Хангайн бүсэд хэн, хэн нэр дэвших вэ?

$\"\"$

УИХ-ын 2016 оны сонгуулийн өдөр ойртссор байна. Тэгвэл манай сайт ирэх сонгуульд нэр дэвшихээр \”санаархаж” байгаа эрхмүүдийг танилцуулж байгаа юм. Өмнө нь зүүн
гурван болон төвийн долоон аймагт нэр
дэвших сонирхолтой хүмүүсийн нэрсийг танилцуулсан юм. Тэгвэл өнөөдөр Хангайн бүсэд дэвшихээр
нэрс нь тодроод байгаа хүмүүсийг танилцуулья.

Хөвсгөл аймаг

Хөвсгөл аймагт 2016 оны УИХ-ын
сонгуулиар \”ширүүхэн тулаан” болж магадгүй. Өнгөрөгч сонгуулиар Хөвсгөлчүүд
МАН-ын Л.Энх-Амгалан, МАН-ын угшилтай ч бие даан нэр дэвшсэн Ц.Даваасүрэн нарт
итгэл үзүүлсэн юм. Тэнд энэ удаа ч Хөвсгөл аймгаасаа нэр дэвшинэ.
Л.Энх-Амгалангийн хувьд гурил будаа тарааж, өөрийн хийсэн ажлаа нэг биш удаа
танилцуулаад авсан. Бие даагч Ц.Даваасүрэн ч тойрогтоо олон удаа ажиллаад
байгаа. Тэгвэл тэдэнтэй өрсөлдөхөөр УИХ-ын гишүүн асан Ц.Сэдванчигийн нэр
сонсогдох боллоо. Мөн аймгийн Засаг дарга А.Эрдэнэбаатар, ИТХ-ын дарга
Т.Болдбаатар, Эрүүл мэндийн дэд сайд асан Ж.Цолмон, \”Эрэл”-ийн Б.Эрдэнэбат нарын
нэрүүд ч сонсогдож байна. Харин АН-аас УИХ-ын гишүүн Ц.Оюунгэрэл, аймгийн АН-ын
дарга Ч.Батцогт нарыг дэвшүүл магадгүй байгаа аж.

Булган аймаг

Анхдагчдын өлгий нутагт ч
ширүүн тулаан өрнөх шинжтэй. Тус аймагт УИХ-ын гишүүн Ё.Отгонбаяр \”босоо
аварга”. Гэвч түүнтэй Монгол түмний хайртай хүү, олимпийн аварга, Хөдөлмөрийн
баатар Н.Түвшинбаяр өрсөлдөх тухай яриа гарах боллоо. Түүнийг Женко Х.Баттулга
УИХ-д сойж байгаа гэх. Булганчууд гэлтгүй, Монголчууд Н.Түвшинбаярт \”хайртай”.
Тэгэхээр түүнд итгэл үзүүлж, \”босоо аварга” Ё.Отгонбаяр өвдөг шороодож мэдэх л
юм. Гэвч гол тулаанд тэднээс гадна дэд сайд асан Ц.Гарамжав, аймгийн Засаг
дарга Д.Эрдэнэбат, УИХ-ын гишүүн асан Ц.Цэнгэл, УИХ-ын гишүүн асан Э.Мөнх-Очир
нарын хүчтэй өрсөлдөгчдийн нэрс сонсогдох боллоо.

