Х.Тэмүүжин: Шат болон гонхны хооронд нэлээд зайтай учир өөрөө унах боломжгүй

Ардчилсан намын удирдлагууд өнөөдөр /2019.05.20/ Ардчилсан намын дэд дарга, УИХ-ын гишүүн асан Г.Батхүү баасан гаригт Төрийн ордонд зуурдаар нас барсантай холбоотой мэдээлэл хийлээ.
АН-ын Ерөнхий нарийн бичгийн дарга Ц.Туваан:
Тавдугаар сарын 17-ны өдрийн 19:00 цагийн орчимд УИХ-ын гишүүн, Засгийн газрын гишүүн асан Г.Батхүү амь насаа алдсан цочирдом хэрэг боллоо.
Гадны нөлөөтэйгөөр амиа алдсан байж болзошгүй байна. Өнгөрсөн онд гадаад улсад иж бүрэн шинжилгээ хийлгэхэд эрүүл гэсэн хариу гарсан байдаг.
Цагдаагийн байгууллагаас төрийн өндөр албан тушаал хашиж байсан хүн амь насаа алдсантай холбоотойгоор үнэн мөнийг нэн даруй олно гэдэгт итгэж байна.
УИХ-ын гишүүн асан Х.Тэмүүжин: Төрийн ордонд 2-3 камер байгаагаас өөр камер алга. Үйл явдал гарсан газар ямар нэг хяналтын камер алга байна. Цагдаагийн байгууллага албан ёсны мэдээлэл хийгээгүй байхад зүрх нь хаагдсан гэх мэтээр янз бүрийн мэдээлэл хэвлэл мэдээллийн хэрэгслээр хурдтай тархаж байна.
Үйл явдал шатны ойр болоогүй.
Гонх гэж хэлдэг газар өндрөөс унасан байдалтай, их хэмжээний гэмтэл авсны улмаас нас барсан гэх урьдчилсан байдлаар дүгнэлт гарсан.
Шүүх эмнэлгийн дүгнэлт эцсийн байдлаар гараагүй. Гадна талын үзлэг, задлан шинжилгээний хариу эхнээсээ урьдчилсан байдлаар гарч, их хэмжээний гэмтлийн улмаас нас барсан байж болзошгүй гэж байгаа.
18:20 орчим цагт авто раллигийн хуралдаан тарсан. 18:30 цагт хуралдааны танхимаас гарсан гэж байгаа.
Хамгийн сүүлд 18:30 цагийн орчимд Дэлгэрмаа даргатай утсаар ярьсан байсан.
Харин 18.35 цагийн үед төрийн ордоны гуравдугаар давхарт баруун зүгт явж байсан нь бичлэгт үлдсэн байна.
19.30 цагийн үед амиа алдсан байдалтай нэг давхарт унасан байдалтай олдсон. Ингээд 19:57-д цагдаагийн байгууллагад дуудлага өгсөн.
Хэвлэлийн мэдээллийн хэрэгслээр талийгаачтай хамгийн сүүлд уулзсан хүн нь С.Эрдэнэ гэх мэт худал мэдээлэл тарж байгаа. Тийм зүйл болоогүй. Хамгийн сүүлд уулзсан хүн нь тодорхой болсон.
Талийгаачийн нас барсан шалтгааныг гаднын нөлөөтэй байж болзошгүй гэж харж байгаа. Шат болон гонхны хооронд нэлээд зайтай. Хүн өөрөө унах боломжгүй.