Осол гардаг замуудыг зөөврийн камераар хянаж байна

 

Нийслэлийн гудамж ихэнх нь камертай болсноор жолооч нарын дэг журам сайжирч, зөрчил буурсан гэж Замын цагдаагийнхан дүгнэжээ. Гэвч хянах боломжгүй замууд мэр сэр байна.

Тухайлбал: Яармаг, Гачуурт, Налайх, Нисэхийн чиглэлийн замуудад жолооч нар хурд хэтрүүлэн давхидаг нь хэвээр байсан тул эдгээр замд зөөврийн камер байрлуулж, бүрэн хянаж эхэлжээ.

Зөөврийн камерыг ажиллуулж эхэлснээс хойш нийтдээ 776 зөрчил илрүүлж, 202 жолоочийн эрхийг хасчээ.  Мөн Яармагийн замд илрүүлсэн зөрчлийн багагүй хувь нь  150 км/ц-ийн хурдтай явсан нь зөөврийн камерт бичигджээ. Гол нь зөөврийн камерыг замын хаана ч байрлуулах боломжтой учраас жолооч нарт харагдахгүй байсан ч зөрчлийг илрүүлэх боломжтой юм байна. 

Хяналтгүй гэж бодсон замуудад хурд хэтрүүлдэг ч жолооч нарын зөрчил жил ирэх тусам буурч байгааг ЗХУТ-ийнхөн онцоллоо. 2013 онд өдөрт 3000 гаруй жолооч хурд хэтрүүлж, тэр хэмжээний гэрлэн дохионы зөрчил бүртгэгддэг байжээ. Харин 2016 оны гуравдугаар сарын 25-ны байдлаар  авч үзэхэд хурд хэтрүүлсэн 73, гэрлэн дохио зөрчсөн 297 зөрчил бүртгэгджээ. Өөрөөр хэлбэл, 3000 хүрч байсан зөрчлийн тоо 73 болтлоо буурчээ. Замын хөдөлгөөний шинэ хууль мөрдөж, зөрчлийн оноо  тооцож эхэлснээр жолооч нарын сахилга бат эрс сайжирсан талаар Замын цагдаагийн газрын Урьдчилан сэргийлэх хэлтсийн дарга Э.Бөхбат мэдээллээ. Өнгөрсөн оны эхний хоёр сард замын хөдөлгөөний 140 мянга гаруй осол бүртгэгджээ. Харин энэ тоо 2016 оны мөн үеийнхээс 44 мянгаар буурч,  96 мянга болжээ. Согтуугаар автомашин жолоодсон иргэдийн тоо 4000 байсан бол 2800, 600 гаруй хүн гэмтсэн осол гарч байсан бол 400 гаруй болтлоо буурчээ.

Өнгөрсөн оны өдийд 17 хүн зам тээврийн ослоор амиа алдсан бол энэ онд найман хүн амиа алджээ.  2015 оны хоёр сард 2200 гаруй машиныг журамлаж байсан бол энэ онд 600 болж буурчээ. Ийнхүү жолооч нарын сахилга бат сайжирсан байна. Замын хөдөлгөөний дүрэм, журам, торгууль зэрэг нь эргээд тухайн жолоочийн аюулгүй байдлыг хангасан, эрсдэлд оруулахгүйн төлөөх цогц үйл ажиллагаа гэдгийг ойлгож, дүрэм журмаа мөрдөхийг ЗЦГ-аас санууллаа.

Нинж