И-мартын нээлт томоохон сүлжээ дэлгүүрүүдийг \”шоконд оруулав\”

 

Өчигдөр нээлтээ хийсэн \”E-mart”-ийн тухай бичихгүй өнгөрч чадсангүй. Тиймээс цөөн ч
болов хэдэн үг \”хатгая” гэж бодлоо.

 

\”E-mart”өчигдөр албан ёсоор нээлтээ хиймэгцээ, удалгүй хаалгаа
барив. Гэхдээ өнөөдөр онгойх байх аа, бүр мөсөн хаасан гэж битгий эндүүрээрээ.
Өчигдөр хаалгаа барьсан шалтгаан нь хэд их хүн ирсэнтэй холбоотой гэнэ. Ер нь
нийслэлчүүдийг бүгдийг нь нэг дор цуглана гэж төлөвлөөгүй байж л дээ. Түүнээс
болоод сестэмд нь доголдол үүсч улмаар хаалгаа барихад хүргэсэн байна.

Монголчууд \”үнэ хямд” гэсэн болгон руу хошуурдаг дутагдалтай. Exclusivе гэх компанийн захирал бүсгүй өөрийн үйлдвэрийн хувцсаа
үнэгүй тараана гэсэн зар түгээснээс үүдэн маш олон хүний бөөгнөрөл \”Хорооллын
Номин”-гийн урд үүсч байсныг санаж байгаа биз дээ. Тэгвэл өчигдөр Чингис Зочид
буудлын өмнө шинээр нээгдсэн \”E-mart” худалдааны төвийн гадаа олны бөөгнөрөл үүссэн дээрхтэй
ижил үйл явдал болчихлоо.

 

\”E-mart”-ийнхан олон хүн ирэхийг мэдэж байсан. Гэхдээ арай л
олон хүн ирчихсэн бололтой юм. Ямар сайндаа л \”Улсын их дэлгүүр хүнгүй байна.
Бүр худалдагч нь хүртэл алга. Бүгд \”E-mart” руу явсан гэнэ ээ” гэх хошин яриа цахим хуудсаар газар
авах вэ дээ.

 

Эндээс юу харагдаж байна вэ. \”E-mart”-ийн бараа бүтээгдэхүүн хямд байсан. Гэхдээ үнэтэй бараа
бүтээгдэхүүн ч байсан. Солонгос улс даа хамгийн хямд бараа бүтээгдэхүүн
худалдан борлуулдаг сүлжээ дэлгүүр л дээ. Тиймээс хаана ч нээгдсэн хамгийн хямд
л байх ёстой. Харин \”хямд” гэдэг ганцхан үгийг сонссон Толгойтын эмээ,
Хужирбулангийн өвөө, сайд асан М.Зоригтын ээж хүртэл бусадтай шахцалдан,
хямдралыг мэдрэхээр оочирлож, олны бөөгнөрлийг бий болгов. Гэхдээ ийм бөөгнөрөл
удаан үргэлжлэхгүй л дээ. Монголчууд хурдан уйдаж, хурдан мартдаг улс.

 

KFC нээлтээ хийх үеэр Төв номын сан орчмын замын хөдөлгөөн
саадаж, замын цагдаа хүч нэмж зохицуулж байсныг сайн санаж байна. Гэтэл одоо KFC-ийн үйл ажиллагаа хэвийн, яваад ороход сандал суудал
элбэгтэй л байдаг болсон байна лээ. Тэгэхээр шинэ содон зүйлст Монголчууд их
дуртай гэдэг нь анзаарагдаж байна.

 

Өчигдөрхөн гудамны үзүүрт байдаг дэлгүүрээс талх таллаж авч байсан хүүхэн,
өнөөдөр \”E-mart” дотор хүмүүстээ чихэлдэн, шинэ зүйлстээ танилцаж явах нь
энүүхэнд. Ямартай ч системийн доголдол, усан бороо хоёр \”E-mart” руу хошуурагчдыг түр зур зогсоож чадлаа.

 

 

\”E-mart” бол Солонгосын дэлгүүр. Хэдийгээр Сү.Батболдын Алтай
групп оруулж ирсэн ч худалдан авалтын дийлэнх хувь нь Солонгос эзний халаас руу
орно. Тэгэхээр үндсэрхэг үзлээ өдөөх юм бол \”E-mart”-ийг зорьмооргүй. Гэвч манай дотоодын нэртэй монополь
байгууллагууд иргэд, үйлчлүүлэгчдээ бус өөрсдийн хэтэвчинд анхаарлаа хандуулдаг
учраас шударга сайхан өрсөлдөөн бий болгохын тулд цөөн тооны гадны хөрөнгө
оруулалттай үйл ажиллагаа байх нь оновчтой гэж бодож байна.

\”E-mart” нээлтээ хийснээр \”Номин”, \”Сансар”, \”Оргил”, \”Миний
дэлгүүр” зэрэг томоохон сүлжээ дэлгүүрүүд бараан дээрээ хадсан үнэ, иргэдтэй
харилцах үйлчилгээ, зохион байгуулалт, бараа бүтээгдэхүүний чанар зэрэгтээ
анхаарал хандуулж эхэлсэн гэж найдаж байна. Үгүй бол хэчнээн олон салбартай
байгаад ч амжилт олохооргүй болж нийгэм өөрчлөгдөх нь. Хаа байсан Яармагаас
шүдний сойз авах гээд \”E-mart”-ийг зорьж байна гэдэг чинь олон салбар нэгжүүдтэй
худалдааны төвүүд хэрэглэгч, үйлчлүүлэгчээ алдаж эхэлж байна л гэж ойлгохоос
аргагүй.

 

Тэгэхээр шударга өрсөлд, \”E-mart”-аас хямд … гээд зар тавиад, бараа бүтээгдэхүүнээ
шинэчлээд, чанар, стандартад анхаарч, худалдагч, ажилчид нарынхаа зангидсан хөмсөгийг
тэнийлгэж, зах зээлийн тулаандаа орцгоо. Хэрэглэгч ялагчийг л сонгоно шүү дээ.

Амар