Хууль зүйн сайд Архивын шинэ барилгын явцтай танилцлаа

Хууль зүйн сайд Д.Дорлигжав 1 дүгээр сарын 27 –ны өдөр Хан-Уул дүүргийн нутаг дэвсгэрт байрлах Архивын ерөнхий газрын шинэ цогцолбор барилга, Шүүхийн шийдвэр гүйцэтгэх ерөнхий газрын Тогтоол гүйцэтгэх газрын Нэгдсэн эмнэлгийн шинэ барилгуудтай газар дээр нь очиж нөхцөл байдал болон барилгын ажлын явцтай танилцлаа. АЕГ-ын шинэ цогцолбор барилгын тухайд 2007 онд тендерт шалгарч 2010 онд хүлээлгэн өгөх нөхцөлтэйгээр барилгын ажил эхэлсэн ч өнөөг хүртэл ашиглалтанд ороогүй байсан. Хууль зүйн сайд 2015 оны 9 дүгээр сард холбогдох хүмүүст хугацаатай үүрэг өгч, богино хугацаанд гүйцэтгэн 2015 оны 12 дугаар сард АЕГ-ын шинэ цогцолбор барилгыг ашиглалтанд өгсөн юм.

 

Ингэснээр 3 байранд хуваагдан үйл ажиллагаа  явуулж байсан үндэсний архивын  сан хөмрөгийн баримтыг нэгтгэн, олон улсын архивын жишигт нийцсэн орчин үеийн стандартын шаардлага хангасан шинэ барилгад төвлөрүүлэн хадгалах, архивын баримтын бүрдүүлэлтийг цаашид 50 жил нэмэгдүүлэн хийх боломжтой боллоо. Мөн шинэ цогцолбор барилга нь 250 хүний суудалтай хурлын танхим, 77 хүний суудалтай кино танхим, 32 хүний суудалтай иргэдийг хүлээн авах өрөө, 77 хүний суудалтай компьютерын сургалтын дадлагын танхим, 80 хүний суудалтай сургалтын танхим, 66 хүний суудалтай уншлагын танхим, үзэсгэлэнгийн танхимтай олон нийтэд хүртээмжтэй, хөнгөн шуурхай үйлчлэх боломж бүрдлээ. Хууль зүйн сайд Д. Дорлигжав мөн энэ өдөр ШШГЕГ-ын Тогтоол гүйцэтгэх газрын Нэгдсэн эмнэлэгийн шинэ барилгын явцтай танилцлаа.

 

Уг барилга нь Монгол Улсын Засгийн Газрын 2014 оны 135 дугаар тогтоол, Төрийн өмчийн хорооны 2014 оны н/236 дугаар тогтоолын дагуу Нийслэлийн Хан-Уул дүүргийн 10 дугаар хорооны нутаг дэвсгэрт байрлах Тагнуулын ерөнхий газрын Техник сургалт, судалгааны газрын барилгыг Шүүхийн шийдвэр гүйцэтгэх ерөнхий газрын балансад шилжүүлсэн. Тус шилжүүлсэн барилгыг авч, 120 ортой хоёрдугаар шатлалын эмнэлгийн зориулалт бүхий Шүүхийн шийдвэр гүйцэтгэх ерөнхий газрын Тогтоол гүйцэтгэх газрын Нэгдсэн эмнэлгийн байр болгон засварлажээ.

 

Уг эмнэлэгт Шүүхийн шийдвэр гүйцэтгэх ерөнхий газрын харьяа хорих ангиудад ял эдэлж буй ялтнууд эрүүл мэндийн үзлэг оношлогоонд бүрэн хамрагдаж, хэвтэн эмчлүүлэх юм. Дээрх барилгын ажлын гүйцэтгэл бүрэн дууссан бөгөөд ирэх гуравдугаар сард ашиглалтанд орох юм.