\”Мэргэжлийн Засгийн газар\”-ын дэд сайдууд

Ж.Эрдэнэбатын Засгийн газар
өнөөдөр бүтэн болно. Өөрөөр хэлбэл, МАН-ын удирдах зөвлөлөөс дэмжсэн П.Сэргэлэн,
А.Цогцэцэг, Т.Энхтайван, Г.Мөнхбаяр нарыг УИХ-аар дэмжчих байх гэсэн таамаг
байна. Учир нь эдгээр хүмүүс бүгд УИХ-ын дарга М.Энхболдын хүмүүс юм.
П.Сэргэлэн, Т.Энхтайван нарын хувьд Монголын морин спорт уячдын холбооны
удирдах зөвлөлд ажилладаг. Харин УИХ-ын дарга М.Энхболд энэ холбоог тэргүүлдэг
байгаа. Г.Мөнхбаяр, А.Цогцэцэг нарыг М.Энхболд санал болгосон гэх мэдээлэл байна.
Тиймээс эдгээр хүмүүсийг УИХ-аар олон
таван үггүй дэмжчих болов уу.

 

Ингэснээр Ж.Эрдэнэбатын өргөн
барьсан 13 яам 16 сайд бүрдэх юм. Гэхдээ бүх сайдууд тодорч дууссан ч дэд
сайдаар хэн томилогдох вэ гэсэн дараагийн асуудал гарч ирж байна. Өөрөөр хэлбэл
энэ Засгийн газар дэд сайдтай ажиллана гээд төслөө өргөн барьж, түүнийг УИХ
олонхоор дэмжчихсэн учраас дэд сайдуудыг томилно л гэсэн үг юм.

Дэд сайд гэдэг нь бялуу хуваах,
шагнал хүртээх нэг хэлбэр гэж шүүмжилдэг ч МАН-ын зүгээс сайдын эзгүйд салбараа
удирдах чухал албан тушаал хэмээн онцолж, санал оруулсан юм. Тэгвэл 13 яам, Засгийн
газрын хэрэг эрхлэх газарт дэд сайдаар ажиллах хүмүүсийг урьдчилсан байдлаар
танилцуулья.

 

Засгийн газрын Хэрэг эрхлэх газрын дэд даргаар Ш.Солонгыг улираан томилох
болов уу. Түүний хувьд аль Засгийн газрын үед тус албан тушаалыг хашч байгаа
Хэрэг эрхлэхийн салбарт мэргэшсэн хүн гэж хэлж болно. Тэгвэл Сангийн дэд сайдад тус яамны Хөрөнгөр оруулалтын газрын дарга
З.Мэндсайхан, Байгаль орчин, аялал жуулчлалын дэд сайдад Ж.Сауле, Гадаад
харилцааны дэд сайдад Х.Булгантуяа, Зам тээврийн дэд сайдад Б.Цогтгэрэл /шилэн
цогоо гэгдэх/, Хөдөлмөр, нийгмийн
хамгааллын дэд сайдад Б.Мөнгөнчимэг, Батлан хамгаалахын дэд сайдад
н.Эрдэнэбаатар, Эрчим хүчний дэд сайдад
А.Тлейхан, Барилга хот байгуулалтын дэд сайдад Б.Амарсанаа, Эрүүл мэндийн дэд
сайдад Д.Очирбат, Хүнс, хөдөө аж ахуй, хөнгөн үйлдвэрийн дэд сайдад
С.Оюунбилэг, Боловсрол соёл, шинжлэх ухааны дэд сайдад Я.Төмөрбаатар, Хууль
зүйн, дотоод хэргийн дэд сайдад Н.Удаанжаргал /МОХ-ны Ерөнхийлөгч/ нарын хүмүүс
яригдаж байна.

 

Мэдээж эдгээр хүмүүсийн нэрсийг МАН-ын удирдах зөвлөлийн хурлаар оруулна.
Үүний дараа хариулт тодорхой болох биз.

 

А.Аюуш