Эрэн сурвалжлах сэтгүүлчдийн олон улсын консерциум (ICIJ) байгууллага дэлхийн олон орны улстөрчид, төрийн тэргүүнүүдийн оффшор хөрөнгийн мэдээллийг “Pandora Papers” нэрийн дор Ням гарагт ил болгожээ.
Уг ажиллагаанд The Washington Post, BBC, The Guardian зэрэг хэвлэл мэдээллийн байгууллагуудын 600 орчим сэтгүүлч оролцож, татваргүй бүсүүдэд байрладаг 14 санхүүгийн компаниас алдагдсан 11.9 сая бичиг баримтыг нэгтгэж боловсруулсан байна.
Үүний үр дүнд Британийн Виржиний арлууд, Панам, Белиз, Кипр, Арабын Нэгдсэн Эмират, Сингапур, Швейцар зэрэг татваргүй бүсүүдэд бүртгэлтэй 1,000 орчим оффшор компанийг илрүүлсний гуравны хоёроос илүү нь Британийн Виржиний арлуудад бүртгэлтэй байжээ.
“Pandora Papers” багийнхан эдгээрээс дэлхийн 90 улсын 336 улстөрч, төрийн өндөр албан тушаалтны нууц хөрөнгийг ил болгосон байна. Эдгээрээс 35 нь аль нэг улсын төрийн тэргүүнээр одоо ч ажилладаг, эсвэл ажиллаж байсан хүмүүс байгаа юм.
Тухайлбал Йорданы хаан Абдуллах II олон тооны оффшор компаниудаараа дамжуулан Малибу, Калифорни, Вашингтон, Лондонд нийтдээ $100 саяын үл хөдлөх хөрөнгө авсан байжээ.
Азербайжаны ерөнхийлөгч Илхам Алиевын гэр бүл, тойрон хүрээлэгчид оффшор компаниараа дамжуулан Их Британид хэдэн зуун саяын үнэ бүхий үл хөдлөх хөрөнгө авсныг бас илчилсэн байна.
Чех улсын ерөнхий сайд Андрей Бабиш мөн адил замаар Францын өмнөд нутагт $22 саяын үнэ бүхий шилтгээн худалдаж авсан байжээ.
Их Британийн ерөнхий сайд асан Тони Блэйр гэргийн хамт Лондон хотод олон саяын үнэтэй үл хөдлөх хөрөнгө авахдаа өөрийн эзэмшлийн оффшор компанийг ашиглаж, татвараас зайлсхийсэн нь ил болсон байна.
Улстөрчдөөс гадна Колумбийн поп од Шакира, Германы супермодель Клаудиа Шиффер, Энэтхэгийн крикетийн од Сачин Тендулкар зэрэг олны танил хүмүүсийн оффшор компани ашиглан татвараас зугтсан баримтууд ил болжээ.
ОХУ-ын ерөнхийлөгч Владимир Путин, Пакистаны ерөнхий сайд Имран Хан нарын шууд холбоотой эд хөрөнгө “Pandora Papers”-т илрээгүй ч тэдний ойр хүрээллийн хүмүүсийн нууц хөрөнгүүд ил болсон байна.
Мөн Украины ерөнхийлөгч Володимир Зеленский 2019 онд сонгогдохынхоо өмнөхөн өөрийн эзэмшлийн оффшор компаниа бусдын нэр дээр шилжүүлж байжээ.
ICIJ байгууллага 2014 онд анх LuxLeaks, 2016 онд Panama Papers, 2017 онд Paradise Papers, 2020 онд FinCen нэрээр оффшор компаниудын нууц баримтуудыг ил болгож байсан юм.
Эх сурвалж: AFP
