Монгол улсын Ерөнхийлөгч асан Ц.Элбэгдорж өөрийн твиттер хуудсаар дамжуулан өөрийнх нь ажлын өрөөнд нэгжлэг хийсэн гэдгийг үгүйсгэж байгаа билээ. Харин хэвлэл мэдээллийн хэрэгслээр түүний ажлын өрөөнд Эрүүгийн цагдаагийн газраас гуравдугаар сарын 19-нд нэгжлэг хийхэд 1000 гаруй уран зураг байсан бөгөөд 30 гаруй нь дэлхийн болон Монголын үнэт уран зураг байсан хэмээн мэдээлж байгаа юм.
Тэгвэл дөнгөж сая энэхүү зурагнуудтай холбогдоод буй Ерөнхийлөгч асан Ц.Элбэгдоржийн эхнэрийн дүү Х.Болдбаатар мэдээлэл хийлээ. Тэрбээр “Гуравдугаар сарын 19-нд Хан-Уул дүүргийн цагдаагийн хэлтсээс над руу утасдаж таны уран зургийн архивыг шалгах гэсэн юм гэж хэлсэн. Би учрыг нь тодруулахад “Их тэнгэр цогцолбор, Маршал цогцолбороос алга болсон уран зургууд танай архивд байж магадгүй байна” гэж хэлсэн. Тэгээд би хуулийн дагуу нэгжлэг хийх зөвшөөрөл байгаа эсэхийг тодруулсан. Үүнээс нэг цаг гаруйн дараа Хан-Уул дүүргийн прокурорын зөвшөөрөлтэй ирсэн. Дүрслэх урлагийн бүтээл сонирхогчдын маш олон зургийг хадгалдаг манай архив руу 5-6 орчим цагдаа орж үзсэн. Үзлэгээр алга болсон гэх зургуудтай ойролцоо 10 зургийг авч явсан. Би иргэнийхээ хувьд архиваа үзүүлсэн. Монгол Улсын Ерөнхийлөгч асан Ц.Элбэгдорж гуайн ажлын өрөөнд нэгжлэг хийж зургийг авсан мэтээр хэвлэл мэдээллийн хэрэгслүүдээр ташаа мэдээлэл гарсан. Дүрслэх урлагийн бүтээл цуглуулагчдын нийгэмлэгийн архивд цагдаа нар нэгжлэг хийсэн” гэж мэдэгдлээ.
Х.Болдбаатар: Алга болсон зургуудтай ойролцоо 10 зургийг авч явсан
}
Шинэ мэдээ
