын хийхийн хажуугаар утасны нэгж тараах ажилд гар
биечлэн оролцож байгаа нь дүрс бичлэгт мөнхөрчээ. Шударга өрсөлдөөн
хэрэглэгчийн төлөө газрын дарга асан О.Магнай чинь баян хүн билүү гэж гайхмаар
машин машинаар нь нүүрс тараав. Харин МАН-ынхан чимээгүйхэн гурал бэлэглэлээ.
За тэгээд шинэ жилийн мэндчилгээтэй хамт чихэр, печень, хуанли, ус, ундааны сав
энэ тэрээ өгөхөө гишүүд маань мартсангүй.

Тэгсэн Төв аймгийн
Ардчилсан намын дарга Т.Доржпүрэв УИХ-ын 76 гишүүн, цаашид нэр дэвшихээр
санаархаж буй хүмүүсийг нам дарж, нүнжигтэйхэн бэлэг гардуулсан сурагтай. Ёстой
л \”юун битон, юун нэгж” гэж уулга алдтал аймгийнхаа иргэдэд газар тараасан байх
юм. Энэ талаар УИХ-ын гишүүн О.Баасанхүү атаархангуй янзтай жиргэжээ.

О.Баасанхүү
гишүүний хувьд ямар тойрог байх биш. Тиймээс битон, нэгж тараагаад явах
шаардлагагүй. Атаархаж суухаас ч яахав.

Харин \”Төв аймгийн Ардчилсан намын дарга Т.Доржпүрэв чинь
овоо нүнжигтэй загинажээ” гэчмээр сүрийг үзүүлжээ. Бүхэл бүтэн нэг сумын
иргэдийн газрын асуудлыг шийдвэрлэнэ гэдэг Монгол Улсын Ерөнхийлөгчөөс ч том
эрх мэдэл гаргажээ гэж дүгнэмээр. Ийм бэлгийг бол дэмжинэ шүү, дэмжинэ. Харин
нэг аймгийн намын даргад иргэдэд газар
олгох эрх мэдэл байдаг юм болов уу яадаг юм бол. Тийм эрх мэдэл байдаг бол
бусад аймгийн намын дарга нар ч гэсэн үлгэр авч, аймаг сумынхаа иргэдийн газрын
асуудлыг шийдвэрлээд явчихвал яасан юм бэ. Тэгвэл Л.Гүндалай мэт гарч ирж иргэдийг чинь \”чацга
царайт”-аар нь дуудаад байхгүй шд.

Ер нь эсэргүүцэж, дургүйцэж байхаар ханш өссөн дээр нь бурзай, бурзай гээд дэмжээд явчихвал яасан юм. Удахгүй цаадуул чинь байр ч өгөх юм билүү. 

А.Аюуш