ЦЕГ-ын хэвлэл мэдээллийн төвийн мэргэжилтэн Мөнхшүр болон түүний нөхөртэй холбоотой мэдээллүүд олон нийтэд хүрч эхэлсэнтэй холбогдуулан тэрээр өөрийн цахим хуудсаараа дамжуулан тус мэдээллийг үгүйсгэсэн байна.
Анх 2017.11.26-нд “Цагдаагийн ерөнхий газрын хэвлэл мэдээллийн төвийн дарга, дэд хурандаа Б.Баатархүү гэж хүн тантай ярьж байна” гэх дуудлага ирсэн.
“Сайн уу, Мөнхшүрээ. Чи хаана ажиллаж байна. Манайд судлагдаж байсан юм байна шүү дээ. Чиний шууд нэвтрүүлэг хөтлөхийг үзлээ. Мундаг байна. Манайд орон тоо гарсан, яаралтай хүн томилохгүй бол болохгүй байна. Манай орох уу” гэх асуултыг надад тавьсан. Дахиад л хоёр сартай нялх хүүхдээ орхиод ажилд орно гэхээр хүнд санагдаж байсан ч залуу хүн бүхнийг амжуулах ёстой гэсэн алтан дүрмээ дагаж өөрийгөө хүчлээд цагдаагийн ерөнхий газрын хэвлэл мэдээллийн төвийн мэдээллийн ажилтан болсон.
Гэтэл намайг ямар цаг хугацаа, он жилүүдийг хэрхэн туулж ирснийг мэдэхгүй хэр нь мэддэг мэт, таньдаг мэт таван төгрөгөөр өөрийгөө худалдан байж нүд цавчихгүй худал ярьж, мөрөөрөө ажлаа хийж яваа гэмгүй нэг цагдаагийн алба хаагчаар улстөр хийж байгаад урам хугарч байна. Уучлаарай, би улстөр мэдэхгүй. Мэдэхийг ч хүсэхгүй. Цагдаа болох мөрөөдлөө тээсээр цагдаагаараа л энэ хорвоогоос буцна.
Намайг сэтгүүлчдэд мөнгө тараасан гэв үү. Хэрэв надаас мөнгө авсан, авилга, хээл хахууль хүртсэн сэтгүүлч байвал шударгаар гараад ир. Тэгвэл би төрийнхөө тугийг бүтэн нэг тойрч, сүлдэндээ ёслоод “Монгол Улсын төлөө зүтгэе” гэж ажлаа эхэлсэн ч “Монгол Улс минь уучлаарай” гээд мөрдэсөө тайлаад Монголын цагдаагаас гарч одъё.
Миний мөрөндөө гялалзуулсан ахмад цол, албан тушаал минь үрээ үнсээд үүрээр гарч одсон өглөө бүрийн, үдэш унтаж байхад нь үнсээд хөнжилд нь шургасан өдөр хоногуудын үнэндээ зөв шударгаар хөдөлмөрлөсөн он жилүүдийн минь гавьяа шагнал юм шүү. Надад Хууль зүйн яамны алдар, цагдаагийн гавьяа гэх хэтийдсэн шагнал даанч алга.
Мөрөөрөө ажлаа хийгээд явж байгаа мөрдэстэй төрийн албан хаагчаар ингэж тохуурхах ардчилсан нийгэм, үзэл бодлоо чөлөөтэй илэрхийлэх эрин үед гомдож байна” хэмээн бичжээ.
