АТГ Н.Энхбаярыг улс төрөөс хол байлгах үүрэг авсан уу

 

Авлигатай тэмцэх
газраас МАХН-ын дарга Н.Энхбаярт эрүүгийн хэрэг үүсгэж, яллагдагчаар татаад
байгаа. Гэсэн хэдий ч ганц ч удаа байцаалт авч чадалгүйгээр мөрдлөгийн ажил
гацчихаад байгаа юм. Өнгөрөгч хугацаанд АТГ-аас нийтдээ зургаа удаа зарлан
дуудах хуудас өгсөн ч энэ бүрт нь
Н.Энхбаярын зүгээс тодорхой шалтаг, шалтгаан хэлж, зайлсхийсээр байгаа билээ.

 

Хамгийн сүүлийн
зарлан дуудах хуудсыг Н.Энхбаярыг албан өрөөндөө байхад нь дайран орж өгсөн гэж
мэдэгдэж байгаа. Энэ тухай тэрээр \”Би өмгөөлөгчтэйгөө хамт очиж байцаалт өгнө.
Гэвч АТГ-аас дарамт шахалт үзүүлж байна. Үүнээс болж миний хүсэлт тавьсан
өмгөөлөгчид хууль зүйн үйлчилгээ өгөхөөс татгалзаж байна” гэсэн тайлбарыг
өгчээ.

 

Өөрөөр хэлбэл,
Н.Энхбаяр өмгөөлөгчтэй бол байцаалт өгөхөд асуудалгүй. Гэвч түүний хэргийг
өмгөөлөх өмгөөлөгч олдохгүй байна гэж ойлгогдож байна.

 

Тиймээс АТГ-аас
Монголын Хуульчдын холбоонд хүсэлт гаргаж, Н.Энхбаярт өмгөөлөгч томилж өгөхийг
хүсчээ. Энэ дагуу Хуульчдын холбоо \”Н.Энхбаярын өмгөөлөгчөөр ажиллах хүсэл,
сонирхолтой өмгөөллийн нөхөрлөл, өмгөөлөгчид 2016 оны долдугаар сарын 29-ны
дотор Өмгөөлөгчийн хороо хариуцсан мэргэжилтэнд нэрээ ирүүлнэ үү” гэсэн саналыг
тавьсан байна. Н.Энхбаярт хууль,
эрх зүйн асуудлыг нь хариуцсан өмгөөлөгч гэж хүн бий. Бүр хуульч, Монгол Улсын
Хууль зүйн яамны дэд сайдаар ажиллаж байсан хүн түүний дор ажилладаг. Гэтэл
өмгөөлөгч байхгүй гэдэг ганцхан шалтгаан хэлж, хуулийн байгууллагын мөрдлөгийн
ажилд ноцтойгоор саад учруулсаар байна. Асуудал адармаатай, ээдрээ ихтэй учраас
өмгөөлөгчид ч Н.Энхбаярын хэргийг авахаас төвөгшөөж байгаа юм.

Уг нь хүлээсэн
үүргийнхээ дагуу хэнийг ч ялгалгүй өмгөөлөх ёстой. Гэвч өмгөөлөгчид Н.Энхбаяртай
холбогдохыг хүсэхгүй байна. Үүнээс шалтгаалан хуулийн байгууллага ажлаа хэвийн
үргэлжлүүлэх боломжгүй болчихлоо.

Н.Энхбаяраас өөр
хүн байсан бол мөрдлөгийн ажил хэвийн явагдаж, өдийд прокурор, эсвэл шүүхийн шатанд
оччихсон, гэмтэй, гэмгүйгээ тогтоолгоод явж байх байлаа. Эндээс \”хуулийн
байгууллагад хүчгүйд хүчтэй, хүчтэйд хүчгүй
юм” гэх жижиг дүгнэлт хийж болохоор. Ер нь Н.Энхбаяртай холбоотой хэрэгт АТГ-аас нэг их хүч өгөхгүй байгаа бололтой юм. Зөнгөөр нь явуулж байгаад л Ерөнхийлөгчийн сонгуультай хольж, бантан хутгах гээд байна уу гэж хардаж болохоор. 

 

Ерөнхийлөгчийн сонгуульд УИХ-д суудалтай намаас нэр дэвшигч тодрох ёстой. О.Баасанхүү УИХ-ын гишүүн болж чадсан учраас Н.Энхбаярт Ерөнхийлөгчийн сонгуульд өрсөлдөх эрх нээгдэж байгаа гэж ойлгож болно. Мөн энэ долдугаар сард түүний ялтайд тооцогдох хугацаа дуусгавар болж байгаа. Тиймээс Н.Энхбаярыг сонгуульд өрсөлдүүлэхгүй байх нэг хөзөр нь АТГ-ын мөрдөн байцаалт байж болох юм. Тиймээс хэргийг шуурхайлан шийдвэрлэх бус харин цаг хугацаа хожиж, сонгуультай зэрэгцүүлэх гээд байж ч болох л юм. Гэхдээ Н.Энхбаяр ч байцаалт өгөхийг хүсэхгүй байна. АТГ ч хүчлэхгүй байна. Ер нь АТГ-аас Н.Энхбаярыг улс төрөөс хол үүрэг авчихсан юм болов уу гэж ч хардмаар. 

 

 

Амар

Үндэстэн агентлаг