“Нур-Султан 2019” чөлөөт бөхийн дэлхийн аварга шалгаруулах тэмцээн амжилттай үргэлжилж байна. Тэмцээний дөрөв дэх өдөр эрэгтэйчүүдийн 57, 65, эмэгтэйчүүдийн 62, 68 кг-ын жингийн дагах болон шигшээ барилдаанууд мөн эрэгтэйчүүдийн олимпын 74, 125 кг, олимпын бус 70, 92 кг-ын жингийн бөхчүүдийн хэсгийн барилдаанууд явагдлаа.
Эмэгтэйчүүдийн 68 кг-д барилдаж буй С.Батцэцэг өчигдөр эхний тойрогтоо Узбекистаны Нилуфар Гадаеватай таарсан. Тус бөхийг манай тамирчин 25 секундэд цэвэр ялсан юм.
Дараагийн тойрогтоо 2014 оны ДАШТ-ий хүрэл медальт, энэ жилийн Европын наадмын аварга Латвийн Анастасия Григорьеватай барилдаж, 6:0-ээр ялсан байна.
Харин Шведийн бөх олимпын хүрэл медальт, дэлхийн аварга Йенни Франссонтой хийсэн барилдаанд манай тамирчин 5:1-ийн харьцаатайгаар тэргүүлж байсан хэдий ч цаг дуусах үед илт оноогоо хамгаалан зугтсан хэмээн шүүгч үзэж нэг, хоёр, гурван оноогоор торгосон юм. Ингээд оноо 5:4 байх үед барилдаан дуусахаас гурван секундын өмнө өрсөлдөгч манай тамирчны ард гаран хоёр оноо авснаар 5:6-аар ялагдал хүлээжээ. Харин өрсөлдөгч Йенни Франссон дараагийн барилдаандаа ялснаар С.Батцэцэг өнөөдөр дэлхийн хос медальт Францын Кумба Ларроктой дагах барилдаанаа хийсэн юм.
Энэхүү барилдааны эхэнд хөлдөө алдаж, 2 оноо алдсан хэдий ч дараа нь өөрөө хөл авч ард нь гаран 2 оноо авч, дараалан шахаж эргүүлсээр 2-0, 4-2, 6-2, 8-2, 10-2, 12-2 оноогоор цэвэр ялсан юм. Ингэснээр манай бөх хүрэл медалийн төлөө Украины Алла Черкасоватай барилдах эрхтэй болж байгаа бөгөөд мөн “Токио 2020” наадмын анхны эрхийг эх орондоо авчирч байгаа юм. Алла Черкасова нь 2018 оны дэлхийн аварга, 2010 ДАШТ-ий хүрэл медальт, энэ жилийн Европын аварга бөх.
Эрэгтэйчүүдийн 57 кг-д гавьяат тамирчин Э.Бэхбаяр эхний дагах барилдаанд Азербайжаны Махир Амираслановыг ялсан. Гэвч дараагийн барилдаанд Ираны Реза Атритай барилдах үед цаг дуусахаас 20 секундийн өмнө 4-2 ялж явсан ч хөлдөө алдаж, 2 оноо алдсанаар сүүлд авсан оноогоор Иран залуу хүрэл медалийн төлөө U-23 дэлхийн аваргын тэмцээний мөнгөн медальт Энэтхэгийн Рави Кумартай барилдах эрх авч байгаа юм.
Эрэгтэйчүүдийн 65 кг-д ОУХМ Т.Тулга дагах барилдаанд Германы Александр Семисоровтой барилдлаа. Т.Тулга өрсөлдөгчдөө боломж олголгүй маш сайн барилдсаар 8:0-ээр ялалт байгууллаа. Одоо ДАШТ-ий мөнгө, хүрэл медальт, Азийн наадмын алт, мөнгөн медаль, Ази тивийн хошой аварга Энэтхэгийн Баджранг Пуниятай хүрэл медалийн төлөө барилдана.
70 кг-ын жинд Гавьяат тамирчин Ганзоригийн Мандахнаран дэлхийн АШТ, Европын наадмын мөнгөн медальт Польшийн бөх Магомедмурад Гажиевтай барилдлаа.
Польш бөх хоёр торгуулж, хоёуланд нь 30 секундэд оноо авч чадалгүй 2:0-ээр манай бөх тэргүүлж эхэлсэн. Гэвч манай бөхийг торгосноос хойш байдал өөрчлөгдөж Г.Мандахнаран 30 секунд мэх хийгээгүй тул 1 оноо алдсан юм. Дараа нь хөлдөө алдаж Гажиев дайрч гаргахад шүүгч түүнд хоёр оноо өглөө.
Үүнд манай баг зарга мэдүүлж, бичлэг үзснээр шүүгч нар польш бөхийн нэг оноог цуцалсан юм. Онооны харьцаа 2-2 болсон ч сүүлд оноо давсан Гажиев давуу. Цаг дуусахад 23 секунд дутуу. Хэдийгээр онооны харьцаа 2:2 боловч сүүлд оноо авсан гэх үзүүлэлтээр Гажиев тэргүүлж байсан учир манай бөх нөхөх гэж оролдсон боловч хоёр оноо алдан 2:4-өөр ялагдаж тэмцээнээ дуусгасан юм.
Эрэгтэйчүүдийн 74 кг-д ОУХМ Занданбудын Сумъяабазар эхний тойрогт Кыргызстаны Илгиз Жакыпбековтой барилдлаа. Илгиз Азийн наадмын шагналт тавдугаар байр эзэлж байсан бөх. Энэхүү барилдааны төгсгөлд манай бөх 2 оноо авсан хэдий ч 2:4-өөр ялагдсан байна.
Мөн 92 кг-ын жинд Баатарын Нямбаяр Японы Такүма Оцүтай барилдаж, 2-7 ялагдал хүлээн тэмцээнээ дуусгасан байна.
125 кг-д Доржхандын Хүдэрбулга эхний барилдаандаа Азийн аварга Ираны Мохебитэй таарлаа. Торгуулиар нэг оноо эхлээд авсан хэдий ч зургаан оноо алдаж эхний тойрогтоо ялагдал хүлээн тэмцээнээ дуусгажээ.
