НМХГ-аас нийслэлд эх барих, эмэгтэйчүүдийн чиглэлээр үйл ажиллагаа явуулж байгаа эмнэлгүүдийн хууль бус үр хөндөлтөөс урьдчилан сэргийлэх хяналт шалгалт хийжээ. Уг шалгалтын үр дүнг танилцуулж мэдээлэл хийлээ.
Хяналт шалгалтыг иргэдийн мэдээллийн мөрөөр, утсаар, удирдах дээд байгууллагаас өгсөн үүрэг даалгаварын дагуу 46 эмнэлгийг хамруулан хийсэн байна. Үүнээс 32 нь СБД-т байрладаг бөгөөд өөрөөр хэлбэл СБД-ийн эх, эмэгтэйчүүдийн чиглэлээр үйл ажиллагаа явуулдаг эмнэлгүүдийг 100 хувь шалгалтад хамруулсан аж. Илэрсэн зөрчлүүдээс дурьдвал:
-“Энхлэх”, “Сүүжин”, “Ач арвижих”, “DLO”, “Энх манал” эмнэлгүүд тусгай зөвшөөрөлд заагдсан хаяг байршилдаа үйл ажиллагаа явуулдаггүйг тогтоожээ. Эдгээр эмнэлгийн зөвшөөрлийг түтгэлзүүлэх саналыг НЭМГ-т хүргүүлсэн.
-Тусгай зөвшөөрөлд заагдсанаас өөр чиглэлээр үйл ажиллагаа явуулж байсан эмнэлгүүдийг мөн илрүүлсэн.
-Эмч нар эмчлэх, сувилах, эх барих үйл ажиллагаа явуулах эрх бүхий байгууллагын зөвшөөрөлтэйгээр үйл ажиллагаа явуулах ёстой. Гэтэл “Бяцхан гүнж”, “Цэцэгс”, “Цэцэн гоо“ эмнэлгүүдэд тусгай зөвшөөрөлгүй эмч нар ажиллаж байсан зэрэг зөрчлүүдийг илрүүлэн ажилласан байна.
“Өргөө” амаржих газар, “Баянгол” ЭМН-ийн дарга нарт эмч нарын талаар албан тоот хүргүүлсэн
Өргөө амаржих газрын эмэгтэйчүүдийн эмч нар өөрийн нэр дээр 12-6 жилийн хугацаанд тусгай зөвшөөрөл бүхий эмэгтэйчүүдийн эмчилгээ ажиллуулсан нь судалгаагаар тогтоогдсон гэлээ. Гэхдээ энэ нь дээрх хяналт шалгалтын чиг үүрэгт хамаарагдаагүй аж. Тухайн эмч нар улсын эмнэлэгт оношлогоо хийгээд, хувийн эмнэлэгт төлбөртэйгээр, дээр дурьдагдаад байгаа эмчилгээнүүдийг хийдэг, зөрчил гаргадаг, эсвэл хувийн эмнэлэг дээрээ оношлогоо хийгээд улсын эмнэлэгт эмчилгээ хийдэг энэ ажиллагааны хооронд хувийн ашиг сонирхлын зөрчлүүд байгааг үгүйсгэхгүй гэдгийг мэдээллийн үеэр тодотгон тайлбарлалаа. Тиймээс СБД-ийн мэргэжлийн хяналтаас “Өргөө” амаржих газар болон “Баянгол” Эрүүл мэндийн нэгдлийн дарга нарт эмч нарын талаар албан тоотоор мэдэгдэж, тодорхой хариуцлага тооцож, хариу мэдэгдэх үүргийг өгчээ.