Орхон аймаг

Эрдэнэт хотын сонгогчид хэнийг
ч сонгож мэднэ. Гэхдээ л Ш.Отгонбилэг агсан болон түүний гэр бүлийнхэнд итгэл
үзүүлэхдээ хэзээ ч татгалздаггүй. Тиймээс л О.Содбилэг 2012 онд үнэмлэхүй ялалт
байгуулж, Эрдэнэтчүүдээ төлөөлөх болсон. Харин түүнтэй хамт МАХН-ын гишүүн
Л.Цог сонгогдсон. Гэвч сонгогч түмнийхээ итгэлийг аль эрт \”алдчихжээ”. Тэгвэл
энэ сонгуулиар О.Содбилэг ямартай ч нэр дэвшинэ. Харин түүнтэй УИХ-ын гишүүн
М.Батчимэг, УИХ-ын гишүүн асан Д.Дамба-Очир, УИХ-ын гишүүн асан Л.Гүндалай,
Эрдэнэт үйлдвэрийн орлогч захирал С.Сувдаа нарын нэр яригдаж байна. УИХ-ын
гишүүн асан Л.Гүндалай өөрийн сурталчилгааг маш идэвхтэй хийсээр байгаа.

Архангай аймаг

Архангайд \”цус асгарна” гэж
сонгогчид дүгнэж байна. Ихэнхдээ л АН, МАН-д саналаа хувааж өгөх нь бий. Өнгөрсөн
сонгуулиар Сангийн сайд Б.Болор, УИХ-ын гишүүн Б.Батбаяр нарт итгэл үзүүлсэн.

Тэгвэл ирэх сонгуулиар МАН
Архангай аймгийн хоёр мандатыг авахаар хөрөнгөтэй, нэр нөлөөтэй хүмүүсээ сойж
байна. Жишээ нь МАН-ын генсек Ж.Мөнхбат, НАМЗХ-ны ерөнхийлөгч, ГОК-ын дарга
асан Ч.Ганзоригийн хүү Г.Тэмүүлэн нар Архангайд нэр дэвших тухай яригдаж байна.
Харин МАХН-аас УИХ-ын гишүүн Д.Тэрбишдагва хүч үзэж магадгүй сурагтай.

Өвөрхангай аймаг

Өвөрхангай аймгийн хоёр
мандатын төлөө АН-аас УИХ-ын гишүүн Г.Батхүү, аймгийн намын дарга И.Мөнхжаргал,
Үндэсний телевизийн гүйцэтгэх захирал асан, Баялаг бүтээгчдийг дэмжих холбооны
ерөнхийлөгч Ч.Даваабаяр нар нэр дэвшихээр яригдаж байна. Харин МАН-аас УИХ-ын
гишүүн Я.Содбаатар, Хөдөлмөрийн сайд асан С.Чинзориг, аймгийн Засаг дарга
Д.Тогтохсүрэн нарын нэрс тодроод байгаа аж. Ерөнхийдөө тэдний дунд \”тулаан”
болно.

С.Чинзоригийн хувьд
Г.Батхүүгээс даагаа нэхсэн сонгууль болох болов уу. Мөн байсхийгээд л төрийн
ордоны гадаа цуглаж, эсэргүүцэж илэрхийлдэг байсан сонгогчид хэнд саналаа өгөх
нь энэ удаагийн сонгуулиар тодорхой болно.

Баянхонгор аймаг

Баянхонгор аймгаас Х.Баттулга,
Д.Ганбат нар сонгогчдын итгэлийг хүлээж сонгогдсон. Тэд энэ удаад ч нэр дэвших
нь тодорхой болоод байгаа. УИХ-ын гишүүн Д.Ганбатын хувьд \”битон” зэрэг
тараагаад өөрийнхөө сурталчилгааг эхлүүлчихсэн. Тэгвэл тэдэнтээ УИХ-ын гишүүн
асан Г.Занданшатар, Д.Очирбат, аймгийн МАН-ын хорооны дарга Л.Элдэв-Очир нар \”хүч
үзэх”-ээр болоод байгаа аж.

Баянхонгорчууд Х.Баттулгад
итгэл хүлээлгэх \”дуртай”. Гэхдээ энэ жил Х.Баттулгад харш байгаа тиймээс
сонгогчдын санал хаашаа эргэхийг сонгуулийн маргааш л мэдэгдэнэ дээ. Үргэлжлэл
бий.