Тусгай сангуудын булхайг илчилсэн сэтгүүлчдийн эхнийх нь шүүхэд яллаа

Засгийн газрын тусгай сангууд болох Тариалан эрхлэлтийг дэмжих сан, Жижиг дунд үйлдвэрлэлийг дэмжих сан, Мал хамгаалах сан, Боловсролын зээлийн сангаас зээл авсан төрийн өндөр албан тушаалтан, тэдгээрийн төрөл садангийн компанийн үйлдлийг сэтгүүлчид нийгэмд илчилсэн. Үүнийх нь төлөө сэтгүүлч, хэвлэл мэдээллийн байгууллагуудыг Гацууртын Л.Чинбат, Ерөнхий сайд асан Н.Алтанхуяг нарын хүмүүс шүүх, цагдаад өгсөөр байгаа.
Харин өнөөдөр тэдгээр сэтгүүлчдийн эхнийх нь шүүхэд ялалт байгуулж мэдээллээ нотлоод байна. Тодруулбал, сэтгүүлч Д.Оюун-Эрдэнэ Ерөнхий сайд асан Н.Алтанхуягийг Чингэлтэй дүүргийн Иргэний хэргийн анхан шатны шүүхэд ялаад байна. Түүнд Монголын Сэтгүүлчдийн нэгдсэн эвлэлийн хуулийн зөвлөх, Монголын Хуульчдын холбооны гишүүн, өмгөөлөгч Г.Балжидмаа эрх зүйн туслалцаа үзүүлжээ. Харин Н.Алтанхуягийг өмгөөлж эрх зүйч Э.Билгүүн шүүх хуралд оролцсон юм.
Сэтгүүлч Д.Оюун-Эрдэнэ энэ талаар, “10 сарын турш шүүх, цагдаад шалгуулж, олон улс дахь сэтгүүл зүйн хэллэгээр “түгшүүрт” автаж явсан би өнөөдөр шүүх дээр яллаа. Ерөнхий сайд асан Н.Алтанхуяг Шинэчлэлийн Засгийн газрыг тэргүүлж байхдаа өөрийн хамаарал бүхий “Хаан жимс Эс Би Ти” -аараа ТЭДС-аас 7 жилийн хугацаатай хүүгүй зээл авсныг нь би өөрийнхөө эрхэлдэг tvmongoli.mn сайтдаа бичсэн юм. Харамсалтай нь шударга ёс хэмээн ярьдаг болсон энэ улстөрч маань үүнийг гүтгэлэг, нэр хүндэд захиалгаар халдсан хэмээн үзэж хувь хүн болон компаниараа тус бүр хоёр нэхэмжлэл, гомдлыг цагдаа, шүүхэд зэрэг зэрэг гарган зарлан дуудах дөрвөн хуудсаар намайг дарамталж байлаа.
Харин өнөөдөр нэхэмжлэгч талын удаа дараагийн шалтаг, шалтгаанаар гурван удаа хойшлогдсон шүүх хурал хуралдаж, Чингэлтэй дүүргийн шүүхийн шүүх бүрэлдэхүүн Норовын Алтанхуягийн нэхэмжлэлийг бүхэлд нь хэрэгсэхгүй болгож, манай сайтын “ТЭДС-аас хүүгүй зээл авсан компаниудыг Н.Алтанхуягийн “Хаан жимс” тэргүүлж байна” цуврал нийтлэлийг “бодит байдалд нийцсэн” гэж шийдвэрлэлээ.
Н.Алтанхуяг улстөрч өө, шударга ёсыг өөрөөсөө эхлүүл. Шударга ёс гэдгийг тань шиг улстөрч, эрх мэдэлтнүүд өөрийнхөө ёс зүйгээс эхлэх ёстой юм. Ёс зүйгүй улстөрч эрх мэдэлтэй болохоороо ямар ичгүүргүйгээр, улайн цайм хувийнхаа, компанийхаа эрх ашигт үйлчилж, улсын мөнгөөр бизнес хийдгийг ганц энэ хэргээр тань хангалттай нотоллоо. Үүнтэй холбоотой олон баримтуудыг тань цувралаар гаргавал та дахиад намайг яаж дарамтлах вэ. Шударга ёс, баримт ялна” хэмээн өөрийн фэйсбүүктээ бичжээ.