Хууль бус үр хөндөлтийн талаар ЭХЭМҮТ, “Амгалан” амаржих газарт судалгаа хийсэн байна. Ингэхэд хууль бус үр хөндөлтийн улмаас биеийн байдал нь хүндэрч ирсэн 21 тохиолдол /2018 оны эхний 8 сарын байдлаар/ бүртгэгджээ. Тэдний биеийн байдал хүндэрсэн шалтгааныг судлахад, 3 нь Эрээнээс, 2 нь интернэтээс, 3 нь Нарантуул захаас, 4 нь Зүүнхараагийн захаас, 2 хүн хувь хүнээс зулбуулах эм авч уусан гэжээ. Үүнээс 2 эмэгтэй умай цоорсон хүндрэлээр хагалгаанд орсон байна.
Үр хөндөлтийг магадлан итгэмжлэгдсэн тусгай зөвшөөрөлтэй эмнэлгүүд хийх ёстой. Гэтэл хяналт шалгалтын явцад БЗД-т байрладаг “Энхийн төлөө” гэх байгууллага тусгай зөвшөөрөлгүй, итгэмжлэлийн хугацаа дууссан байхад эмчилгээ үйлчилгээ явуулж байсныг илрүүлжээ. Үүний улмаас үйлчлүүлэгч Н-н биед хүндрэл гарч, улмаар “Амгалан” амаржих газарт хандаж, умай авахуулах мэс ажилбар хийлгэсэн жишээг дурьдлаа.
Хяналт, шалгалтаар илэрсэн зөрчил дээр нийт 4 хуулийн этгээд, 3 эмчид Зөрчлийн тухай хуулийн 6.7 дахь зүйлийн 7.2-т зааснаар арга хэмжээ авч, торгох шийтгэл ногдуулжээ. Тухайлбал, “Энхий төлөө” эмэгтэйчүүдийн эмнэлгийн тусгай зөвшөөрлийг цуцлуулах саналыг холбогдох газарт нь хүргүүлсэн бол зөрчилтэй эмч нарын лицензийг хүчингүй болгож, 500 мянган төгрөгөөр торгоно. Хуулийн этгээдэд 5 сая төгрөгийн торгууль ногдуулна.
Энэ онд Нарантуул захаас зулбуулах эм илрээгүй
Хууль бус эм нууц байдалд орсон учраас Эрүүгийн цагдаагийн газартай хамтран ажилладаг тухай НМХГ-аас тайлбар мэдээлэл өглөө. Сүлжээнд орсон учраас илрүүлэхэд төвөгтэй гэдэг утгаараа энэ онд захаас ямар нэгэн байдлаар зулбуулах эм илрээгүй гэв. Харин интернэт орчинд худалдаалагдаж байгаа эм, эмнэлгийн хэрэгсэлтэй холбоотой гомдлын дагуу шалгалт хийж, хэрэв эрүүгийн шинж чанартай байвал цагдаагийн байгууллагад шилжүүлэн шалгуулж ажилладаг байна.
Үр хөндөлт хийлгэсэн эмэгтэйчүүдийн 50 хувь нь дахин жирэмслэхэд ямар нэгэн асуудал гардаг, хүндрэл учирдаг, тэр дундаа анхны жирэмслэлтийг зогсоож, үр хөндвөл үргүй болох магадлал ихэсдэг гэсэн судалгаа байдаг. Тиймээс ард иргэд энэ асуудалд сэрэмжтэй хандахыг НМХГ-аас анхаарууллаа. Мөн Монгол Улсын эм бүртгэлд бүртгэлгүй үр зулбуулах эмийг хэрэглэхгүй байхыг санууллаа.
Одоогоор нийслэлийн хэмжээнд эх, эмэгтэйчүүдийн чиглэлээр үйл ажиллагаа явуулдаг 150, магадлан итгэмжлэгдсэн 45 эмнэлэг байна.
Үр хөндөлт хийлгэж байгаа хүмүүсийн 70 хувь нь ид нөхөн үржихүйн насны буюу 20-35 насны эмэгтэйчүүд байдаг гэсэн судалгаа байгаа нь манай орны хувьд маш харамсалтай үр дүн юм.
