Гааль татварын ерөнхий газрын НӨАТ-ын урамшууллын систем төслийн захирал Р.Отгонтулгатай уулзаж, цаг үеийн асуудлаар ярилцлаа.![\"\"](http://undesten.mn/uploads/posts/2016-03/1458959375_5bc781aa-9c42-489c-94b0-095e518fb486.jpg "\\"\\"")
-Өнөөдөр дөрвөн сая төгрөгийн азтануудад батламж гардуулж байна. Мөнгийг нь яг хэзээ олгох вэ?
-Юуны өмнө нэг зүйлийг онцлон яримаар байна. Энэ удаагийн тохирлоор 400 саяын азтан тодорсон боловч азтан болсон иргэн маань баримтаа бүртгүүлээгүй байгаа учир шагналыг гардуулан өгч чадахгүй байна. Тиймээс та бүхэн баримтаа идэвхтэй бүртгүүлээрэй. Өнөөдөр дөрвөн сая төгрөг хожсон иргэд хүрэлцэн ирж, батламжаа гардан авлаа. Сугалаанд хонжвор хожсоноос 20 хоногийн дотор дансанд нь хонжворын мөнгө орох болно.
-Баримт олгохгүй байгаа аж ахуйн нэгжүүд цөөнгүй бий. Ихэвчлэн жижиг аж ахуйн нэгжүүд байгаа. Тэдний бэрхшээл нь кассын машин авахад үнэтэй байна гэх тайлбар өгч байгаа?
-Жижиг бизнес эрхлэгчдэд бид тохиромжтой санал дэвшүүлж байгаа. Тухайн аж ахуйн нэгжүүдийн гол бэрхшээл нь өндөр үнэтэй картын машин авах. Бидний зүгээс шийдлийг хэлж байгаа. Кассын машин нийлүүлэгч байгууллагуудын 5000, 10000 төгрөгийн маш хямдхан шийдлүүдийг санал болгож байгаа. Ер нь зарчмын хувьд иргэд маань үүн дээр маш идэвхтэй оролцох ёстой. Энэ бол ямар нэгэн хуулиар далайлгаж хийдэг ажил биш. Иргэд хэр оролцоотой байна, төдий чинээ иргэдэд боломж гарч ирж байгаа юм. Хамгийн гол нь хуулийн дагуу олгогдсон,. иргэдэд очих ёстой тэр боломжуудыг бизнесийн байгууллагууд маань аливаа нэгэн технологийг сонгоод аль болохоор иргэддээ баримтаа өгөх шаардлагатай. Тухайн хүн худалдан авалт хийснийхээ төлөө баримт авах нь хувь хүний эрх.
-5000, 10000 төгрөгийн шийдлүүд байна гэлээ. Үүнийгээ дэлгэрүүлэхгүй юу?
– Дүнжингарав худалдааны төв дээр кассын машины үзэсгэлэн гарсан байгаа. Үзэсгэлэн яармаг дээр кассын машины компаниуд танилцуулга хийж байгаа. Тэндээс илүү дэлгэрэнгүй мэдээлэл авах боломжтой.
-Баримт өгөхгүй байгаа дэлгүүрүүдийг хаана мэдээлж болох вэ?
-1800-1288 гэсэн утас ажиллаж байгаа. Иргэд маань энэ утсаар дамжуулж, санал хүсэлт гомдлоо ирүүлэх хэрэгтэй.
-Маш олон мянган хүн азтанаар шалгарлаа гэж байна. Гэвч хонжвороо авч байгаа хүн цөөхөн байна!
-Бид мэдээллийн сувгуудыг нэмэгдүүлж, НӨАТ-ын урамшууллын талаар мэдээллүүдийг хүртээмжтэй өгч байгаа. Иргэдийг энд идэвхтэй оролцуулахад бидний хийж байгаа хамгийн гол ажил бол технологийн шийдэл. Саяхан андройд-ын аппликейшн гарчихлаа. Ингэснээр технологийг илүү хурдан ашиглах боломж бүрдэж байгаа юм. Цаашлаад бид картын технологи руу оруулахаар ажиллаж байна. Нийтдээ долоон удаагийн тохирлоор 70 гаруй мянган азтан тодроод явж байна. Үүний 10 хүрэхгүй хувь нь ebarimt.mn-д бүртгүүлж, мөнгөө авсан. Сүүлийн өдрүүдэд энэ тоон үзүүлэлт маань улам сайжирч байна. \”400 саяын азтан” гэсэн энэ мессэжээр үнэхээр энэ баримт маань мөнгө болдог байсан юм байна гэдгийг одоо л иргэд маань ойлгож эхэлж байгаа учраас иргэдийн идэвх сайжирч байна.
– 400 саяын эзэн олдохгүй бол яах вэ?
-Мэдээж бид журмын дагуу гурван сарын хугацаанд хүлээнэ. Гэхдээ бас харамсалтай байгаа байхгүй юу. Хувь хүний хариуцлагын тухай асуудал. Гаргаж байгаа баримт болгон тань мөнгө болох магадлалтай гэдгийг ойлгохгүйгээс болж, хаяж үрэгдүүлсэн бол дараа, дараагийн хүмүүс маань үүн дээр сургамж авах хэрэгтэй. Гэхдээ супер азтаны талаар одоо дүгнэж ярих цаг нь биш. Хугацаа байна. Гурван сарын дараа бид үүнийг дүгнэж ярих хэрэгтэй.
-Төгсгөлд нь тэс хөндлөн нэг юм асууя. Гааль татварын ерөнхий газрын НӨАТ-ын урамшууллын систем төслийнхнийг доллараар цалинждаг гэсэн яриа гарсан. Та үүнийг сонссон уу. Энэ тал дээр юу хэлэх вэ?
-Уг нь тэгж цалинждаг бол сайхан л байна. Тэр бол нэлээн дэгсдүүлсэн мэдээлэл гарсан байна лээ. Монголд тийм цалин авдаг хүн цөөхөн ш дээ. Ийм албан бус мэдээлэлд иргэд маань битгий автаасай. Үнэн бодит байдлыг Гааль татварын ерөнхий газар болон Сангийн яамнаас тодруулах нь зүйтэй.
С.Баяр
Эх сурвалж: Breakingnews.mn
