Ерөнхийлөгчийн уриалгад хоёр л хүн нэгджээ

Х.Баттулга Ерөнхийлөгчөөр томилогдсоныхоо дараахан 2017 оны долдугаар сарын 24 –нд улстөрч, төрийн албан хаагч, тэдний хамаарал бүхий этгээдүүдэд хандан оффшор данстай бол 49 хоногийн дотор мөнгөө эх орондоо оруулж ирэхийг уриалсан билээ. Хэрэв энэ хугацаанд мөнгөө оруулж ирвэл аливаа хариуцлага хүлээлгэхгүй гэдгээ ч мэдэгдсэн.
Түүний энэхүү уриалгад УИХ-ын гишүүн Б.Дэлгэрсайхан хамгийн түрүүнд нэгдэж, өөрийн хөрөнгийг эх орондоо татсан. Тэрээр “Би 24 жил бизнес хийхдээ эх орондоо 700 сая ам.долларын хөрөнгө оруулсан. Бизнес эрхлэхэд гаднаас хөрөнгө оруулалт татах зайлшгүй шаардлага гардаг. Үүний тулд оффшор бүсэд данс нээж мөнгө босгон компани байгуулдаг олон улсын жишиг бий. Энэ жишгийн дагуу 2007 онд оффшор бүсэд мөнгө босгож, монголд оруулж ирсэн” хэмээн тайлбарласан.
Харин Ерөнхийлөгчийн уриалгыг дэмжсэн хоёр дахь эрхэм бол “Петровис” ХХК-ийн ТУЗ-ийн дарга асан, охин компани нь болох “НИК” ХХК-ийн ерөнхий захирал асан Ч.Давааням. Тэрээр оффшор бүсэд байршуулсан өөрийн 4.3 сая ам.долларыг татан оруулж ирснээс хойш оффшор данснаас монголд сохор зоос ч орж ирсэнгүй. Хэдийгээр энэ хоёр эрхмийн дараа хэд хэдэн хүний нэр сонстож байсан хэдий ч одоогоор мөнгөө татсан тухай мэдээлэл байхгүй байна.
Гэтэл ОУВС болон Олон улсын Эдийн засгийн хамтын ажиллагааны байгууллагаас дэлхийн 42 улсыг “Оффшор бүс” хэмээн зарласан. Эдгээр улсуудад монголын 49 иргэн оффшор данстай хэмээн Олон улсын эрэн сурвалжлах сэтгүүлчдийн консерциум мэдэгдсэн байдаг. Гэтэл тэрхүү 49 эрхэмийн хоёр нь л хөрөнгөө эх орондоо оруулж ирлээ. Үлдсэн 47 нь сураггүй.
Ерөнхийлөгчийн гаргасан уриалгын хугацаа аль хэдийн дуусчихаад байдаг. Харин үлдсэн 47 эрхэмийн хэдэн ам.доллар монголд орж ирэх нь тодорхойгүй хэвээр байна. Эндээс харахад Ерөнхийлөгчийн оффшор данстай иргэдтэй хийх тэмцэл энэ хоёр эрхмээр л төгссөн бололтой.
Уг нь цаана нь Ерөнхий сайд асан С.Баяр, түүний том охин Б.Нандин, бага охин Б.Хонгор, Сангийн сайд асан С.Баярцогт, Я.Очирсүх, “Петровис” компанийн захирал Ж.Оюунгэрэл, СЗХ-ны дэд дарга Х.Бум-Эрдэнэ, Э.Бат-Үүлийн хүү Б.Чулуудай зэрэг эрхмүүд оффшор бүсэд данстай нь аль хэдийн ил болоод байгаа билээ.