С.Мөнхбат: Э.Сумъяа олимпийн эрх авчираад шууд зодогоо тайлаарай

Чөлөөт бөхийн дэлхийн аварга шалгаруулах тэмцээнд эх орноо төлөөлөн оролцох тамирчдын сонгон шалгаруулалт дээр зөрчилдөөн үүсч, энэхүү зөрчил нь улс орон даяар хэсэг шуугив. Үүнтэй холбогдуулан өчигдөр Монголын Чөлөөт бөхийн холбооны сургалт, дасгалжуулалтын техникийн зөвлөл яаралтай хуралдаж, өнөөдөр /2019.09.11/ шийдвэрээ танилцууллаа.
Монголын чөлөөт бөхийн холбооны Ерөнхий нарийн бичгийн дарга Б.Батбаяр “М.Пүрэвтунгалаг Дэхийн аварга шалгаруулах тэмцээнд /ДАШТ/ явах байсан ч эмчийн магадалгаагаар хасагдсан гэх асуудал олон нийтийн анхаарлын төвд байна. Энэ асуудлаар өчигдөр яаралтай хуралдсан. Зөвлөл нийт зургаан гишүүнтэйгээс дөрвөн гишүүн биеэр ирж оролцсон.
Хурлаас 2019 оны ДАШТ-ууд бол Монгол Улсын хувьд олимпийн наадамд оролцох эрх авах хариуцлагатай жил. 53 кг-ийн жин олимпийн наадмын хөтөлбөрт багтдаг. Олимпийн наадмын эрх авахын тулд ДАШТ-д барилдах тус жинд Монгол Улсыг төлөөлүүлж Э.Сумъяаг барилдуулах нь зөв” гэсэн шийдвэр гаргасан. М.Пүрэвтунгалагийн эрүүл мэндэд анхаарч, эмчилгээнд шаардлагатай хөрөнгө санхүүг холбооны зүгээс гаргана. Мөн өмнө нь мэдэгдэл хийх үед сахилгын алдаа гаргасан шигшээ багийн ахлах дасгалжуулагчид хариуцлага онооно. Шаардлагатай гэж үзвэл албан тушаалаас нь огцруулна” гэж мэдэгдлээ.
М.Пүрэвтунгалагийн аав С.Мөнхбат “Манай гэр бүл Зөвлөлөөс гарсан дээрх шийдвэрийг хүндэтгэн хүлээж авч байна. Үнэндээ бол монголчууд түрүүлсэн мориныхоо байр шагналыг хамгийн сүүлд ирсэн мориндоо өгдөггүй гэдэг үүднээс Э.Сумъяаг ДАШТ-рүү явахгүй үлдэх байх гэж бодож байсан. Би охиноо ДАШТ руу явж чадахгүйг мэдэж байсан. Хэрэв миний охиныг явуулахгүй бол өөр хэнийг ч явуулахгүй гэж Баянхонгороос гарахдаа бодож байсан. Тиймээс Монгол Улсын нэрийг бодож Э.Сумъяаг явуулах шийдвэрийг хүлээж авсан. Угаасаа Э.Сумъяагийн оронд өөр тамирчин явуулах боломжгүй болчихсон. Тиймээс Э.Сумъяад ДАШТ-д сайн барилдаж олимпийн эрх авч ирээрэй гэж ерөөе. Би Э.Сумъяаг бодсондоо биш Монгол Улсаа бодож охиноо үлдээлээ шүү.
Энэхүү жинд олимпийн эрхийг Монгол улсад олгоно. Тиймээс Э.Сумъяаг олимпийн эрх авчирвал олимпт явуулах бөхийн сонгон шалгаруулалт явуулна. Энд харин манай охин барилдана. Би Э.Сумъяад хэлсэн. Би эх орноо бодоод чамайг явууллаа. Гэхдээ чи заавал олимпийн эрх авчираарай. Тэгээд ирсэн хойноо зодогоо тайлаарай гэж хэлсэн” хэмээн мэдэгдлээ.