ЗГХЭГ-ын дарга Г.Занданшатар Засгийн газрын хуралдаанаар хэлэлцсэн асуудлаар өнөөдөр мэдээлэл хийлээ. Тэрбээр “Энэ оны нэгдүгээр сараас хойш Оюутолгойн гэрээ, хэлцлийг сайжруулах зорилгоор олон удаагийн яриа хэлэлцээрийг Оюутолгой, “Рио Тинто” групптэй хийлээ. Удаан хугацааны яриа хэлэлцээрийн үр дүнд Монгол Улсын ногдол ашиг хүртэх хугацааг наашлуулах манай талд үзүүлж буй эдийн засаг, зээлийн хүүгийн дарамтыг бууруулах гэсэн таван үндсэн зарчмаар тохиролцож, харилцан ойлголцлын санамж бичигт гарын үсэг зурахаар боллоо. Ингэснээр Оюутолгойн гэрээ илүү ашигтай болох суурь нөхцөл бүрдэж байна. Үүний үр дүн зээлийн хүү буурснаар хэрэгжинэ.
Оюутолгойгоос манай улсын эзэмшиж буй 34 хувь нийлүүлэгчдийн зээлээр санхүүждэг. Санхүүжилтын гэрээ өндөр хүүтэй байсан. Энэ өндөр хүүг бууруулах зарчмын шийдэл тохиролцоонд хүрч байна. Яг хэд болгож бууруулах асуудлаар одоохондоо тохироогүй байна.
Оюутолгой компанийг эрчим хүчээ Монголоос авах ёстой гэсэн маргаан байсан. Оюутолгой компани 150 орчим сая долларын цахилгаан эрчим хүчийг импортоор авч ашиглаж байна. Тийм учраас цахилгааныг дотоодоос авах ёстой гэсэн шаардлагыг хүргүүлсэн. Харин одоо Тавантолгойд цахилгаан станц барих, дотоодын эрчим хүчийг бусад найдвартай эх үүсвэрээр хангах бололцоо байвал авах зарчмын шийдэлд хүрсэн.
Мөн хөрөнгө оруулалтын гэрээ, Дубайн төлөвлөгөө зэргийг үндэслэж татварын маргаантай асуудал гарсан байсан. 35 сая долларын татвар төлүүлэхээр боллоо. Гэхдээ нийт тавигдаад байгаа татварын акт дээр санал зөрөлдөөнтэй байгаа учраас арбитраар шийдвэрлэх болно. Нийт 150 сая долларын татварын асуудал хөндөгдөж байгаа. Энэ чиглэлээр бид УИХ-ын ажлын хэсэгтэй хамтарч гадаадын мэргэжилтнүүдийг Засгийн газрын шугамаар урьж ажиллуулах болно” гэлээ.
Эдийн засаг гэнэт сайжирна гэж байхгүй
Мөн 2016-2020 онд хэрэгжүүлэх Засгийн газрын мөрийн хөтөлбөрийн хэрэгжилт, 2018 онд Монгол улсын нийгэм, эдийн засгийг хөгжүүлэх үндсэн чиглэлийн хэрэгжилтийн талаар мэдээлэл өглөө. Энэ талаар “Засгийн газрын мөрийн хөтөлбөрийн хэрэгжилтийг дүгнэхийн тулд бүх яамны ажлын тайланг авч дүгнэлт хийсэн. Яамны үйл ажиллагааны хэрэгжилтийг цаашид эрчимжүүлэхийн тулд тодорхой шийдвэрүүдийг авч хэрэгжүүлэхээр болсон.
Монгол Улсын эдийн засгийг хөгжүүлэх үндсэн чиглэл эхний хагас жилийн байдлаар 50.9 хувьтай хэрэгжиж байна Мөн эхний хагас жилийн байдлаар Засгийн газрын мөрийн хөтөлбөр 47.9 хувьтай хэрэгжиж байна. Мөрийн хөтөлбөрийг хэрэгжүүлэхэд санхүүгийн тулгамдсан асуудлууд бий. Мөрийн хөтөлбөрийг бүрэн хэрэгжүүлэхэд 67.6 их наяд төгрөг хэрэгтэй. Тиймээс зайлшгүй хийх шаардлагатай гол асуудлуудаа хийхээр ажиллаж байна.
Засгийн газрын мөрийн хөтөлбөрийн хэрэгжилт сайн байна гэж дүгнэж байна. Эдийн засгийн өсөлт 6.3 хувьд хүрсэн. Нэгдсэн төсвийн тэнцэл 291.3 тэрбум төгрөгийн ашигтай гарсан. Инфляцийн түвшин 8 хувьд хүрсэн нь эдийн засгийн өсөлт юм. Ажилгүйдлийн түвшин буурч 7.5 хувьд хүрлээ. Гадаадын шууд хөрөнгө оруулалт 879 сая доллараар өссөн. Монгол улсын гадаад өр 21.1 их наяд төгрөг хүрч буурлаа. Зам барилга, бүтээн байгуулалт, уул уурхайн ажлууд эрчимжиж байна. Ерөнхий сайдын БНХАУ-д хийсэн айлчлалын үр дүнд хилийн боомтуудын нэвтрэх чадвар сайжирч нүүрсний экспорт хоёр дахин нэмэгдсэн.
Нийт экспортын 40 хувийг нүүрсний экспорт эзэлж байна. Оны эхний хагас жилийн байдлаар 1.4 тэрбум долларын нүүрс экспортлоод байна. Оны эцэст 4 тэрбум долларын нүүрсийг экспортлоно. Яам бүрээр хэрэгжилт удааширалтай байгаа ажлуудыг эрчимжүүлэхийн тулд бүхий л арга хэмжээг авч ажиллана. Засгийн газраас төрийн зарим албан хаагчийн цалинг нэмсэн. “Ноолуур” хөтөлбөрийн хүрээнд малчид өрнөөсөө салж хадгаламжтай болсон байна.
Ноос, ноолуурын үнэ өндөр болсноос үүдэн малчдын амьдрал дээшилсэн. Бид одоо мах экспортлоно. Шатахууны үнэ нэмэгдсэн нь биднээс хамаарахгүй хүчин зүйлээс шалтгаалж байна. Дэлхий дээр үнэ өсч байгаа учраас бид нар яаж ч чадахгүй. Эдийн засаг сайжирахын хэрээр ипотекийн зээл өргөжинө. Бид таван жилийн хугацаанд тавигдсан өрийг төлөхөөр ажиллаж байна. Тиймээс эдийн засаг гэнэт сайжирна гэж байхгүй” гэлээ.
