Баруун таван аймагт хэн, хэн нэр дэвших вэ?

2016 оны УИХ-ын
сонгууль хоног хоногоор ойртсоор л байна. УИХ-д суудалтай намуудын олонхийн
саналаар сонгуулийн тухай хуулиа баталгаажуулсан. Гэвч тус хуулийг батлахдаа
Үндсэн хууль зөрчсөн байж болзошгүй зарим асуудлыг иргэд ярих боллоо. Гэсэн ч
сонгууль явагддагаараа явагдаж, иргэд саналаа өгдөгөөрөө өгнө. Тиймээс бид ирэх
сонгуульд нэр дэвшихээр санаархаж байгаа эрхмүүдийг танилцуулж байгаа юм. Зүүн,
Төв, Хангайн бүсүүдэд нэр дэвших хүмүүсийг танилцуулсан бол энэ удаад Баруун
таван аймагт нэр дэвших, нэр дэвшихээр санаархаж буй хүмүүсийг танилцуулья.

 

Завхан аймаг

 

Отгонтэнгэр
хайрханы өлгий Завхан нутгийн хоёр мандатын төлөө улаан, цэнхэрүүдийн тулаан
өрнөнө. Тодруулбал, АН-аас УИХ-ын гишүүн Я.Санжмятав, Төрийн банкны захирал
Д.Батсайхан, Санхүүгийн зохицуулах хорооны дарга асан З.Нарантуяа нар нэр
дэвшихээр яригдаж байгаа. Тэгвэл МАН-аас УИХ-ын гишүүн Д.Оюунхорол, \”Нарантуул”-ын
босс Ш.Сайхансамбуу, дүү Ш.Батсамбуу, Завхан аймгийн нутгийн зөвлөлийн дарга
Б.Энхболд нарын нэрс сонсогдож байна. Мөн аймгийн Засаг дарга Ж.Жамьянтив,
УИХ-ын гишүүн асан Д.Балдан-Очир нарын нэр ч дуулдах боллоо.

 

Говь-Алтай аймаг

 

Тус аймаг
сонгуулийн чимээнээр \”гүйдэлтэй” болоод байгаа. Энэ \”гүйдэл” нь Гадаад хэргийн
сайд Л.Пүрэвсүрэн юм. Өөрөөр хэлбэл тэрээр ирэх сонгуулиар Говь-Алтай аймагт
АН-аас нэр дэвших нь тодорхой болоод байгаа юм. Тэгвэл түүнтэй аймгийн Засаг
дарга О.Амгаланбаатар, ТЕГ-ын дарга асан Б.Ариунсан нар зуузай холбох нь.
О.Амгаланбаатарыг цэвэр усан дээр сурталчилгаагаа байршуулдаг гэдгээр нь иргэд
сайн мэддэг болсон.

Тэгвэл тэдэнтэй
МАН-аас УИХ-ын гишүүн Ж.Энхбаяр, УИХ-ын гишүүн Ц.Дашдорж нар өрсөлдөх нь. Гол
тулаан энд л явагдах байх гэж харж байгаа. Гэхдээ тэднээс гадна Максын
Д.Ганбаатар, \”Алтай констракшн”-ын Х.Бат-Эрдэнэ нарын хөрөнгөтнүүд өрсөлдөж
магадгүй. Мөн Н.Энхбаярын өмгөөлөгч Б.Оюунбилэгийн нэр ч Говь-Алтайн тойрогт
яригдаж байгаа аж.

 

Увс аймаг

Увс аймаг
МАН-ынханд талтай. УИХ-ын гишүүн Ц.Нямдорж Увсад нэр дэвшвэл заавал ялалт
байгуулдаг. Харин түүнийг дэвшээгүй үед Б.Чойжилсүрэн, Ч.Хүрэлбаатар нар яаж
ийгээд л ялдаг болж. \”Мөнгө тараагаад ч болов”. Тэгэхээр энэ жил Б.Чойжилсүрэн,
Ч.Хүрэлбаатар нар дахин нэр дэвшинэ гэдэгт эргэлзэх зүйл алга.

Харин тэдэнтэй
Ерөнхий сайд асан Н.Алтанхуяг, БСШУ-ны сайд Л.Гантөмөр нар өрсөлдөж магадгүй.
Мөн аймгийн АН-ын дарга О.Цогтгэрэл, аймгийн Засаг дарга Д.Цэндсүрэн нар нэр
дэвшинэ гэх мэдээлэл бий. Тэдэнтэй МУГЖ, дуучин С.Жавхлан өрсөлдөнө гэдгээ аль
эрх мэдэгдсэн. Иймэрхүү өрсөлдөөн Увсын тойрогт өрнөх шинжтэй.

 

Ховд аймаг

Ховдын сонгогчид
2012 онд \”баз хүргэчүүд”-д итгэл хүлээлгэсэн. Тэд энэ жил ч дахин өрсөлдөх биз.
УИХ-ын гишүүн С.Бямбацогтын гол өрсөлдөгч нь мэдээж, УИХ-ын гишүүн АН-д элссэн
Д.Батцогтыг гэж хардаг.

Тэгвэл энэ хоёр
эрхэмтэй Ш.Адьшаа өрсөлдөнө гэдгээ мэдэгдсэн. Мөн Монголбанкны Ерөнхийлөгч
н.Пүрэвдоржийн хүү П.Хангал нэр дэвшихээ мэдэгдэж, мөнгө тарааж яваа гэх
мэдээлэл зарим сайтуудаар цацагдах болсон юм.

Мөн сумоч
Д.Батбаяр, Гадаад иргэн харьяатын газрын дарга асан Б.Пүрэвдорж, Ховд аймгийн Хөдөлмөр халамжийн үйлчилгээний хэлтсийн
дарга асан
У.Батзаяа, Монголын Либерал намын дарга Б.Амгаланбаатар зэрэг хүмүүсийн нэрс
сонгогдож байна.

 

Баян-Өлгий аймаг

 

 

Тус аймагт МАН-аас УИХ-ын гишүүн А.Тлейхан, УИХ-ын гишүүн
асан Х.Баделхан, Хүнс хөдөө аж ахуй, хөнгөн үйлдвэрийн дэд сайдаар ажиллаж
байсан Ж.Сауле, тус аймгийн МАН-ын хорооны дарга Х.Солтан нар нэр дэвшихээр яригдаж байна. Харин АН-аас УИХ-ын гишүүн, Төрийн
байгуулалтын байнгын хорооны гишүүн А.Бакей болон Зам тээврийн дэд сайд
Х.Ержан, Баян-Өлгий аймгийн засаг дарга Х.Дармен, тус аймгийн ИТХ-ын дарга
Б.Лазатхан нар нэр дэвших \”албан
бус” тов гарчээ. Өрсөлдөөн хэрхэн үргэлжлэхийг цаг хугацаа л харуулна. Үргэлжлэл бий

 

А.Аюуш