Европ дахь Дипломат төлөөлөгчийн газруудад ажилладаг нэр бүхий дипломат ажилтнуудын хууль бус үйлдлийн улмаас Монгол Улсын нэр хүнд багагүй унаад байгаа учир тэдний хууль бус наймааг таслан зогсооно хэмээн ГХ-ны сайд Д.Цогтбаатар мэдэгдсэн билээ.
Хил дамнан хөлжиж, хууль бус наймаа хийгчдийн бүлэглэл гэнэт гарч ирээгүй, тамхины контрбанд хүрээгээ тэлж, кокаин, героиноор өргөжихөд юу нөлөөлөв гэдгийг яамныхан судалж байгаа сурагтай. Хилийн чанадад улс орныхоо нэр хүндийг унагасан хүмүүсийн олонх нь Гадаад харилцааны яаманд танил тал, бусдын татаасаар орж ирсэн, хулхи дипломатчид байдаг нь олонд ил болсон.
Ц.Элбэгдоржийг Ерөнхийлөгчөөр ажилласан найман жилд Гадаад харилцааны салбарт “агаарын томилгоо” их хийснийг дипломатчид ярьдаг юм билээ. Дипломат албаны талаар ямар ч ойлголтгүй, мэргэжлийн бусчуудыг томилсоны гор гарч байна ч гэж үзэж байгаа юм.
Хэдийгээр хугацаа алдсан ч ГХЯ-ныхан энэ асуудалд анхаарах болсны нэг илрэл нь зарим хүнийг чөлөөлснөөс харагдав. Тухайлбал, хил дамнасан хууль бус наймаанд оролцсон ХБНГУ-д сууж байсан Элчин сайд Х.Даваадоржийг ажлаас нь чөлөөлжээ. Х.Даваадоржоос гадна контрбандын хэрэгт холбогдсон ч танил талаа ашиглан, ял шийтгэлээс мултарч, зөвхөн ажлаас чөлөөлөгдсөн төдийгөөр хариуцлагаас мултарсан дипломатч цөөнгүй.
Тэдний нэг нь экс Ерөнхийлөгчийн томилсон, Чехэд суугаа Элчин сайд Н.Наранбат. Польшийн Цагдаагийн газраас хууль бус эд зүйл, тамхи зөөвөрлөсөн хэргээр эрэн сурвалжлагдаж байсан түүнийг Чех Улсад суух Элчин сайдаар томилсон байж.
Дипломат албаны нэр хүнийг ичгэвтэр байдалд оруулсан этгээдүүдийн нэг нь экс Ерөнхийлөгчийн үед, Францад томилогдсон Ц.Элбэгдоржийн Гадаад бодлогын зөвлөх асан А.Баттөр. Мөн Парис дахь Элчин сайдын яамны ажилтан М.Батсайхан, Гадаад хэргийн сайд асан Л.Пүрэвсүрэнгийн татаасаар Швейцарт томилогдсон В.Пүрэвдорж нар гээд хөврөх бололтой.
Гадаад харилцааны яаманд огт ажиллаж байгаагүй, хэний ч мэдэхгүй М.Батсайхан одоо тав дахь удаагийн томилолтоор Парист амьдарч байгаа аж. Тэрбээр ямар ашиг сонирхолтой болоод удаа дараа Францад томилогдоод байна вэ. В.Пүрэвдорж, М.Батсайхан нар Элчин сайдаас чөлөөлөгдсөн ч эх орондоо буцаж ирээгүй.
В.Пүрэвдорж нь олон улсын байгууллагад, М.Батсайхан нь Францад нэг жил амьдраад саяхнаас тус улс дахь Монгол Улсын Элчин сайдын яаманд зөвлөхийн албан тушаалд томилогдсон гэх мэдээлэл тархаад байгаа юм.
Г.Равжаа
