Н.Энхбаяр эргэн ирж чадах уу!!!

 

 -АТГ-аас сэтгүүлчдэд мэдээлэл хийх үеэр Н.Энхбаярыг 2017 оны наймдугаар сар хүртэл ялтайд тооцно хэмээн мэдэгдэхэд ийм нэгэн бодол төрөв-

Экс Ерөнхийлөгч Н.Энхбаяр их улстөрд эргэн ирэх гэж яасан их зүтгэж байнаа. Эргүүлэн ирүүлэхгүй гэж яасан их зүтгэж байнаа. Загас усандаа жаргалтай, Энхбаяр улстөрдөө жаргалтайн адилаар өнгөрсөн хугацаанд аз жаргалаас ангид ихэд зовж царай алдсан Н.Энхбаяр аз жаргалаа эргүүлэн олохоор ил цагаандаа гарч тэмцэж байна. 2012 оны УИХ-ын сонгуульд ялж МАН, МАХН-д \”мангаа\” болсон Н.Алтанхуягийн байр суурь бэхжиж басхүү их хэмжээний \”ашигтай ажиллах\” болсонд төрөлх АН-ынхан нь хүртэл атаархаж, \”Алтанхуяг гэх дийлдэшгүй мангаатай болохоос өмнө авч хаяхгүй бол болохоо байлаа хэмээсэн АН-ынхан Н.Энхбаяртай хамтарч байгаад Н.Алтанхуягийн Засгийн газрыг нураасан.

Н.Алтанхуягийг Ерөнхий сайд, АН-ын даргын албан тушаалаас зайлуулж АН-ынхан санаа амарсан бол Н.Энхбаяр \”Өнөболдыг хаан болгочихвол дараа нь нухахад амар хэмээн Исмел тайж үздэг\” шиг Ч.Сайханбилэгийг Ерөнхий сайд болгочихвол дараа нь амархан \”нухчина\”, юун АН-тай хамтарч Н.Алтанхуягийг нухах ганцаараа дөнгөчинө, сонгуульд АН-ыг удирдан ялалт байгуулсан Н.Алтанхуягаас дорой нэгэн томилогдох нь гарцаагүй хэмээн боджээ. Гэсэн ч түүний энэ бодол буруу байж Н.Алтанхуяг гэж сайхан хамтрагчаа өөрийнхөө гараар \”үгүй хийсэндээ\” харамсаад ч барахгүй амаараа шороо үмхэж явна. АН-ынханд тусалж, Н.Алтанхуягийг тархиар нь газар савсан Н.Энхбаяр Шадар сайд болох хүсэлтээ Ч.Сайханбилэгт илэрхийлсэн ч цаадах нь Ц.Элбэгдоржийн \”хүн\” учраас Н.Энхбаярыг Шадар сайд болгож улстөрд орох замыг нь засахыг хүссэнгүй.

Харин Н.Энхбаярт сайхан боломж бүрдсэн нь Ч.Сайханбилэгийн сайхан балаг болсон Оюутолгойн Дубайд байгуулсан гэрээний асуудал байсан бөгөөд энэ асуудлын улмаас дэнчигнэж байсан Засгийн газраа аварч үлдэхийн тулд бүхнийг хийхэд бэлэн Ерөнхий сайд Ч.Сайханбилэгт эцсийн найдвар нь Н.Энхбаяраас гуйх байв. Тиймдээ ч Н.Энхбаяраас гуйсан, хариуд нь Н.Энхбаяр түүний Засгийн газар Шадар сайд болохыг хүссэн. Ингээд харилцан тохиролцож Н.Энхбаяраар УИХ дахь МАХН-ын гишүүдийг базуулж байгаад өөрийг нь Оюутолгойн гэрээний асуудлаар огцруулах Г.Уянга гишүүний саналыг дэмжүүлсэнгүй. Харин амлалтандаа хүрэх болоход Н.Энхбаярыг АТГ-аас ашиг сонирхлын зөрчилтэй эсэхийг асуулгаж, урьдчилан төлөвлөсөн \”жүжгээ\” тоглов. Ерөнхийлөгч хэмээх ганцхан хүнд захирагддаг АТГ-аас Н.Энхбаярыг ашиг сонирхлын зөрчилтэй, ялтайд тооцох хугацаа нь 2017 оны наймдугаар сар хүртэл үргэлжилнэ хэмээн мэдэгдсэн нь Н.Энхбаярыг тэр хүртэл улстөрд оруулахгүй байж, улстөрөөс нэгмөсөн гаргах гэсэн зорилготой байв. Энэ оны УИХ-ын сонгууль ч яамай гэхэд ирэх 2017 оны зургадугаар сард болох Ерөнхийлөгчийн сонгуульд наймдугаар сар хүртэл ялтай Н.Энхбаяр нэр дэвших боломжгүй болж байна.

Ингэж л Н.Энхбаяр АН-ынханд хэрэглэсэн бохь шиг хаяагдаж, энэ яваа насандаа анх удаагаа аймар том хууртлаа. Яагаад Н.Энхбаяр байж болохгүй гэж…?, авлигын загалмайлсан эцэг хэмээн Н.Энхбаярыг барьж хорин экс Ерөнхийлөгчийг шийтгэж болдог жишгийг их улстөрд тогтоосон нэгэн эрхэм эргүүлээд намайг авлигын загалмайлсан эцэг хэмээн цоллож шийтгэх вий гэхээс үнэхээр их айж байгаа бололтой, Үндсэн хуулиар оролдож 2017 оноос хойшхи Ерөнхийлөгчдийг хүчгүй болгох хуулийн төсөл санаачлан баталж явна. Гэхдээ олон улсад нэр нүүр олж, АСЕМ-ийг амжилттай зохион байгуулж, 2017 онд Ерөнхийлөгчөөс буусны дараа НҮБ рүү явахыг туйлын ихээр хүсч, энэ хүслээ биелүүлэхийн тулд төвийг сахих бодлого зэрэг төрийг яаж ч самарч, Монголыг яаж ч сэглэхэд бэлэн байна.