2018 он гарсаар улсын хэмжээнд 163 хүний амь нас хохирсон байна. Ослын 76 хувь нь орон нутгийн замд бүртгэгдсэн. Орон нутгийн замд гарч буй осол нь дийлэнхдээ жолооч аюулгүй байдлыг хангаагүйгээс үүдэлтэй гардаг. Авто тээврийн үндэсний төвийн дэд захирал Ш.Батсайхантай ярилцлаа.
-Орон нутгийн замд зам тээврийн осол гэмт буурахгүй байна. Танайхаас орон нутгийн зам дээр осол гэмтлийг бууруулах тал дээр хэрхэн анхаарч ажиллаж байна вэ?
– Манайх жилдээ 4-5 удаагийн төлөвлөгөөт хяналт шалгалтыг цагдаагийн байгууллагатай хамтарч хийж байгаа. Тухайлбал, Оюутан тээвэр 1,2, цагаан сарын тээвэр гэх зэрэг хяналт шалгалтыг явуулдаг. Энэ шалгалтын үед осол саатал гаргах, хурд хэтрүүлэх бага болдог. Харин зуны дэлгэр цагт аялал зугаалгын үе хэлж, хяналт шалгалт суларсан гэдэг үүднээс осол аваар нэмэгдээд эхэлдэг. Иймээс бид Замын цагдаагийн хамт олон хамтарч “Орон нутгийн зам-Хөдөлгөөний соёл 2018” аяныг зохион байгуулж байна. Иргэдэд байнга мэдээлэл өгөх, дамжин өнгөрч байгаа болон төв суурин газруудад хяналт шалгалтыг явуулж байгаа. Мөн байнга байрлаж ажиллах шаардлага байгаа учраас 27 постыг барьж байгуулна.
Өнгөрсөн оны улсын төсвөөс 27 постыг тавих мөнгийг шийдвэрлэж өгсөн. Мөн Авто тээврийн үндэсний төв тоног төхөөрөмж авахаар хөрөнгө орлогын төлөвлөгөөнд 568 сая суулгаж, хурд хэмжигч болон бусад шаардлагатай тоног төхөөрөмж авахаар замын цагдаагийн газартай хамтарч ажиллаж явж байна.
Хөвсгөлөөс Улаанбаатарын чиглэлийн автобус цахилгаанаас болж шатсан байгаа
-Хот хооронд явж байгаа томоохон автобуснууд хэр зөрчил гаргаж байна вэ. Саяхан Дархан сургууль хүүхэд тээвэрлэж явсан автобус осол гарсан. Мөн Хөвсгөл аймгаас ирж байсан автобус шатсан асуудал гарсан. Энэ нь юунаас болсон байсан вэ?
-Орон нутагт үйлчилж байгаа томоохон автобуснууд осол аваар гаргах нь харьцангуй бага байдаг. Манайхаас хурд хэмжигчээр хяналт тавьж байгаа учраас орон нутагт руу явж байгаа автобуснууд хурд хэтрүүлэхгүй явж байгаа.
Орон нутгийн автобус шатсан асуудал дээр манайхаас улсын байцаагч газар дээр очиж ажилласан. Хөвсгөлөөс Улаанбаатарын чиглэлийн автобус цахилгаанаас болж шатсан байгаа. Зорчигчид ямар нэгэн хохирол учраагүй. Зорчигчдыг хотоос автобус гаргаж, очиж авч ирсэн. Анги хамт олноор явж байгаа осол орох асуудал гарсан байгаа. Энэ нь хөдөлгөөний удирдлагын төвд бүртгэгдээгүй, хувийн тээврийн хэрэгсэл хөлсөлж явсан байдлаас гарсан. Одоо дамжин өнгөрч байгаа хяналт шалгалтыг сайжруулаад явахаар зөрчил бага болно.
-Орон нутгийн автобуснууд хурд хэмжигчээр хяналтыг тавьж байгаа. Автобусны жолооч нар тавьсан хурд хэмжигчийг авах тохиолдол гарч байна уу?
-Манайх зуун хувь хянаж байгаа. Өнгөрсөн онд хурд хэмжигчийг салгасан нэг л тохиолдол гарсан. Өөр салгасан тохиолдол гараагүй .
Замын цагдаагийн алба хөдөлгөөн есөн хяналтын постыг ажиллуулахаар бэлтгэж байна
-Шинээр 27 постыг тавьж байгаа. Энэ постууд осол аваар их гарч байгаа цэгүүд тавьж байгаа юу. Эсвэл дамжин өнгөрөх цэгүүдэд тавьж байгаа юу?
-Ер нь осол аваар гарч байгаа цэгүүдэд болон аймаг орон нутгийг дамжин өнгөрч байгаа зангилаанууд дээр пост тавигдана. Энэ постыг судалгаан дээр тулгуурлан тавьж байгаа. Мөн замын цагдаагийн алба хөдөлгөөн есөн хяналтын постыг ажиллуулахаар бэлтгэж байна. Энэ жилээс эхлээд хяналт шалгалтыг цогцоороо хийдэг болж байгаа. Шинээр хийгдэж байгаа постод мэргэжлийн хяналт цагдаа, авто тээврийн үндэсний төв байнга ажиллана. Мөн шаардлагатай үед онцгой байдлын алба хаагчид байрлаж болохоор шийдвэрлэж байгаа юм.
-Одоо зургаан сар дундаа орж байна. Замын постууд хэзээнээс тавигдаж эхлэх вэ?
-Аймаг орон нутаг руу Хууль зүйн сайдын багцаас мөнгөн шилжсэн. Аймаг орон нутагт хуулийнхаа дагуу тендер зарлагдаад явж байгаа.
-Шинээр хийгдэж постууд энэ жил багтаж ашиглалтад орох уу?
-Энэ жилдээ багтаад ашиглалтад орно. Тоног төхөөрөмж авах ажлын хэсэг манай яам дээр гарсан байгаа. Ажлын хэсэгт цагдаагийн албанаас мэргэжил ороод ажиллаж байна
